لو عاوز ترجع موبايلك المسروق ادخل هنا

[walaa farouk]

*موبايلك إتسرق وبتتصل بيه مغلق ؟*

تمام أوى، سيبك من أى Application
ولا Find my Mobile ولا الهرى ده كله

كل ده مالهوش لازمة لأن اللى سرق الموبايل هايعمل له إعادة ضبط مصنع
وهايمسح أى Application ممكن تستخدمه لتتبع تليفونك

*لو عايز ترجع موبايلك ركز معايا*

الفكرة بتعتمد على الآتى لو إنت بعيد عن التكنولوجيا

١- لما بتجيب تليفون جديد وتركب فيه شريحة الخط بتاعك
بمجرد ماتفتح التليفون والشريحة تلقط شبكة بيتسجل السيريال
بتاع التليفون فى ثوانى على سيستم شركة الإتصالات اللى تابع ليها الخط بتاعك
وكل ماتغير الموبايل بأخر وتركب فيه نفس شريحتك بيتسجل السيريال بتاع الموبايل الجديد
يعنى كل الموبايلات اللى حطيت فيها خطك ولو لثوانى بيتسجل السيريال
بتاعها كلها فى سيستم الشركة اللى تابع ليها الخط

٢- كل أنظمة شركات المحمول لديها القدرة على تتبع أى خط تليفون
طالما موضوع فى الموبايل حتى ولو كان الموبايل مغلق بس البطارية مشحونة
وكمان ممكن يطلع تقرير سنوى بالمكان اللى كنت فيه فى أى ساعة فى أى يوم خلال السنة

مش بس كده .. أى مكالمة كنت بتتكلمها السيستم
يقدر يحدد مين اللى طالب المكالمة ومين المطلوب والمكان اللى كان فيه الطرفين
وقت إجراء المكالمة ولو المكالمة دى من شهور أو سنين
معنى كده إن بمجرد إن السارق أو الشخص اللى اشترى الموبايل من السارق
يحط شريحة خط جديد فى الموبايل هايظهر السيريال بتاع موبايلك على رقم الخط الجديد اللر ركبه السارق
وكده الخط هاييجى بطريقتين:

- لو الخط بتاع السارق قانونى ومتسجل بإسمه ورقمه القومى
هاييجى من قفاه بس بعد تقديم بلاغ وعمل محضر (فى شرطة المواصلات
مش فى أى قسم علشان تنجز وقت لأنها هاتتحول برضه لشرطة المواصلات)
برقم موبايلك ونوع الموبايل وأهم حاجة رقم سيريال الموبايل لأن ده اللى هايرجع لك الخط
وبيطلع إذن نيابة موجه لشركة الإتصالات بتتبع الموبايل من خلال رقم السيريال

- لو الخط بتاع السارق خط غير قانونى من غير بيانات بتقوم شركة الإتصالات
(بعد إذن النيابة) بمراقبة رقم السيريال الخاص بموبايلك وبمجرد ماتركب فيه شريحة السارق
أو أى شريحة جديدة بيحددوا مكان الموبايل بالقمر الصناعى
وأبراج الإتصالات حتى لو الموبايل مغلق كما ذكرنا سابقا
(ودى ميزة مهمة جدا بتستخدم فى تحديد أماكن الجناه فى حالات خطف الأشخاص أو سرقة السيارات)

*طيب بعد ماوضحنا استخدام التكنولوجيا فى إسترجاع الموبايل*
*إيه الإجراء اللى لازم أعمله:*

- ماتقدمش بلاغ وتعمل محضر فى القسم مباشرة.
علشان تكسب وقت تتوجه إلى قسم شرطة المواصلات (مباحث التليفونات)
اللى حضرتك تابع ليها طبقا لمقر إقامتك أو فى المحافظة اللى اتسرق فيها الموبايل لو كنت خارج محافظتك
وممكن تعرف مكان شرطة المواصلات بالإتصال على رقم ١٤٠ السنترال المركزى أو تتصل بالشرطة تسأل عليه
وغالبا بيبقى مكانها فى السنترالات ومحطات القطار

- ممكن تقدم بلاغك على صفحة تقديم البلاغات والشكاوى الإليكترونية على موقع وزارة الداخلية ودى بتتيح لك إنك تقدم الشكوى إلى ٤ جهات فى وزارة الداخلية وطبعا هانختار أول جهة شرطة النقل والمواصلات وإستجابتهم سريعة جدا

- قبل ماتتوجه لشرطة المواصلات لازم تبقى مجهز (أصل وصورة بطاقتك +
علبة التليفون الأصلية اللى عليها رقم السيريال+ صورة جانب العلبة اللى عليه البيانات والسيريال
+ أرقام الخطوط اللى استخدمتها فى التليفون قبل مايتسرق)
وبيعملوا لك محضر وبتاخد رقمه للمتابعة وبتنتظر لما يتصلوا بيك
وممكن الوقت يطول لحد شهر أو أكتر لأن العملية بتعتمد على إنتظار إن السارق يفتح الموبايل
ويركب فيه شريحة خط جديد علشان يعرفوا بيانات صاحب الخط أو يعرفوا مكان الموبايل إذا كان الخط بدون بيانات

- بمجرد مايتم تحديد مكان موبايلك والقبض على حامل التليفون
سواء كان السارق أو من اشتراه منه هاتلاقيهم بيكلموك علشان تروح تستلم موبايلك
وتقفل المحضر وتوقع أمام وكيل النيابة إنك استلمت موبايلك

*نصيحة أخيرة مالهاش علاقة بالموبايل:*
إحذر أن تترك كارت الفيزا الخاص بك ولو لثوانى لشخص لاتثق فيه
وخاصة إنه يشوف ظهر الكارت اللى عليه رقم الحماية الخاص بالكارت
Card Verification Value
المكون من ٣ أرقام أمام الرمز المكتوب CVV أو CVV2
لأنه ببساطه لو قدر يحفظ أو يكتب رقم الكارت وتاريخ الإنتهاء
اللى مكتوبين على الكارت من الأمام ودى حاجة مش محتاجة أكثر من دقيقة
يبقى ناقصه بس يعرف الأرقام الثلاثة اللى خلف الكارت
وبكده ممكن يشترى أى حاجة من على الإنترنت
وانت شايل الكارت فى جيبك فى حدود ١٠٠٠٠ إلى ٣٠٠٠٠ جنيه يوميا
طبقا لحدود الإستخدام اليومية للكارت داخل أو خارج البلاد

[Mary Naeem]

شكرا على المعلومات
ربنا يباركك

[walaa farouk]

ميرسى على مرورك الغالى