موقف غريب دلوقتي حصل أمامي...بس انا في اعتقادي هو مش غريب...
هو هيكون غريب علي اللي مش فاهم يعني ايه تربيه...
و مش عارف يعني ايه اب ممكن ياخد حقه في حياته أولاده..
طفله لا تتجاوز 6 سنوات...بتتكلم مع ابوها صوت وصوره...واقفه جمبي في أحد المحلات...
بتقوله تسمحلي اشتري دا يا دادا..كانت بنادي لابوها بدادا..
وامها هي اللي ماسكه التليفون...وقاعده في الأرض علي ركبها علشان تكون في طول البنت تقريبا...
الاب سال ايه دي وبكام...
قالت البنت...نجوم بتنور في الظلمه...لغرفتي...دي ب 3 دولار...
( بلاش تضرب الدولار في 12 ..دول كأنهم 3 جنبه بالضبط)..
فالاب قال ثواني...
الأم قالت للبنت...
لو دادا وافق علي اننا نشتري النجوم دي لزم تقوليوه شكرا...
لأنه بيتعب علشانك وبيشتغل يوم الأحد علشان يعرف يخليكي مبسوطه...
رجع الأب لشاشة التليفون..وقال للبنت ..انا موافق..بس دي اخر حاجة تطلبها خلال الشهر دا...
البنت رقصت من الفرح طارت...من علي الارض...وفضلت تقوله اشكرك يا دادا علي انك موجود في حياتي..
شكرا علي انك خلتني اشتري اللي انا عايزاه....بحبك بحبك..بحبك..وانتهي الحوار..
فضلت واقف حقيقي اتفرج علي نموذج التربيه النادر اللي الواحد مش بيشوفه في تربيتنا العربيه لولادنا...
احنا علشان نبقي بنربي....
بنجيب للولاد اغلي تليفونات وتقع تتكسر وعادي ولا كان في حاجة ودا علشان نعلمهم يتمنظروا علي بعض...
اغلي لبس...برضو علشان نفس الهدف...
اغلي كل حاجة علشان مبيقوش محرومين وعنيهم مليانه....
محدش بيقول لولاده انا بتعب علشان اعرف أوفر لك كل اللي انت عايزه...
الطلبات مجابه بدون رقيب أو حسيب...
ودا اللي بيطلع أجيال ماسخه ملهاش طعم ولا لون ولا تعرف يعني مسؤوليه ولا احترام ...
ولا يعني ايه اب طلعان عينه علشان يوفر أبسط الاحتياجات ماهوش بنك ..
دا انسان ليه مشاعر هو كمان مش اله...
ولا يعني ايه ام بتتفاتي في خدمه الولاد ماهياش الشغاله اللي مستعبدينها بلا حتي كلمه شكرا......
محدش بيقول تحرموهم. بس من وقت للتاني لازم يسمع كلمه لا ....
و لازم يتعبوا علشان يعرفوا يحافظوا علي اللي في أيديهم...
لأنك كأب أو أم ممكن تروح فجاه...وتسيبهم في مهب الريح مبيعرفوش غير يأخذوا وبس...
متعلموش معني العطاء...وميعرفوش يحافظوا علي حاجه ولا حتي يبني حياه..
علموا ولادكم احترام الاب...واحترام المجهود اللي بيعملوا برا البيت طول النهار علشان يوفر الحياه الكريمه من أكل وشرب ولبس وتعليم..
اوعي تحسسوهم أن ابوهم دا ولا حاجة...هتنكسر معني الرجوله جواهم ..
علموا ولادكم احترام الأم...وقد أيه هي أساس البيت وقد ايه من غيرها مكنتش يبقي في حياه..
وأوعي تقول انها بتعمل ايه يعني ما قاعده طول النهار في البيت ده لو كانت قاعدة في البيت اصلا ومش بتشتغل ...
علموا ولادكم المسئوليه..يرتب سريره...يغسل طبقه اللي اكل فيه...ويلم لعبه....
علشان يبقي عارف انه ليه دور في الحياه...
علموا ولادكم...ان كل واحد في الأسرة بيقوم بدور...مش مجرد انه طفل يبقي مباح له كل حاجة
...بدون حساب...
علموهم معني المشاركه علشان في النهايه انتو اول ناس هتحصدوا ما زرعتوا
