اضطراب الشخصية الحدية

[walaa farouk]

أول نوع من اضطرابات الشخصية اللي هنتكلم عنه بالتفصيل هو اضطراب الشخصية الحدية اللي هو نمط عام ومنتشر من عدم الاستقرار في العلاقات وصورة الذات والعواطف بالإضافة لاندفاع واضح، والنمط ده بيكون بدأ في مرحلة البلوغ المبكر وبيظهر في سياقات مختلفة ومتعددة..

علشان يتم التشخيص باضطراب الشخصية الحدية، لازم يكون المريض عنده على الأقل 5 من الأعراض دي:

1- بيبذل مجهود فظيع علشان يتفادى أنه يتم هجره (سواء الهجر ده حقيقي ولا المريض اللي متخيله)..
شعور المريض أنه هيتساب أو يترفض ممكن يؤدي لتغييرات عميقة في صورته عن نفسه وفي عواطفه وإدراكه وسلوكه..
المريض بيكون حساس جداً تجاه البيئة المحيطة به وممكن يعاني من خوف شديد من الهجر وغضب غير مناسب، والمريض بيكون من جواه حاسس أن "الهجر" ده معناه أنه شخص سيء، والخوف من الهجر ده بيكون نابع من عدم تحمل فكرة أنه يكون وحيد ومن احتياج شديد لوجود ناس حواليه...

2- نمط من العلاقات الشخصية الغير مستقرة والمحتدة اللي بتتناوب بين النقيضان من اضفاء المثالية للتقليل من القيمة... في بداية التعارف، ممكن المريض يحس أن الأشخاص اللي حواليه مثاليين ويطلب أنه يقضي معاهم وقت طويل جداً ويشارك معاهم تفاصيل خاصة جداً من بداية العلاقة.. وجهة نظر المريض في الناس اللي حواليه بتتغير فجأة وبشكل كبير وبالتالي مشاعره ممكن تتغير بسرعة جداً ويحس بأن قيمة اللي حواليه قليلة ويبدأ يحس أن الطرف الآخر مش مهتم كفاية ولا بيقدم للمريض اللي هو محتاجه أو بيقف جنبه بشكل كافي...
المريض عنده القدرة أن يتعاطف ويراعي الآخرين ولكن وهو متوقع أن الطرف التاني هيكون موجود لتلبية احتياجاته في أي وقت وتحت الطلب..

3- ارتباك في الهوية: صورة الذات عند المريض بتكون غير مستقرة بشكل دائم وواضح..
صورته عن نفسه بتتغير بشكل مفاجئ وكبير وبتظهر في تغير أهدافه وقيمه وطموحاته العملية
؛ يعني ممكن مثلاً فجأة يغير آراءه وخططه العملية أو قيمه أو هويته الجنسية أو نوع أصدقائه..
في أغلب الوقت، المريض بيكون شايف نفسه شخص سيء أو شرير،
ولكنه ممكن في أوقات يحس أنه مش موجود أصلاً.. التجارب دي ممكن تصيب المريض
لما يتعرض لموقف يحس فيه أنه معندوش أي علاقات ذات معنى ولا أي دعم..

4- الاندفاع في حاجتين على الأقل ممكن يدمروا حياة الشخص؛ زي مثلاً: صرف الفلوس فيلعب قمار مثلاً، الجنس، تعاطي المخدرات، السواقة بشكل خطير وغيرهم

5- تكرار سلوكيات انتحارية أو تهديدات بالانتحار أو سلوكيات مؤذية للنفس
(زي أنه يجرح نفسه وهكذا).. 8% لـ 10% من مرضى اضطراب الشخصية الحدية بينجحوا في الانتحار..

6- عدم استقرار عاطفي ناتج من أن بشكل كبير مزاج المريض
بيتغير كرد فعل على البيئة المحيطة (زي مثلاً نوبات حادة من الانزعاج والقلق
اللي ممكن تمتد لعدة ساعات، وفي حالات نادرة لعدة أيام)

7- مشاعر مزمنة بالفراغ الداخلي.. وبالتالي المريض بيحس أغلب الوقت
أنه زهقان فبيستمر في البحث عن حاجات يعملها طول الوقت

8- غضب شديد وغير مناسب أو صعوبة في التحكم في الغضب اللي عادةً بيظهر
لما المريض يحس أن الشخص اللي بيراعيه أو الشخص اللي مرتبط به مش مهتم أو هاجره؛
ونوبات الغضب دي بييجي بعدها مشاعر الندم والخجل وبتزود عند المريض احساسه بأنه شرير

9- تظهر أفكار بارانوية أو أعراض انشقاقية شديدة بسبب الضغط العصبي وبشكل مؤقت.
. النوبات دي بتحصل كرد فعل على هجر حقيقي أو متخيل وأعراضها بتكون مؤقتة،
ممكن تستمر دقايق أو ساعات.. عودة الطرف التاني الحقيقية أو المتخيلة بتؤدي لانحسار في الأعراض دي..