تختار إيه ؟؟

[Rena Jesus]

كليك (Click) ده اسم فيلم شوفته مؤخراً .. حكايته بإختصار،
إن واحد كان دايماً بيتلخبط في ريموتات الأجهزة حواليه من كترهم ..
فقرر إنه يجيب ريموت متعدد الإستخدامات ..
وفي بحثه لقى واحد عرض عليه ريموت هايل وقاله إنه أحدث الإصدارات ..
وقاله له كمان إنه ببلاش .. فرح صاحبنا .. حاجة ببلاش كده ..
بس كان شرط البائع إنه مايرجعش .. فرد عليه صاحبنا وقاله،
ماتقلقش .. إستحالة هارجَّع حاجة ببلاش ..

المهم، كان فيه واحدة قريبتهم عمالة تتخانق وهو كان اتخنق منها ..
قال لنفسه، "آه لو الريموت ده يسكتها؟؟" ..
ومسكه وضغط mute واللي حصل طبعاً، انتم متخيلينه من كتر الافلام اللي شفناها ..
طبعاً الريموت عملها mute .. سكِّتها خالص يعني ..
إنبهر صاحبنا وإكتشف إن الريموت فيه إمكانيات كتييييرة تانية ..
يقدر يعمل skip للخناقات بينه وبين مراته ..
يعمل skip لزيارات اهله اللي شايفها مملة ..
أي حاجة مش عاجباه، ببساطة يضغط علي الزر ده، يقوم مفوِّتها ..
حتي المرض كمان يقدر يعمله skip ...

وفي يوم عمل skip لموقف في حياته واكتشف إنه فوِّت سنين كتييييرة لدرجة إن ولاده كبروا وماكانش عارفهم ..
ابتدى يتخض .. راح للبائع وقاله لا ياعم .. أنا عايز ارجعه ..
قاله "أسف، غير قابل للرجوع" ..
حاول يتخلص منه بكل الطرق يكسره، يحرقه، يرميه .. مفيش فايدة .. بيرجعله في الآخر .. مش بس كده ..
ده الريموت بقى أول مايجي موقف مشابه للمواقف اللي عمل لها skip قبل كده،
بقى يعملها من نفسه .. مش مستني رأي صاحبه ..
اتجنن صاحبنا وراح للبايع يشتكي له ..
البايع رد وقال الريموت اتبرمج بحسب اللي عملته قبل كده ولايمكن يتغير لإنك كررت الأمور دي كذا مرة ..

صاحبنا حاله اتغير .. فجأه لقى نفسه راجل عجوز وأحداث كتيرة في حياته وحياة عيلته وولاده مايعرفهاش ..
من الآخر، عمره خِلِص.. وطبعاً علشان ده فيلم، طلع إنه بيحلم ..
بس صحي من الحلم شاكر علي كل حاجة .. مراته وخناقاته معاها .. عياله وتعبه معاهم .. أهله والزيارات الروتينية .. استغلال مديره له وتأخير الترقية ..
قرر يعيش حياته لحظة بلحظة .. أيوه يعيشها لحظة بلحظة .. اصلها لما بتفوت، مابتتعوضش ..

تختار إيه ؟؟

الريموت وتعيش اللحظات السعيدة بس وتلغي كل اللي مش عاجبك حتي لو هايلغي سنين من عمرك؟؟
والَّا تعدِّل طريقة تفكيرك، وتجدد ذهنك وتبص للناس والأمور بمنظور تاني، وتعيش حياتك كلها ..
الموضوع كله بيبتدي ويخلص عند اختيارك تعيش حياتك إزاي ..
في رسالة افسس بيقول
"فانظروا كيف تسلكون بالتدقيق لا كجهلاء بل كحكماء مفتدين الوقت لأن الأيام شريرة .. من أجل ذلك لا تكونوا أغبياء بل فاهمين مشيئة الرب .. شاكرين كل حين على كل شئ في اسم ربنا يسوع المسيح" ..

ماجي سمير

[Mary Naeem]

فانظروا كيف تسلكون بالتدقيق لا كجهلاء بل كحكماء مفتدين الوقت لأن الأيام شريرة .. من أجل ذلك لا تكونوا أغبياء بل فاهمين مشيئة الرب .. شاكرين كل حين على كل شئ في اسم ربنا يسوع المسيح

رووووووووووعة حببتي
ربنا يفرح قلبك

[walaa farouk]

مشاركة جميلة
ربنا يفرح قلبك يا رينا

[Rena Jesus]

ميرسى لمروركم الغالى