الكاتب الصحفي بلال فضل يوجه انتقادًا للمهندس إبراهيم محلب
المصرى اليوم
وجه الكاتب الصحفي بلال فضل، انتقادًا للمهندس إبراهيم محلب، رئيس الوزراء، بعدما ظهر رئيس الوزراء في لقاء تليفزيوني، وقال: «اعترضت بشدة على مسلسل أهل إسكندرية، ولكني لم أصدر قرار بمنعه من العرض»، أوضح فيه أنه سيستخدم هذا التصريح لإثبات الحق في وصول المسلسل للناس عشان تحكم عليه فنيا بنفسها بعيدا عن تدخلات أي سلطة بتعامل الناس على إنهم عبط ممكن ينسوا الماضي وخصوصا وهما شايفينه بيتعاد قدام عينيهم، وأكد أن «التطبيل لن ينفع دولة السيسي»، بحسب قوله.
وقال «فضل»، الاثنين، عبر صفحته على «فيس بوك»: «طبعا مع بداية ظهور أزمة مسلسل (أهل اسكندرية) للنور قبل أسبوع، كان في تأكيد من الكثيرين ومنهم أصدقاء وزملاء مهنة على إننا بنفتعل الأزمة عشان نعمل دعاية للمسلسل وإنه أكيد هيتعرض، وتم التأكيد على ذلك بوجود تضارب في تصريحات الأطراف المعنية اللي كان بعض مسؤوليها بيتخيل إن التهرب من تحمل المسؤولية هو الحل».
وأضاف: «جه أول رمضان والمسلسل ما اتعرضش، قالك مفيش موقف من الحكومة ضده ولا حاجة، أكيد عندهم مشاكل تخصهم، أصل الحكومة لم تقول إنها هتمنعه، كإن الأجهزة الحكومية في بلدنا محتاجة تقول إنها هتمنع أو محتاجة تمضي قرارات المنع على ورق، مش بس إنها ترفع حاجبها وتلاقي ألف مين يخدم».
وواصل بلال فضل، حديثه: «رئيس الوزراء إبراهيم محلب، في حواره مع وائل الإبراشي، الأحد، في برنامج (العاشرة مساء)، قطع الشك باليقين لما اتسأل عن أزمة منع المسلسل، وقال كلام عجيب جدا وهو إن (الحكومة لم تتدخل لمنع المسلسل، لكن الحقيقة في الفترة اللي فاتت بدأت الشرطة ترجع لدورها وبدأ الناس يهتفوا الجيش والشرطة والشعب إيد واحدة والشرطة تعرضت للظلم بعد ثورة يناير وبدأت ترجع، فإحنا شفنا إن التوقيت غير مناسب لأنك تعرض عمل زي ده يفتح الجراح وليه ده يحصل في رمضان، إحنا ما اتدخلناش للمنع لكن شفنا إن التوقيت مش مناسب».
وأشار «فضل» إلى أن تعامل الحكومة مع المسلسل هو «نفس المنطق الذي سيتم التعامل به مع أي عمل فني بعد ذلك، لأنه هيكون فتح لجراح الماضي».
واستكمل: «الحسنة فيما قاله رئيس الحكومة إنه على الأقل بقى في توثيق صريح لموقف الحكومة من المسلسل بعد ما كان طول الوقت موقفها حبيس الغرف المغلقة والاجتماعات والاتصالات، وبالتأكيد هنستفيد من التصريح ده في سعينا القانوني لإثبات حقنا في وصول المسلسل للناس عشان تحكم عليه فنيا بنفسها بعيدا عن تدخلات أي سلطة بتعامل الناس على إنهم عبط ممكن ينسوا الماضي وخصوصا وهما شايفينه بيتعاد قدام عينيهم بس بالتصوير السريع الغليظ».
واختتم: «معنديش من السذاجة إني أتخيل إن هذا الكلام هيدفع حد إنه يعتذر عن تشويهه لسمعة صناع المسلسل واتهامهم بالدعاية والمتاجرة، ولا إنه يدفع حد إنه يتضامن ويدرك خطورة ما حدث، الناس كلها حددت مواقفها وقررت إنها تنحاز لمصالحها وتعدي وتفوت وتبرر وتطبل على أساس إن هو ده اللي هيحافظ على الدولة، مع إن الكتالوج القديم المتخلف اللي البلد ماشية عليه لا حافظ على دولة مبارك ولا على دولة طنطاوي ولا على دولة مرسي ولا هيحافظ على دولة السيسي»
30 - 06 - 2014, 09:00 AM
قد تكون مهتم بالمواضيع التالية ايضاً
العرض العادي
