يا ست الكل يا أصيله

[tito227]

يا ست الكل يا أصيله














للأب القمص افرايم الانبا بيشوى

يا ست الكل يا أصيله

يام العيون الكواحل،


والسواحل والوادى الجميل،


يا ام الحضارة والنضارة


والصحارى والشمس اللى شارقه،


والقمر المنير،


والقلب الكبير،


يا أمي يا غاليه ويا عاليه


مهما كبرتي انت صبيه


بوادى النيل،


ومهما مرت عليك احزان


وفساد وسرقه


ترجعي غنيه وقويه


بشعبك وعلمك وفنك الاصيل.


مهما يقولوا عليكى دي عليله.


وثورتها عوره ومخطوفه،


وقلوبنا عليك تبقى خايفه ومرجوفه


وتبقى مديونه وتطلبي مساعده


من اللي يسوى واللي ما يسوى


ويفكروا شعبك فقير.


تنهضي يا بلادي


ويبقى شعبك وفى واصيل.


.......


يام الفستان الاخضر والاصفر


ياللى على سواعدها بتشمر


ياللى جودتى على الانسان


بالبيان وبفجر الضمير


ياللى من زمان غنالك اولادك


بالناي اشعار


وقالوا على المزمار


فيكي المواويل.


اهرامك وطبك وعلمك وادبك


تشهدلك يا امي من جيل لجيل


يا عروسه الشرق يا جميله


ياللى تامروا عليك بكام حيله وحيله


عيون سهرانه عشانك تصلى


وقلبى موجوع عليكى تملى


ومهما قالوا عليك يا امى


هتفضلى الاحلى والاغلى


وقلبك يفيض لينا بالحب والخير


يا امى احنا اولادك


ولازم ليكى للمجد هنعلى


.........


يا بلدي ياللى راسها فى اسكندرية


فيه المنارة والحضارة


وفيها مار مرقص لينا يصلى


وصدرها فى الدلتا يدر الخير


من طميته وميته رواكى النيل


ومن خيرك شبعوا من زمان


الرومان واللى قالوا ادخلوا مصر بامان.


يا بلدى ياللى فاتحه ذراعيها


من سيناء وبورسعيد لمطروح


بتقول بضمك يا ولدى فين ما تروح


انت لينا يا امى الروح ولو ولدك


فى سيناء روحه للبارى رايحه تروح.


ليكى نضحى بالقلب قبل الروح.


يابلدى ياللى قلبها فى القاهرة


القادرة والحاضرة


بلد الكنائس والمآذن تفضل عامرة


يا بلدي ياللى بثوبها لينا ساتره


توبك الفضفاض


من البحر الاحمر للوحات


منه ناكل البلاحات


ونشوف عجايب الاسماك


ونسهر فى الهدوء نقول اهات


يابلادى يا للى رجليها فى الصعيد


سمرها يحلى وجملها أحلى


مهما اهملوه وظلموه فى تعاقب الحكومات.


................


يا بلادي يا غاليه


انهضى وقومى


اوعى يوم على الفساد تسكتي


ولا تقبلي بالظلم لولادك


واظهري معدن ارجالك


اوعى قطر الحضارة يعديكى


والجهل والفقر والمرض


يعشش فى ربوع واديكى


قومي يا بلدي ونظفى شوارعك


وغذينا من لبنك وضرعك


وصحى الضمائر النايمة


والناس اللي من الحقد بقت


مجنونه او هايمه


قومى يا بلدي وطهري قلوب البشر


من الخطايا والتعصب والذنوب


وخلى شعبك يتلاشى العيوب


بلاش الاخو يأكل لحم اخوه


والا الولد يوم يرفع عينه على ابوه


ولا الوالد يكون قاسى على ولاده


ولا الرئيس يكون ناسى مجد اجداده


ولا المسئول يقول انى كبير


على المحاسبة والمعاتبة والقانون


وباذن الله مش هيكون


فيك مريض ولا محزون


ولا حاميكى يكون حراميكى


قومى يا بلدي ولمى اولادك


وكونى حانيه على الضعفاء


وإعملى بجد تعيدي امجادك


ويجمعنا قلبك الكبير


ويروينا بدمه النيل


ونتغذى من خيرك الكتير


وتضلك يا ست الكل


مضيافه وبيتك دار الكرم


بيت القيم والقمم والشعب الاصيل


على الكل خيرك


ولا ترضى ابدا بالشماتة والمذله


قومى يا بلدي لسه مشوارك طويل.

[Mary Naeem]

شكرا على المشاركة المثمرة
ربنا يفرح قلبك

[Magdy Monir]

شكراً على مشاركتك
ربنا يبارك حياتك