لماذا لم تتحول عصاة موسي الي اسد مثلا او سحلية او اي حاجة ... لماذا حية؟

[sama smsma]

لماذا لم تتحول عصاة موسي الي اسد مثلا او سحلية او اي حاجة ... لماذا حية؟!
2 فَقَالَ لَهُ الرَّبُّ: «مَا هذِهِ فِي يَدِكَ؟» فَقَالَ: «عَصًا».
3 فَقَالَ: «اطْرَحْهَا إِلَى الأَرْضِ». فَطَرَحَهَا إِلَى الأَرْضِ فَصَارَتْ حَيَّةً، فَهَرَبَ مُوسَى مِنْهَا.
4 ثُمَّ قَالَ الرَّبُّ لِمُوسَى: «مُدَّ يَدَكَ وَأَمْسِكْ بِذَنَبِهَا». فَمَدَّ يَدَهُ وَأَمْسَكَ بِهِ، فَصَارَتْ عَصًا فِي يَدِهِ.
حوار خيالي لم يحدث...
موسي ايه اللي في ايدك؟!
عصاية يارب
بتعمل بيها ايه يا موسي ؟!
بتسند عليها.. رجلي تقلت انا في التمانين دلوقتي و ما بقدرش امشي زي زمان في الرمل و رجلي بتغرس فبتسند عليها يعني اعتبرها يارب رجلي التالتة او سندي!!!
طب يا موسي انا حوريك بتتسند علي ايه... ارميها كده!!!
و صارت العصاة حية و فزع موسي... اشمعني حية... اللعنة اول ما اتقالت اتقالت علي الحية.. اتقالها من ربنا كده "ملعونة انتي"... و كمان فيه اية اتقالت فيها اللعنة " ملعون كل من يتكل علي ذراع بشر" ... شوف عكازك و ارميه كده.. حتلاقيه حية... بتتكل علي مال!! حية...سلطة!! حية.. سند ناس وقت الجد بيسيبوك...!!! حية... جمال... شوية و يروح!!! حية.... ذكاء... شوية لكن فيه الاذكي.. حية...
العالم الملعون ما يسندش والعالم وضع في الشرير اللي هو الحية.. طب و بعدين يارب حنعمل ايه؟؟؟؟
ربنا يقول لموسي امسك الحية كده من ديلها " ذنبها " ؟!
طب و هو فيه حد يمسك حية من ديلها؟! دي تلف حوالين ايدي و تلدغني.. الحية تتمسك من راسها..!!
طب امتي تتمسك من ديلها؟!
لما تبقي ميتة و مهشمة الراس...علشان كده اتقال نسلك يسحق راس الحية.. جه المسيح سحق الشيطان راس الحية.. علشان كده قال ثقوا انا قد غلبت العالم.. طب يارب انت غلبت العالم ده طبيعي لانك قدوس لكن احنا نعمل ايه؟! يرد ما هو انا غلبت العالم و بسلمهلكم مهزوم..بسلمكم الحية من ديلها.. تقدروا ترموها و تدوسوها و تسحقوها تحت اقدامكم سريعا.. الحية حكم الموت و علشان كده لما اترفعت الحية النحاسية ما تقالش بتدي شفاء قال في قصة تذمر شعب اسرائيل و ضربه بلدغات الحيات و العقارب ان كل اللي يرفع عينه الحية النحاسية ياخد حياة.. اللي يرفع عينه للمصلوب يعيش.. حتي لو اتلدغت من الحية و الخطية مسكت فيا.. ارفع عينك و خد حياة.. ما تتكلش علي عصاية مسيرها تنكسر و لا تحط عشمك حتي في اقرب الناس ليك لان ممكن ييجي عليهم وقت و يضعفوا و يضجروا... ياما ناس ربت و حطت كل تقلها علي ولادها اللي انشغل بحاله و اللي سافر و اللي ما استحملش يسند و اللي زهق من مرض مراته و لا زهقت من عجز جوزها و اللي معرفتش تسنده في وقت الضيق و لا عرف يسندها في وقت هي محتاجاه فيه... في الاخر حية.. الموت فيها حتي لو كانت ناعمة .. اتسند عليه و ارمي كل ثقلك عليه هو وحده يقدر ان يريحنا من كل ثقل و كل حمل.. هذا هو الحية النحاسية الذي قبل اللعنة بارادته ليرفع عنا حوجتنا لعصاة العالم
نبيل شحاتة

[Mary Naeem]

اتسند عليه و ارمي كل ثقلك عليه هو وحده يقدر ان يريحنا من كل ثقل و كل حمل.. هذا هو الحية النحاسية الذي قبل اللعنة بارادته ليرفع عنا حوجتنا لعصاة العالم

ربنا يباركك

[walaa farouk]

اتسند عليه و ارمي كل ثقلك عليه هو وحده يقدر ان يريحنا من كل ثقل و كل حمل.. هذا هو الحية النحاسية الذي قبل اللعنة بارادته ليرفع عنا حوجتنا لعصاة العالم

ربنا يبارك خدمتك

[Ramez5]

تأمل جميل
ربنا يبارك خدمتك

[sama smsma]

ربنا يفرح قلبكم