مش انا

[walaa farouk]

الحب مش كلام و نحنحة .. ادم سقط فى اول اختبار حب ..
اول ما ربنا عطاله حوا قال دى حتة منى يا ناس دى قمراية دى قلبى .
. و اول ما اكلوا من الشجرة ووقفوا قدام ربنا و ربنا سال (هل اكلت من الشجرة )
و كان ادم خايف يبقى طبيعى حوا تبقى مرعوبة .
.ادم ما قلهاش ما تخافيش و اقفى و رايا معاكى سبع ..
سيبينى و انا حتفاهم معاه و قال انا فداكى يا عمرى ..لا ..
خدها من ورا ضهره ما هى مستخبية اكيد و قال لربنا " البتاعة دى هى اللى اكلتنى الهى تنشك و تموت "
ده حتى ما قالش اسمها ..الْمَرْأَةُ الَّتِي جَعَلْتَهَا مَعِي هِيَ أَعْطَتْنِي مِنَ الشَّجَرَةِ فَأَكَلْتُ .
. انا بتكلم بابتسامة و هزار بس ده اللى حصل .
. ما هو من شوية كان لسه مخنف و محلو و قال حتة منى و عظم من عظمى و لحم من لحمى ..
طب اللى من لحمك ترميه كده ؟! و خد بالك هما كانوا عارفين ان فيه عقوبة موت
..يمكن مش فاهمين العقوبة اوى ..يمكن شافوا حيوانات بتموت فى الفردوس لانها طبعا مش مخلدة
.. يمكن فعلا مش عارفين الموت ده ايه بس واضح انهم كان تصورهم عنه انه مرعب بدليل خوفهم .. المهم لما قال لربنا كده كأنه بيقوله و ده ذنبى هو انا كنت طلبتها .. انت اللى جبتها .. مش انا ... و دى بقة اللى بنقولها دايما من واحنا اطفال و لحد دلوقتى .. زمان اى حاجة تقع فى البيت و ماما تسال و سلاح الام المصرية فى ايديها " الشبشب " مين اللى وقعها .. كل البيت فى نفس واحد زى الكورال كده .. مش انا .. اى خطية و اى سقوط .. ليه وقعت ؟ الرد .. مش انا .. هو اللى نرفزنى .. هى اللى استفزتنى .. هى اللى بتكرهنى م شعارفة عملتلها ايه ؟ .. هى اللى اغرتنى ما بلاش اللبس المكشوف ده .. هو انا حارس لاخويا .. هى اللى قسمت البيت بعندها و اهمالها ..هو اللى مش طايق كلمة و لا حتى بيبص فى ولاده ..عملتلها كل حاجة معرفش مش بتحبنى ليه .. قدمت له كل حاجة مش عارفة ناقصه ايه .. مش انا اللى المفروض اتصلح يروح يعالج نفسه .. هى اللى شتمتنى و اهانتنى ... هو اللى كسر عليا.. الشيطان هو اللى غلبنى .. مش انا .. مش انا .. مش انا ..
جه يسوع الحلو و قال بالذمة ده حب .. انا علمكم الحب اللى بجد .. يسوع ييحبنى
خلقنا فى الفردوس و عطانا كل حاجة للتمتع .. ده انا و انت مصدر فرحته ..من حبه ينبسط اوى بقعدتنا معاه " مسرتى فى بنى ادم " امثال 8 ......... بيحبنى
غلطت و قلت مش انا يقول اشيل انا عنك و فدانا على عود الصليب .. البار من اجل الاثمة .. بيحبنى
هو اللى ديما يبادر بمحبته و يخبط على الباب .. و مش مرتبط بمين اللى جوه .. زانى ..فاسد حرامى .. امين .... فقير .. غنى .. جاهل ..مثقف .. ظالم ..مظلوم .. ساقط .. بار .. قديس .. خاطىء ... بيخبط .. و عنده استعداد يقعد و يتعشى معايا مهما كان بيتى حقير بس افتح ... بيحبنى
