كيف أثر مول مصر على أسعار العقارات المحيطة؟
"شقة للبيع في دريم لاند بجوار مول مصر بمليون و350 ألف جنيه"، "شقة بموقع ممتاز جداً من مول مصر بـ2 مليون و900 ألف جنيه"، "أرض بالتقسيط على 3 سنوات بجوار مول مصر على طريق الواحات بـ600 ألف جنيه".. أرقام خيالية لأسعار شقق وفيلات وأراضي يعلن عنها أصحابها على الانترنت بعد زيادتها مع مرور الوقت، وتحديداً منذ افتتاح مول مصر بمدينة 6 أكتوبر، الذي أثر على أسعار العقارات بالمنطقة، وزيادة أسعارها لأضعاف ثمنها.
حسرة يشعر بها محمود أحمد، بسبب الأسعار "اللي في الطالع" منذ إنشاء "مول مصر" بمنطقة 6 أكتوبر، فهو يرغب في شراء شقة بالقرب من طريق الواحات، لكن "الأسعار بقت نار" حسب وصفه: "بقالي 3 سنين بدور على شقة قبل ما مول مصر يتفتح، لكن الأسعار كانت كل يوم بحال وفي زيادة، ففكرت استنى شوية تكون العقارات سعرها قل، لقيتها باقت أضعاف ثمنها في 6 أكتوبر كلها بسبب إن مول مصر اتفتح اللي قريب وبعيد عنه"، من 1500 للمتر إلى 5 آلاف جنيه، فرق سعر الشقق بالمنطقة على مدار الـ3 سنوات الماضية، التي لاحظها الرجل الخمسيني أثناء بحثه عن شقة مناسبة، لكنه قرر ان يتنازل عن قرار الشراء بالمنطقة بأكملها: "بقيت ادخل على النت ومواقع البيع والشراء مش مصدق الأرقام اللي بشوفها وكل ده عشان مول اتفتح، أنا كان كل اللي معايا 350 ألف جنيه، دلوقتي ميجبوليش أوضة وصالة على المحارة بعد الأسعار اللي ولعت دي".
الأمر ذاته يؤكده منير رشاد، سمسار قديم بالمنطقة، موضحًا أن أسعار العقارات تأثرت بالمنطقة بسبب افتتاح مول مصر قبل أيام: "الشقة اللي بـ100 متر دلوقتي لو بعيدة عن مول مصر بقى يوصل ثمنها 300 ألف جنيه وعلى المحارة، المول فيه خدمات كتير وهايبر كبير وأماكن ترفيه، عشان كدة وجوده خلى أسعار العقارات باقت كل يوم في زيادة"، الرجل الذي يعمل سمسارًا بالمنطقة فوق الـ10 سنوات يشير إلى تفاوت الأسعار حسب المساحة والقرب من المول الجديد وأنها تأثرت كثيرًا وخصوصاً بعد افتتاحه: "قبل ما يتفتح كانت الأسعار في زيادة بس مش لدرجة الفروق دي كلها من بعد ما المول اتفتح، في أراضي للبيع زادت 5 أضعافها بنسبة أكتر من 50% والناس مبقتش تشتري زي الأول".
07 - 03 - 2017, 02:39 PM
العرض العادي
