نفسي كل طعم استطعمته ايام زمان يرجع انهارده من جديد

[walaa farouk]

جوايا كلام كتير خصوصا السنه دي في صوم العدرا
اكتب للناس عن فضايلها ولا عن حبي ليها
بس وخدني احساسي ومشاعري ناحيه الذكريات
ذكريات صوم العدرا زمان واحنا صغيرين
بس كل حاجه دلوقتي حقيقي اتغيرت
يعني مثلا زمان لما كنا ننزل القداس في نهضه العذرا الصبح
كان ابونا بعد القداس يشغل علي سماعات الكنيسه ترانيم للعدرا
وكانت ترانيم العدرا زمان ترانيم كده تحس فيها بروح جميله وهاديه
ورتمها جميل وتخليك ماشي جوه الكنيسه اكنك في السما
تلاقي بعدها الخادم ياخدنا نمسح الكنيسه ونضف الهيكل وكل يوم نغير الورد اللي علي صوره العدرا
ونلمع الصوره كده ونرش عليها ريحه حلوه
وكلنا نروح بعد القداس والتنضيف يادوبك ناكل لقمه سريعه وننزل كلنا
ومعانا التونيه علشان نلحق التمجيد
ويبقي رئيس الشمامسه حاحه كده ايقونه تبصله تتمني تبقي زيه كان اسمه (عم وليم)
و (عم رؤوف) الاتنين دول في كنيستي القديمه عرفونا يعني ايه قيمه الشمامسه
وقيمه العشيه والتمجيد
كان (عم وليم) معاه ورقه جدول كده في اسامي كل الشمامسه
وكل يوم يوزع مين يمسك صليب في الزفه ومين يمسك صوره ومين يمسك بخور
وكلنا كنا نقف كده اكننا في جيش مستنين بس ينده علينا
كنا عارفين قيمه الزفه اللي بنلف فيها في الكنيسه
وبعد ما تخلص النهضه كان كل واحد مننا في خورس الشمامسه ايام ما كنا صحاب
واخوات كان كل واحد مامته تعمل اكله معينه ونقعد كلنا بعد النهضه ناكل سوا
ونهزر ونضحك واحنا جوه حضن الكنيسه
وبعدها ياخدنا الاستاذ
نقف معاه نعمل احلي تسبحه جوه الهيكل مع نفسنا كده من غير زحمه ولا مايكات ولا حاجه
وكل يوم كده في النهضه لحد ما تيجي اخر ليله في العدرا نمشي بالصلبان في الشوارع
ونبقي مستمتعين وفرحانين
عارفين حتي لما كان القربان السخن بيتباع في الكنيسه وقت النهضه كان له طعم مختلف
بس انهارده بقيت حاسس كل حاجه اتغيرت
نفسي اعيش يوم من ايام زمان
لما كان في حب ومافيش خناقه علي مركز ولا سلطه ولا مين احسن من مين
لما كنا اصحاب واخوات ومن التعب كنا نفرش في الارض في حوش الكنيسه وننام
لما كانت القلوب معندهاش اهتمامات غير الكنيسه
نفسي اشوف الجيل الشباب والشابات اللي بخدم معاهم يساعدوني نرجع تاريخ الكنسيه البسيط الحلو
يمكن كل ده مافيهوش تعليم ومواضيع بس في حياه زرعت جوانا كنيسه بطعم مختلف
نفسي كل طعم استطعمته ايام زمان يرجع انهارده من جديد