هو أنت ليه واخد عنى فكرة غلط

[Mary Naeem]

هو أنت ليه واخد عنى فكرة غلط

بقلم بالاديوس

صديقى وعزيزى ، اخويا وحبيبى أنا عندى سؤال واحد بس هو أنت ليه واخد عنى فكرة غلط ؟؟!!

• أنت بتقول عنى أنى كافر لأنى أنا بعبد أنسان وهو سيدنا عيسى المسيح ، عندنا فى انجيل المسيح الشريف المرسل فى الرسالة الأولى لتيموثاوس الفصل السادس والأية 16 " وباعتراف الجميع، سر التقوى عظيم: الله ظهر في الجسد، شهد الروح لبره، شاهدته الملائكة، بشر به بين الأمم، أومن به في العالم، ثم رفع في المجد "

وكده احنا بنعبد الله مش بنعبد بشر ورفعناه لمستوى اله

• انا مش مشرك على فكرة ومش بعبد 3 ألهة لأن معندناش غير الله الواحد لاشريك له وده هتلاقيه عندنا فى الأنجيل فى أنجيل المسيح الشريف كما دونه الحوارى يعقوب الفصل الثانى والاية 19

أنت تؤمن أن الله واحد؟ حسنا تفعل ! والشياطين أيضا تؤمن بهذه الحقيقة، ولكنها ترتعد خوفا

• وكمان عمرنا ما تجرأنا على ربنا بصفات مش حلوة او لاتليق يعنى مثلا مش بنقول أن ربنا أتولد وكمان مش بنقول عليه انه كان له ولدا فحاشا لله –سبحانه وتعالى – أن يكون له ولداً او صاحبة فهو القدوس جل جلاله فكيف يعقل هذا ؟!!

ولكن احنا بنقول ان الله تجلى فى شكل بشر وشابه البشر فى كل شيئ ماعدا الذنوب والمعاصى أصل أحنا بنؤمن أن الله قادر على كل شيئ ، فيقول أنجيل المسيح الشريف المرسل فى رسالة الى أهل العبرانيين الفصل الثانى وأية 14

" إذن، بما أن هؤلاء الأولاد متشاركون في أجسام بشرية من لحم ودم، اشترك المسيح أيضا فى اللحم والدم باتخاذه جسما بشريا. وهكذا تمكن أن يموت، ليقضي على من له سلطة الموت، أي إبليس"

• وخد بالك أحنا مش وثنيين ، ايه رأيك بقى ؟!! يعنى مش بنعبد الصور والتماثيل والدليل كمان من التوراة اللى احنا بنؤمن بيها ودى موجودة فى كتاب التثنية الفصل الخامس والأية 8

لاتنحت لك تمثالا، ولا صورة ما مما في السماء وما في الأرض وما في الماء تحت الأرض.

وكمان فى كتاب التثنية الفصل الرابع والأية 23

ولكن إياكم أن تنسوا عهد الرب إلهكم الذي قطعه معكم و تنحتوا لأنفسكم تمثالا لصورة ما مما نهاكم الرب إلهكم عنه.

• وخد بالك كمان لما النور بينطفى فى الكنيسة فى ليلة رأس السنة مش معناه اننا بنعمل حاجة غلط مع بعضنا ، صدقنى بجد وبحق وحقيقى ولو مش مصدق روح شوف بنفسك واتأكد بعينيك ومعدتش فيه أمن على الكنايس يعنى مفيش حجة وبعدين كمان أن بحبك يعنى مش هاخدعك ومش هاكدب عليك .ولو أنت فاكر اننا أباحيين تبقى غلطان ، عارف ليه أصل احنا عندنا أية فى الأنجيل بتقولنا خليكم كويسين ودى موجودة فى أنجيل المسيح الشريف كما دونه الحوارى بطرس فى رسالته الأولى والفصل الأول والأيات 15-16

