٢٠ معلومة مهمة للي بيفكر في الإرتباط.

[walaa farouk]

.

⁃ لو مش مرتاح لوحدك، مش هاترتاح لما ترتبط.

⁃ شريك حياتك معاهوش مفتاح سحري يحللك كل مشاكلك وصراعاتك. معظم اللي اعرفهم مرتبطين مش مبسوطين في حياتهم لأنهم تخيلوا أن الحل هو الجواز وطلعوا غلطانين في الاخر.

⁃ حل مشكلة "الوحدة" اللي ملازماك معتمد عليك بشكل كبير.. معتمد على انك تلاقي هدف تعيشله وحاجة تعملها، وانك تبني علاقة صح بينك وبين نفسك وبينك وبين الله..

⁃ مفيش بني ادم هايملى الفراغ في حياتك بالذات لو الفراغ ده من جواك .

⁃ لو ماعشتش كام سنة لوحدك تكتشف نفسك وميولك ومواهبك وطريقة حياتك وشخصيتك.. هاتفضل تايه وهاتتوّه الشخص اللي هاترتبط بيه.. عيش حياتك الاول وانجح فيها وبعد كدة شاركها مع حد تاني.

⁃ الصداقات والعلاقات "النضيفة" مع الجنس الاخر بتعمل توازُن شوية وتهدي الاحتياج المُلح للارتباط.

⁃ حاول تغيّر لغة صلواتك في الموضوع ده من "يارب ابعتلي شريك حياتي"، لـ "يارب جهزني عشان اكون شريك حياة مناسب".. من الاخر سيبك من الناس شوية، ركز علي نفسك وعلى نضوجك أنت الاول والباقي سهل.

⁃ ادمانك للعلاقات أو الجنس مش هايتحل بالجواز، ناس كتير بتتجوز وتفضل تعُك.. ادمانك بيتشفي في سكة تعافي وحرية بتمشيها قبل الجواز بكتير.

⁃ محدش هايتغيّر عشانك، وانت مش هاتتغيّر عشان حد.. دي فقاعة وهمية من المشاعر بتفرقع بعد اول كام شهر من العلاقة.. اللي فيه طبع مابيتغيرش (الا قليل اوي ولأسباب غير الارتباط).. من الاخر ماتحطش امل اوي على الموضوع ده، خد اللي قدامك على عيبه وماتحلمش كتير انك تغيره.. اللي عايز يتغير بيبقى عشان نفسه الاول.

⁃ تفكيرك الكتير في موضوع الحب والعلاقات والجواز مش هايقدم ولا يأخر حاجة.. ده بس هايضيعلك وقت المفروض كنت تستثمره في تغييرك ونضوج شخصيتك.

⁃ الجواز بدافع الاحتياج انانية.. لو داخل تتجوز عشان بس "محتاج" يبقى هاتعمل جريمة.. هاتخلّص على اللي معاك (على مشاعره ووقته وطاقته وحتى جسمه.. )، ابعد.. ده مش جواز ده جريمة قتل!

⁃ الجواز الصحي بيكون بس بدافع الحُب.. المشاركة.. الاخد والعطاء.. سكة نجاح وتشجيع، ورحلة الاتنين فيها بيسندوا بعض مش بيتغذوا على بعض ويكسروا بعض.

⁃ طريقة الجواز مبقتش تحدد نجاحه اوي، قصص حب فظيعة بتنتهي بجواز فاشل، وجواز هادي بسيط بيكمل بحياة سعيدة ومفرحة.. العبرة مش بالطريقة.. العبرة بالحب (حتى لو بعد الجواز).

⁃ كتر العلاقات العاطفية يمكن بيكبّر ويدي خبرة ايوة.. بس في نفس الوقت بيبهدل المشاعر ويسيب جروح في القلب ممكن تقعد سنين ماتتشفيش.. فا ماتستعجلش على كلمة "بحبك" عشان في تكلفة هاتتدفع.

⁃ الشخصية مهمة في الإختيار.. بس الشكل برضو مطلوب، بلاش تسامي وافلاطونية اوي ساعة الاختيار خليك واقعي.

⁃ بلاش تتذاكى وتورط ربنا في ارتباطك وتقوله "اختار أنت" على اساس انه كدة انت زنقته بقى فا اي حاجة تحصل يبقى هو اللي عاملها.. ده مش تسليم ده تكبير دماغ!

⁃ ربنا مش هايختارلك .. مش هايتصرف بالنيابة عنك صدقني.. ربنا بس هايكبّرك وينضّجك عشان تعرف تختار، وفي النهاية هايبارك اختيارك عشان الموضوع يكمل بنجاح.

⁃ نكررها للمرة المليون، الجواز برضو مش "قسمة ونصيب"، الجواز اختيار شخصي جداً انت اللي بتاخده بنفسك محدش هايخده بدالك (حتى ربنا)، فا خليك شجاع و اتتحمل نتايجه سواء خير أو شر.

⁃ كون الشخص اللي قدامك متدين أو روحاني ده حلو بس مش كفاية أو ضمان انه يكون شريك حياة كويس، بُص على الشخصية والأفعال مش على الكلام.

⁃ لو اللي قدامك شخص مش بيحترم الصداقة أو العلاقات البسيطة أو علاقته مش ثابته مع اهله، ماتتوقعش انه هايبقى ملاك معاك.. ده شخص زي ما بيقولوا كدة "بلا عهد".. هايقلب عليك في اي لحظة.

كفاية كدة..

[Rena Jesus]

معلومات مهمه جدااااااااااااااااا

ميرسى ربنا يبارك تعب محبتك

[walaa farouk]

ميرسى كتير على مرورك الغالى رينا

[Mary Naeem]

كون الشخص اللي قدامك متدين أو روحاني ده حلو بس مش كفاية أو ضمان انه يكون شريك حياة كويس، بُص على الشخصية والأفعال مش على الكلام.

[walaa farouk]

ميرسى على مرورك الغالى مرمر