عصام سلطان يدعو «أبوالفتوح» للانضمام لاعتصام «رابعة» خليك مع الغلابة تكسب

[Mary Naeem]

عصام سلطان يدعو «أبوالفتوح» للانضمام لاعتصام «رابعة» خليك مع الغلابة تكسب




وجه عصام سلطان، نائب رئيس حزب الوسط، لومه للدكتور عبدالمنعم عبد الفتوح، رئيس حزب مصر القوية، ودعاه إلى أن ينضم إلى اعتصام رابعة العدوية، موضحا «خليك مع الغلابة تكسب.. وشيل الإخوان ومكتب الإرشاد والشاطر والارتكاريا من دماغك». وأضاف في صفحته على «فيس بوك» تحت عنوان «اصحي يا نايم وحد الدايم»، الخميس، موجها حديثه لـ«أبو الفتوح»: «بلاش الحنية الزيادة وأنت بتتكلم عن الخائن القاتل المنقلب، وتذكر القسوة والكره لدرجة العمى حين كنت تتكلم عن المنتخب.. أخي الدكتور عبدالمنعم.. صدمة الناس فيك كبيرة، هرولت إلى الطرطور بمجرد إشارة، وتمنعت عن المنتخب لمرارة فى نفسك لم تستطع التغلب عليها». وتابع: «عمرك ماكنت أبدا بتاع لف ودوران، وكلام فى كلام، ومسك العصاية من النص، وتصفية حسابات شخصية بحتة، وسكوت على حق واضح، وطناش على باطل أوضح»، وناداه «أخي .. تعالى إلى رابعة العدوية، لدعم البسطاء الذين يدافعون عن أصواتهم في أكثر من عشر جولات انتخابية خلال عامين.. بلاش حكاية الأصوات.. طب تعالى لدعمنا ضد الانقلاب زي ما دعمناك في الانتخابات.. هي مش السياسة بردو خد وهات، مصالح يعنى .. ؟ وإلا انت نظامك وان وى ..؟». وقال عصام سلطان: «بصراحة أنا مشفق عليك، لا يحطك التاريخ جنب البرادعى وشفيق وبكرى وعكاشة وإلهام ودحلان وبهلوان.. خليك مع الغلابة تكسب.. وشيل الإخوان ومكتب الإرشاد والشاطر والارتكاريا من دماغك.. والله العظيم ٨٠% من اللى هنا مهومش إخوان.. ! دا احنا معانا ليبراليين ويساريين وناصريين، مسلمين ومسيحيين، متدينين ومش متدينين، وفى ناس مابتصليش خالص وما بتصومش وهما أحرار، ومحدش له دعوة بحد، الاحترام المتبادل يسود الكل، وضد الانقلاب، وبس». ودعا «سلطان» الدكتور عبدالمنعم أبوالفتوح إلي أن يعتبر حديثه «بالنيابة عن أصحابك وأصدقائك وإخوانك وأحبابك اللى زعلانين منك أوي ومش راضيين يكلموك من كتر الزعل، واللى كانوا واقفين معاك في جولة الانتخابات الأولي، ضد الكل بمن فيهم مرسي، يعنى مش إخوان ولا حاجة.. أسهل حاجة كنا فى الوسط عملنا زيك بالضبط، واتلككنا بخلافنا المعروف مع الإخوان، بس كنا هندوس على مبادئ كتييير أوى.. ومكناش هنعرف ننام بالليل من تأنيب الضمير». واختتم «سلطان» ما كتبه قائلا: «يارب نشوفك زي ما كنت زمان، واقف مع الحق من غير حسابات ولا توازنات انت بتفكر فى إيه..؟»، وسأله «هو أنت وحمدين صباحى فاكرين إن السيسى هيعمل انتخابات رئاسية وهترشحوا نفسكوا مرة تانية ..؟ اصحى يا راجل يا طيب .. اصحى يانايم .. وحد الدايم».

المصدر : المصرى اليوم