"بتقول لنفسك إيه؟" ..
٥ ادوات للتحرر من حديث النفس المتعب..
السعادة معادلة مكعبلة ليها اسباب و مكونات كتير! من اهم اسبابها القدرة على تكوين علاقات صحية مع الناس و الاحداث..
و من اهم انواع العلاقات دي هي علاقتك مع نفسك و الحديث اللي بيدور جواك...
يعني بالبلدي؛ "بتقول لنفسك إيه؟"
شوية معلومات مهمة:
-اللي بنقوله لنفسنا و بنعيده كتير بنصدقه و بيبقى حقيقة و عقيدة بتشكل قراراتنا و ردود افعالنا
-اللي بنقوله لنفسنا هو المسئول الأول عن مدى قدرتنا على التواصل مع الناس و الحياة اللي بنعيشها و بالتالي عن جودة الحياة دي!
-اللي بنقوله لنفسنا أحياناً مابيبقاش داخل منطقة الوعي (يعني ما بنبقاش واخدين بالنا منه)
-اللي بنقوله لنفسنا سواء صح أو غلط بيبقى تأثيره أقوى على حياتنا بكتير من أي حقيقة مجرده!
... طب ازاي بقى اتحكم في اللي بقوله لنفسي و اظبطه بطريقة تخليه مفيد و مشجع ليا؟
خمس تدريبات عملية لتحقيق التحكم ده؛
١- اظبط المحطة Tune your Radio:
عقلك عامل زي الراديو!
لازم تظبطه عشان يلقط المحطة اللي انت عايز تسمعها!
ظبط دماغك على الصح عن طريق انك تكتب لنفسك اسئله توجه دماغك للايجابيات و ترد عليها بالكتابة برضه..
(نفسي اعمل ايه؟ ايه احسن خطوة ممكن اخدها دلوقتي؟ لو حبيت اغير حاجة في حياتي حتبقى ايه؟ ... الخ)
الاسئلة الصح اهم سبب للاجابات الصح
٢- عيش في الدور Act as if
العلاقة بين حالة الجسم و الحالة المعنوية علاقة اقوى مما تتصور ..
جرب كده تمثل الشعور اللي انت عايز توصل ليه.. اسأل نفسك هو انا لو حاسس ب.....
كذا (الشجاعة او السعادة او الراحة او اللي انت عايزه)..
حابقى قاعد ازاي و ماشي ازاي؟ و بتكلم ازاي؟ و صوتي عامل ازاي ؟ و اعمل الحاجات دي فعلاً..
بعد دقايق شعورك حيبقى زي الاحساس اللي انت بتحاول تمثله ..
(ده علم مش سحر على فكرة)
٣- اكتب عن سعادتك و آمالك
Log your positive emotions and hopes
اخر كل يوم اكتب ٣ حاجات اتبسط بيهم في يومك و أمل واحد بتتمناه يحصل بكره
٤- نضف دماغك
Keep your mental hygiene
الاهتمام بالنظافة مهم جداً للصحة.. و برضه الاهتمام بنظافة الدماغ
زي ما بتغسل سنانك كذا مره في اليوم اغسل دماغك كمان..
نضفها من الشوائب اللي جوه و امنع عنها المصايب اللي جايه من بره.
اقرا حاجه مفيده، اسمع حاجة مهمة، نقي الناس اللي بتقعد معاهم حسب رقي لغتهم و اخلاقهم،
ركز في اللي بتقوله و خلي لغتك لغة قوية و محترمة و تجنب اللغو و الاخبااااااار الكتيييييير و مصادرها
٥- الصمت و السكون Silence & Stillness
درب نفسك على الصمت و السكون (عدم الحركة) ..
اتنفس و ركز مع تنفسك و لاحظ الحديث اللي بيحصل جواك من غير ما تحكم عليه..
سيب الكلام ييجي و يمشي لوحدة و كأنك حد بيتفرج من بره..
اعمل كده لمدة ١٠ دقايق كل يوم .. مهما كانت قوة الحديث جواك لما تمرن نفسك على الصمت و السكون بتقدر تكسر النمط thinking pattern و بتكتشف اتجاهات جديدة في التفكير.
جرب الطرق دي او بعضها لو محتاج و شارك بتجربتك لو حبيت
cpd