بل كونوا صالحين في كل تصرفاتكم، لأن الذي دعاكم هو قدوس. وهو يقول في كتابه: "كونوا صالحين لأني أنا قدوس."*ترجمة الكتاب الشريف

كمان أنت بتقول أننا بنشرب خمرة فى الأعياد والمناسبات ودى حاجة ربنا محرمها بس احنا عندنا اية فى أنجيل المسيح الشريف المرسل فى رسالة ألى أهل أفسس بتقول والفصل الخامس وأية 18 :

لاتسكروا بالخمر ففيها الخلاعة

• وبسمعك وأنت بتقول ان نسائنا متبرجات وبيسببوا الفتنة بس مش كل واحدة ماشية وحتة من جسمها مكشوفه يبقى كده ده معناه انها بتتبع تعاليم سيدنا عيسى والأنجيل بيقول كما ورد فى أنجيل المسيح الشريف كما دونه الحوارى بطرس فى رسالته الأولى الفصل 3 والأيات 3، 4 كالأتى :

وعلى المرأة ألا تعتمد الزينة الخارجية لإظهار جمالها، بضفر الشعر والتحلي بالذهب ولبس الثياب الفاخرة.وإنما لتعتمد الزينة الداخلية، ليكون قلبها متزينا بروح الوداعة والهدوء. هذه هي الزينة التي لا تفنى، وهي غالية الثمن في نظر الله!

• وبالنسبة لموضوع اننا نجسين ومعفنين ومش بنستحمى وكمان مش بنتطهر لما نيجى نصلى فأحب أقول لحضرتك أصل احنا عندنا فى المسيحية ربنا مش بينظر على الجسم من بره شكله نضيف ولا لأ ؟ عندنا ربنا بيبص على القلب من جوه أصل يفيد بايه وانا بزنى أو بشتم او بحلف وكل شوية أروح أستحمى علشان أصلى طيب ما أتغير من جوه الاول ولا أنت شايف ايه ؟؟وممكن تروح تقرأ أنجيل المسيح الشريف كما دونه الحوارى متى فى الفصل 23 عن الناس المتدينين بتوع المظاهر وكل شوية يغتسلوا من بره ومن جوه مايعلم بيه الا ربنا !!

• وضحكوا عليك لما قالوا لك أننا جبناء وخوافين ولما يبقى فيه خناقة أول واحد بيجرى هو النصرانى أو مثلا بنضربهم ومش بيقدروا يعملوا حاجة عارف ليه احنا كويسين ومش بنأذى اللى بيأذونا ؟؟!! أصل الأنجيل الشريف بيقول بلاش تقاوموا الشر بس ينفع تقابلوه بخير وممكت تقراه فى أنجيل المسيح الشريف كما دونه الحوارى بطرس فى رسالته الأولى الفصل 9 والأية 3

لا تبادلوا الشر بشر، ولا الشتيمة بشتيمة. بل بالعكس: باركوا، فترثوا البركة، لأنه لهذا دعاكم الله .

وكمان أنجيل المسيح المرسل فى رسالة الى أهل روما فى الفصل12 وأية 21

لا تدع الشر يغلبك، بل اغلب الشر بالخير

شوفت بقى انت واخد فكرة غلط عنى ازاى !!!

أخويا وصديقى على الرغم من انى بسمع منك كل ده سواء بتقوله على النت او من ورا ضهرى انا لسه بحبك اوووى وهافضل أضحك فى وشك وأساعدك لما تكون محتاج ليا او حتى مش محتاج هاروح أساعدك برده " رخامة يعنى "
أنا أتعلمت فى مسيحيتى أن ربنا بيبحب كل البشر من غير حدود وبيحبنى أنا كمان لأنه خلقنى وأنا بحبك لأن ربنا بيحبنى وبيحبك لأنه خلقنا احنا الأتنين علشان نعرفه ونتمتع بكل الحاجات الحلوة اللى عنده من الهدوء والسلام وراحة البال.