|
 |
 |
 |
|
رقم المشاركة : ( 1 )
23 - 01 - 2021, 08:47 PM
|
|||||||||||
|
|||||||||||
 عزيزى الله قبل مابدأ معاك الكلام اسمح لى ابعت م الارض السلام لارواح كتير سابتنا السنة دى وحبايب كتير غابوا عن عينينا خلاص بس اقول لك وسط كل حزن اتعاش ثقة ان صاحب الروح ارتاح خلاص اصل الارض كل يوم بتثبت انها تستحق لقب .. دنيا .. مش بس عشان حياتنا فانية بس عشان فجأة بصينا حوالينا لقينا الكل اتغير حتى اللى عارفينهم كأنهم بقوا ناس تانية وكأن ابليس كسب فى النهاية وحاشا .. إن لسانى ينطقها وانت ضابط الكون كله انت الازل والابد .. البداية والنهاية انت اللى كل تجربة ليها عندك منفذ وانت اللى بكلمة منك حتى الطبيعة هتقول حاضر وتنفذ مش هاحكيلك على الوجع اللى بقينا فيه لانك شايف وعارف حتى اللى بنخبيه ولا هاحكيلك ع التعب اللى السنة دى شوفناه ولا الخوف والرعب اللى فى لحظة كلنا عشناه مش هاحكيلك على القلوب اللى اتوجعت لانى واثق ان كل صلواتنا ودعواتنا اتسمعت كل لحظة حزن اتعاشت .. وكل دمعة فرح اتحاشت .. كل قبضة قلب اتحست .. وكل نبضة حياة فى لحظة وقفت .. كل ده مكشوف قدامك .. كان ممكن فى لحظة ينتهى .. بس انا واثق فى حنية احكامك .. عشان كدة .. هاطوى الايام اللى فاتت واقف قدامك واكلمك هاطلب زى كل مرة .. عشانى وعشان كتير محتاجين .. ماحنا مالناش غيرك عنده طلباتنا وانت الوحيد الحق .. وفيك اليقين .. ادى كل محروم من غناك .. اللى محتاج فلوس ابعت له .. او سدد عنه احتياجاته .. اللى نفسه فى صرخة وليد فى بيته ابعتهاله بامر منك مهما كانت صعبة ولو مش إرادتك طبطب عليه وعوضه منك بفيض محبة اللى عايش فى مهانة من كل اللى حواليه رد اعتباره ورجع كرامته ولو عايز تسيبه عشان تقويه اسنده .. بس خليه يفتكر كام مرة سندته البيوت المفككة والعيلة اللى كل فرد فيها فى مكان لم شملهم بالحق عشان تبقى بيوت ع الصخر انا واثق ان كل ده فى ايدك وفى الامكان المشوهين نفسياً وجسدياً خدهم فى حضن رحمتك داوى كل عجز فيهم دوقهم بمراحمك طعم حنيتك المرذولين والبائسين المنسيين والمهمشين ارفعهم يا رافع السموات بأمرك ولو مش نصيبهم كمل كل نقص عندهم بسترك اهدم يا رب كل حصون الشر اللى بيبنيها ابليس جوانا حصن الكبرياء والعند حصن الغرور حصن القسوة والانتقام وافتعال الشرور نادى بجبروتك على كل ضلمة فينا ليكن نور واخييييرا يارب ارفع عن العالم الوباء رجع روح السلام تانى لينا انا عارف ان كتير مننا بعدوا وكتير كمان .. نسينا اقولك سر .. وانت الكل قدامك مكشوف انت كان واحشك صوتنا وجريتنا عليك وحضننا فاللى ساب الارض .. حضنته فى السما .. واللى ركع قدامك .. حضنته فى الصلاة .. بين ايديك ايامنا اللى جاية .. واللى فيه خير لينا ابعته بطريقتك بس قبلها ازرع فى قلوبنا بذور شجرة تكون ثمارها قبول مشيئتك آمين 
|
 |
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| أيامي الجاية في ايديك محمية |
| خد الحاجة المناسبة ليك مش الحاجة اللي تعجبك |
| ايامنا القليلة |
| ايامنا القليلة |
| بعض ايامنا سوداء ، |
العرض العادي
