‏التاتش_المصري_ف_الصور..!!

Rena Jesus · رقم المشاركة : ( 1 ) 16 - 08 - 2016, 05:32 PM

‏التاتش_المصري_ف_الصور..!!

* الصور من النعم التي انجبتها التكنولوجيا , دايماً بنحب نخلد اي ذكري عزيزه علينا بصوره سواء مع حد بنحبه ،
صديق قديم ، لابس طقم كويس ، أو حابب تشارك الناس حالتك او مكانك
دا المفهوم الشامل للصور لكن بعد تدخل المصري بالتاتش بتاعه اصبح مفهوم الصور " عبيله و اديله "
بمعني اننا بنحول اي حاجه طبيعيه لـ أوفر دووز ,
بدل ما نتصور صوره للذكري بناخد سبعتلاف سيلفي بجميع حركات السناجب وبوز البطه"

* الشباب مثلاً عندها حركه مميزه ف الصور بيقف تاني ضهره وعامل ب ايده علامه النصر قال يعني الواد راجع من حرب الخليج.

* البنت اللي بتتصور مع الاطفال ف الشارع وتكتب فِ عشق الاطفال ,عشق اطفال ايه حضرتك دا انتي بتلسعي اخوكي بالمعلقه ف قفاه يافوزيه !

* البنوته الاوزعه دي حظها بيكون وحش جداً لان سبحان الله صحابها كلهم عمدان نور ف رجاء من صحابها يتصوروا وهما قاعدين مراعاه للـ 150سم بتوعها .

* فِ نوع قديم كدا من الشباب تلاقيه وهو بيتصور فاتح دراعاته كأنه هياخد الهوا بالحضن وكاتبلك ع الصوره " حضنت الهوا لما قلبي انكوا "

* البنت اللي بتصور بؤها أو إيدها الصبح وتكتب morning ! نعم ! مش فاهم فين الـmorning هنا عندنا ايد وبؤ زيك ولا انتي عندك 3 شفايف و 7 صوابع !

* الشاب العميق اللي بيصور الجزمه من تحت و يكتب عليها " كلام الناس " بمعني إن كلام الناس تحت رجليه , واخدين بالكوا من الـعُمق , انت ازاي كدا

* لما صحبتك تشتري نفس اللكلوك بتاعك ليه تصوريه وتكتبي توأمي والعشق وكدا ! انتي مكبره الموضوع ليه , كل الحكايه انها نزلت سوق الجمعه زيك

* الصور اللي بتتكلم عن نفسها , مثلاً واحد عامل ايده مسدس وبيضرب صاحبه " بيو بيو موت يا خاين " والتاني تلاقيه مندمج وراجع لورا كده اكنه بيموت ويكتب " لو صاحبك خانك اعتبره دخانك " انتو ليه بتعملوا فينا كدا .. بجد ليه !

* البنات اللي بتتصور ف كل أركان الكافيه وتاخد خمسوميت سيلفي, م كانتش كوبايه سحلب ب 5 جنيه اللي تخليكي تمرمطي ام المكان انتي وصحابك

* بالنسبه للبنات ألطف الكائنات فِ نوع منتشر جداً بتصور اعضائها زي رجليها ايدها صوابعها بؤها ودانها شعرها و تنزلهم انا حاسس ان بلعب تجميع puzzle !

‏احمد_الجلاد