حساب خادم

[Mary Naeem]

حساب خادم

مات الخادم المشهور اللي كان قائد ف كتائب (حفاة الإيمان) و(أسود العقيدة) و(خلفاء أثناسيوس) وكام جروب تانيين من اللي فاكرين أن الله مستنيهم يدافعوا عنه .. ده غير أنه كان قائد فريق التسبيح ف كنيسته والمرنم ذو الصوت العذب والواعظ الناري والكارز اللي محصلش ومؤسس فريق كشافة الكنيسة ومدير الكانتين وشوية حاجات تانية كتير ..
روحه صعدت للسما لابسة جلابية بيضا وماسكة قيثارة لونها دهبي وعلى راسه هالة القديسين ..
بدأ الخادم يتخيل نفسه وهو بيدخل من بوابات الملكوت وبيقابل القديسين اللي سبقوه للسما والملايكة محاوطاه من كل جنب ف ايديهم ابواق هتاف وتسبيح وجو عالي جداً ..
فجأة قطع سيل التخيلات دي صوت من جنبه: أنت يا أخينا .. ياأبا .. ياأسطى ..
الخادم (يفتح عينيه): مين؟ مين حضرتك؟
صاحب الصوت: مين حضرتي؟ تفتكر لما تكون روحك طالعة السما ويقابلك واحد ف وسط السحاب ممكن يكون مين؟ محصل النور مثلاً؟ أنا ملاك وجي استقبلك ياعم
الخادم (ينتبه أن صاحب الصوت لابس أبيض ف أبيض وورا ضهرة جناحين): أيوة فعلاً عندك حق .. معليش سامحني أصلي كنت باتخيل شكل السما وكدة ..
الملاك: مش وقته ياسيدي .. لما تبقى تدخلها ابقى اتخيل براحتك .. دلوقتي لو سمحت ركز معايا شوية .. عاوزين ناخد منك شوية بيانات علشان نملا الفايل بتاعك
الخادم (بإستغراب): بيانات؟! فايل؟! أنا مش فاهم حاجة!!
الملاك (بنفاذ صبر): يووه .. هو أنا كل واحد أقابله هايقولي مش فاهم؟!! ياأخوانا أنا مش فاضي للكلام ده
الخادم: طب طول بالك عليا شوية .. أنا بس عاوز اعرف حضرتك عاوز مني إيه علشان اساعدك
الملاك: بص ياشاطر .. دلوقتي أنت داخل ع البوابات علشان تتحاسب وزي ما أنت شايف الزحمة والطوابير .. موسم بقى وكل سنة وأنت طيب .. (ويضحك بصوت عالي ومُريب)
الخادم: بوابات؟! حساب؟! طوابير؟! هو أنا طالع السما ولا طالع الساحل؟
الملاك: أنت هاتهزر ياخفيف؟ طب وحياتك لا اسيبك تتلطع ف الطابور وبرضة ف الأخر هاتجيلي وأبقى وريني بقى خفة دمك ساعتها
الخادم: صدقني مااقصدش اضايقك .. طب حقك عليا .. ارجوك سامحني وياريت بس تفهمني إيه اللي بيحصل؟
الملاك: ماشي .. هاعديها لك المرة دي علشان أول مرة .. بس لو استظرفت تاني مش هاسيبك .. بص يا سيدي .. احنا قررنا إننا ننزل ناخد بيانات الناس اللي طالعة ونجهز الفايل بتاعها علشان ماتاخدش وقت طويل ف الحساب وتدخل على طول .. سهلة كدة؟!
الخادم: أهاا .. كدة فهمت .. عاملين يعني زي لما تروح لدكتور كبير ف تعدي على كام واحد من مساعدينه الأول علشان يسجلوا بياناتك ويعملوا لك تحاليل ويكشفوا عليك كمان .. وف الأخر تدخل للدكتور يبص لك بصة بقرف ويكتب لك ع العلاج على طول من غير حتى ما يتكلم معاك
الملاك: أنت هاتستظرف تاني؟
الخادم: لأ صدقني .. أنا بس عاجبني النظام ده أوي حضرتك
الملاك: طيب ياأخويا .. (يخرج من جيبه آيباد ويبدأ يكتب عليه وهو بيتكلم مع الخادم) .. الاسم واللاست نيم .. السن والچندر؟
الخادم: هو مش حضراتكم ف السما عارفين كل الكلام ده؟
الملاك (يطوح الآيباد ناحية سحابة معدية من جنبه بغضب): لأ بقى .. ده مش شغل خالص .. دا أنا لسة بابتدي الشيفت .. وشكلك كدة هاتخليني أعملها معاك
الخادم (بخوف): آسف .. آسف .. أرجوك سامحني .. ثم حضرتك بتتعصب عليا بطريقة مش بتاعة ملايكة خالص
الملاك (بصوت مرعب): نعم ياحبيبي؟! أنت هاتعلمني اتكلم أزاي كمان؟؟ ماهو ده اللي ناقص .. بص يا ابني .. أنت شكلك لبط ومش هاتجيبها لبر معايا .. أنت بقى تتفضل على طابور ستة اللي هناك ده .. وأدي دقني لو دخلت ف يومك ده
الخادم: لأ بقى .. ده مش اسلوب معاملة ده حضرتك .. أنا زبون ومن حقي اخد خدمة تليق بمكاني .. ولو فضلت تعاملني كدة .. أنا هاضطر اشتكي للإدارة
الملاك (يهدأ فجأة على سيرة الإدارة): تشتكي؟ .. حبيب قلبي .. أنا باتنرفز عليك علشان مصلحتك .. عاوز اخلصك ع السخان ف تلحق تدخل بدري وتلاقي مكان مخصوص ف الVIP Lounge
الخادم (بعد ما احس بالتفوق اخيراً): إذا كان كدة معليش .. يلا حصل خير .. أنا كمان تحت أمرك ف كل اللي أنت عاوز تسأل عليه .. بس بسرعة علشان خاطري أصلي ابتديت ابرد .. أنا مش متعود ع الجلابية والساقعة داخلة لي من كل حتة
الملاك: حبيب قلبي .. ماتقلقش هاخد منك شوية بيانات بسرعة وهاسلكك عن طريق واحد حبيبي ع البوابة
(ويطلع آيباد جديد من جيبه ويبدأ يسجل بيانات الخادم وهما بيدردشوا مع بعض بإنسجام)
.....
وعلى الناحية التانية من السما وقف اتنين ملايكة بيتابعوا الموقف من بعيد ودار بينهم الحديث التالي:
ملاك ١: هو الشيطان مش هايبطل اشتغالاته ديه مع الناس اللي رايحة له قبل ما يدخلهم عنده؟ أنا مش فاهم ليه بيحب يحفل ع الجماعة دول بالتحديد؟ الاسبوع اللي فات برضة عمل نفس الحفلة ديه مع واحد من بتوع مؤتمرات (تفتيت العقيدة) .. ده غير المقلب اللي عمله ف الراجل بتاع (معموديتنا اطهر يابتوع المطهر)
ملاك ٢: ياسيدي .. أهو بيسلي وقته .. أحنا مالنا وماله!!

[walaa farouk]

ههههههههههههههه مشاركة جميلة اووووى يا مرمر
ربنا يفرح قلبك

[Mary Naeem]

شكرا على المرور