اسكتش ذبح اسحق
اسكتش تقديم اسحق محرقة
الشخصيات كركر ومرمر ابونا ابراهيم اسحق وخادم وخروف وحمار
بدايةالاسكتش علينا توعية الطفل بمايلى : -
1- ان يعرف الطفل قصة اسحق وانه اتى بعد وقت طويل بوعد من الله
2- الطاعة ونلاحظ فى طاعة ابونا ابراهيم لله وعدم التذمر وطاعة اسحق لابونا ابراهيم .
3- ان الانسان يشكر ربنا دايما وان ما يأتى الينا من الله خير دايما
4- احترام الكبير وعدم التريقه على اى شخص وان نسمع الكلام فى الكنيسة والبيت
كركر : يا مرمر يا مرمر
مرمر : انا هنا يا كركر عايز ايه كدا
كركر : يلا عشان هنروح رحلة نهاردة
مرمر : رحلة فين بس يا كركر انا تعبانه نهارده خالص
كركر: ده رحلة حلوه خالص مع الكتاب المقدس
مرمر : ياااه انا بحب اقرى فى الكتاب المقدس كتير وبحب اسمع قصص فيه كتير خالص
كركر : ايوه ونهارده معادنا مع قصة حلوه خالص هنسافر فيها عند ابونا ابراهيم ابو الاباء بتعرفيه ولالا
مرمر : ايوه طبعا عارفاه يا كركر ابراهيم ابو الاباء هو ابو اسحق صح كدا ولالا
كركر : ايوه صح برافو يلا بينا عشان نشوفه هيعمل ايه نهارده فى القصة دى
مرمر : يلا بينا
تمسك مرمر وكركر بالكتاب المقدس وفجاه الدنيا تظلم ويدخل فى حياة ابونا ابراهيم
كركر : ياااااه شايفه يا مرمر مين اللى هناك ده وماشى فى الصحراء ومعاه ابنه وراكبين على الحمار
مرمر : ياااه ده بعيد خالص تعال نسأله نشوفه مين
تذهب مرمر وكركر لابونا ابراهيم
مرمر : ازيك يا عمو انا اسمى مرمر وده اخويا كركر
ابونا ابراهيم: ازيكم يا اولاد انا اسمى ابراهيم وده ابنى اسحق ودول الخدام اللى معايا
كركر : ايوه صح ورايحين فين كدا لوحديكم
ابونا ابراهيم : رايحين يا اولادى نقدم ذبيحة لربنا
ربنا قالى عليها
كركر : اممممممم طيب ينفع نيجى معاك
ابونا ابراهيم : ماشى تعالوا يا اصحابى
يمشى الاصحاب شويه
ابونا ابراهيم : ياااه خلاص قربنا نوصل تعالوا يا خدام استنونا هنا مع الحمار هروح انا وابنى اسحق نقدم الذبيحة ونسجد ونرجع ليكم
كركر : يلا بينا نروح يا مرمر نشوف ابونا ابراهيم هيعمل ايه
ابونا ابراهيم : خد يا اسحق شيل شويه الحطب دول عشان نولعهم ونقدم بيهم الذبيحة وانا همسك النار والسكينه
اسحق : حاضر يا بابا
كركر : شوفتى يا مرمر اسحق مطيع ازاى وبيسمع كلام باباه ازاى لازم نبقى احنا مطيعين زيه ونسمع الكلام
ابونا ابراهيم : وصلنا اهو خلاص تعال يا اسحق
اسحق : يا بابا يا بابا
ابونا ابراهيم : نعم يا اسحق يا ابنى
اسحق : احنا معانا النار والحطب بس فين الخروف
ابونا ابراهيم : الله هيشوف ليه الخروف يلا تعال
يبنى ابراهيم المذبح ويحط حطب ويربط اسحق عليه
كركر ومرمر : هتعمل ايه يا ابونا ابراهيم
ابونا ابراهيم: اصل يا اولادى الله جالى وقالى خد ابنك وحيدك اللى بتحبه واصعده محرقه عل الجبل وانا بسمع كلام ربنا عشان بحبه اكتر من اى حاجه
كركر ومرمر: ايوه صح لازم نسمع كلام ربنا
ابونا ابراهيم يمسك السكين ليذبح ابنه وفجاه يظهر ملاك من السماء
كركر ومرمر : ياااه يا ابونا ابراهيم استنى فى ملاك اهو ظهر تعال نشوفه هيقول ايه استنى
الملاك : ابراهيم ابراهيم اوعى تذبح الغلام ومتعملش فيه حاجه خالص ربنا عرف انك بتحبه عشان كدا مرضيتش تمنع ابنك عنه وهيباركك كتير خالص عشان بتسمع كللم ربنا
ياتى خروف من بعيد ومربوط
كركر : شايفه يا مرمر فيه خروف هناك اهو تعال يا ابونا ابراهيم فى خروف هناك اهو من بعيد
ابونا ابراهيم : ايوه يا اولادى ننقدمه ذبيحه عشان ربنا بعته مكان اسحق ابنى شوفتوا يا اولادى اهو عشان انا بسمع كلام ربنا وبنحب ربنا لازم نسمع كلامه كويس
ونسمع كلام بابا وماما فى البيت يلا بقى عشان تروحوا عشن اللليل قرب يجى
كركر ومرمر : حاضر يا ابونا ابراهيم احنا ماشيين
مرمر : شوفت يا كركر احنا للزم نبقى مطيعين كويس خالص ونسمع الكلام فى البيت والكنيسة وفى القداس ونسمع كلام الاستاذ فى مدارس الاحد ونحترم بيت ربنا والقداس والصلاة
كركر : ايوه صح يلا نقول باى لابونا ابراهيم واسحق
مع السلام يا ابونا ابراهيم مع السلامة .
فى نهاية الاسكتش على المخدوم ان يجيب على بعض الاسئلة وان يفهم لماذا اراد ربنا بهذه التجربة ؟
وعلينا التوضيح ان ارادة الرب دائما تكون بركة وخير ومهما كانت تجارب فى حياتنا الرب يتدخل وان نصلى دايما فى البيت قبل النوم وقبل اى شئ وقبل الاكل ولا نتضايق من شئ وان نحترم ونطيع بابا وماما فى البيت ونسمع الكلام ولا نعلى صوتنا عليهم وان ابونا اسحق اطاع ابراهيم وذهب معه وعلينا ان نحترم الكبير سنا كما رأينا فى القصة