غافر خطاياى الكتير اوى .. بيسامح .. اى خطية ..تيجى و تقول سورى متاسف يارب .. يقول سامحتك .. خطايكم لا اعود اذكرها لكم ..و لو متزبل و ريحتى خنازيرى يغسلنى و يبيضنى اكتر من الثلج و قبلها يحضنى بريحتى الزفت دى ويقع على عنقى و يقبلنى و ما يقرفش منى و بعدها يلبسنى الحلة الاولى و الخاتم فى صباعى .. بيحبنى
ضعيف انا ... يقول معلش اقوى ضعفه و اسنده .. بحبه ..ابنى .. حرميه يعنى
..بيحبنى "لكي يعطيكم بحسب غنى مجده أن تتأيدوا بالقوة بروحه في الإنسان الباطن" (أف3: 16)
يدافع عنى .. يعنى اذا كنت انت كاب لو شوفت ابنك بيتخانق فى الشارع اكيد مش حتسيبه .. هو كده بس ده مش بيفض خناقة .. لا .. ده بيقاتل .. و ينتصر لحسابى .. يسحق هو الشيطان تحت اقدامنا سريعا ..
وَإِلهُ السَّلاَمِ سَيَسْحَقُ الشَّيْطَانَ تَحْتَ أَرْجُلِكُمْ سَرِيعًا. نِعْمَةُ رَبِّنَا يَسُوعَ الْمَسِيحِ مَعَكُمْ. آمِينَ." (رو 16: 20)
يعنى يموت الحية و يفعص راسها و بعدين زى طفل مرعوب شايف التعبان و بيتنفض و يعيط .. قوم ابوه يشيله و يحط رجله فوق راسه الميت و يقول هييييييييييييييييه ( حط اسمك ) موت التعبان ... و يرفع ايدك منتصرا و يقوله دوس عليه ..دوس ..و كانه اللى موته ... و يصوره كمان
"الرب يقاتل عنكم وأنت تصمتون" (خر14: 14)
يوهبنا الحياة الابدية للى عاوز ..اكيد كلنا مش عاوزين نموت .. يقول انا الحياة و اوهبكم نفسى للى عاوز و ابدية هبة و عطية مجانية لاولاده .. اوع تفتكر اننا حناخدها بشوية صلاة و لا صوم و بطبق فول و لا شوية جهاد و ووصية مش عارفين حتى نمسك فيها لا كل اعمالنا دى بس بتقول لربنا احنا عاوزينك لكن اكيد مش بتساوى الابدية .. زى طفل صغير يروح و معاه جنيه و يديه لصاحب المحل و يقوله ادينى الشيكولاته الكبيرة دى .. يضحك الراجل و ياخد الجنيه و يشفق و يديهاله .. او طفل يكسر حصالته و ينزل منها عملات كتيرة بس يعنى ما يجيبوش 50 جنيه و يقول لابوه خدهم و هات لى اى فون و ابوه يضحك و يقوله ماشى هات و يديله الاى فون .. الابدية هبة .. بيحبنى
"هبة الله حياة أبدية" (رو6: 23). والرب يسوع المسيح نفسه قال: "لا تخف أيها القطيع الصغير لأن أباكم قد سر أن يعطيكم الملكوت" (لو12: 32).
لو ما فيش حد طايقك فى الدنيا و اقرب الناس شايفينك لا تطاق و لا تعاشر و فيك العبر و ديما غلط و رامين عليك كل الفشل واحباط ما بينتهيش و اللى بيبعد و اللى بيتحاشاك .. مش مهم ... سيبك و خد ركن كده و اقعد حط رجل على رجل و قول لنفسك .. فيه واحد قابلنى و بيحبنى زى ما انا كده ..يسوع .. و كل ما تغلط اقف و قوله لسه بتحبنى ؟ حتاخد ميت رد اه بحبك .. و كل ما تجوع و تعطش اساله لسه بتحبنى ؟ حيديك مية حقيقية و خبز حقيقى و يقولك بحبك .. و كل ما تحس بالتخلى و ما حدش حاسك و لا فاهمك و موجوع .. قوله لوحدى ما فيش حد فى ضهرى .. حتلاقية بيرد انا فى ضهرك و شايلك و بحبك ... بالذمة فيه كده يا ناس

[katea]

مشاركة جميلة جدااا
ربنا يبارك حياتك

[walaa farouk]

ميرسى على مرورك الغالى