كنزك فى ولادك ...........

[Rena Jesus]

يولد الطفل وقد منحه الله قدرات وصفات تميزه عن الآخرين.
ومهما تشابه الأفراد والأخوة تظل السمات والفروق الفردية هي السمة المميزة لكل شخصية
إذ أن شخصية الفرد تتكون من مزيج من الفروق الفردية والبيئة المحيطة به.
وإن كانت الفروق الفردية الخاصة بكل فرد هبة الخالق للإنسان فمثلاً نجد الشاعر.. أو الموسيقي.. أو الرسام.. الخ،
إلا أن "التربية" تُعد من إحـدى عناصر البيئة المحيطة بالطفـل والتي تؤثر في نموه وتكوين شخصيته إلى حد كبير.

فالتربية هي مسئولية الأبوين معاً التي قد تؤثر بالسلب أو الإيجاب على السمات الفردية الموهوبة للطفل.


معانا هنا فى الموضوع ده هنتكلم عن
القيم الحلوه اللى مفتقدينها الأيام دى واللى المفروض نزرعها فى ولادنا
كمان هنتكلم عن الأساليب الغلط اللى ممكن نكون بنستعملها فى تربية ولادهم

يعنى هنتكلم عن ازاى نربى ولادنا صح !!!

[Rena Jesus]

القيمه رقم (1)



حسسي ولادك قد ايه أن نعمة لمة العيله لا تقدر بثمن.
قوليلهم انك بتستني المناسبات والأعياد عشان تتجمعي مع أهلك وعمامك وقرايبك.
اتكلمي بفرحه وانتي بتجهزي لعزومة أي حد من قرايبكم.
واسألي ولادك نقدر نعمل ايه عشان نفرحهم
زي مثلاً اكلة معينة حد من قرايبك بيحبها.

عوديهم على محبة العيله من صغرهم عشان اما يكبروا يفضلوا مرتبطين بيهم
ويحطوا الاجتماعات العائلية ضمن اولوياتهم وميتأخروش عليها أبداً.
على فكره ده هيرجع عليكى برضو كأم وعليك كأب
عشان لما يكبروا ويبقى ليهم حياه مستقله يفتكروكم ويسألوا عليكم

[Rena Jesus]

القيمه رقم (2)



عودى ولادك على استشعار نعم ربنا علينا.
العيلة نعمة، و البيت نعمة، و الأكل نعمة، و الحضن نعمة.
كل ما تشوفى حاجة جميلة امدحي فيها و بيني انبساطك بيها
و قولي أشكرك يارب او شوفوا الحاجات الحلوه اللى ربنا ادهالنا.
قولي لاولادك ان الرضا والقناعة احلى حاجة في الدنيا و هتحسسك انك أغنى الناس.
املي البيت تفاؤل وايجابية وخلي ولادك يتشربوا من الروح الحلوة اللي هتملى المكان
لأنه كما قال مار اسحق السرياني ليست عطية بلا زيادة إلا التي بلا شكر.

[Rena Jesus]

القيمة رقم (3)



مفيش احلى من انك تغرسي في ولادك حب الناس.
خليهم يعرفوا ان الحاجات البسيطة زي انهم يجيوا كوباية مياه لباباهم
أو يساعدوكى فى شغل البيت
أو يشتروا حاجة حلوة لأخواتهم ليها اثر كبير وبتفرح جدا.
قوليلهم ان ربنا يفرح بينا لما نفرح الناس ونساعدهم ونحبهم
وزى ما قال الكتاب المقدس
" يَا أَوْلاَدِي، لاَ نُحِبَّ بِالْكَلاَمِ وَلاَ بِاللِّسَانِ، بَلْ بِالْعَمَلِ وَالْحَقِّ! "

[Rena Jesus]

القيمة رقم (4)



حاولي دايماً تكوني موجودة مع ولادك وتشجعيهم على أي حاجة بيعملوها سواء كانت رسمة بيرسموها أو نشاط بيحبوا يعملوه.
حفزيهم على الابداع و الخيال واقبلي اي هواية بيحبوها زي ما هي من غير تعليق أو تعديل.
فهميهم ان كل الناس مختلفين في اهتماماتهم وهواياتهم و مش لازم خالص نكون متفقين معاهم في كل حاجة بس لازم نحترم اختيارهم ونحترم رأيهم

[Rena Jesus]

القيمه رقم (5)



كبري من دور الأب في البيت و عظمي من شأنه.
فهميهم ان بابا بيفكر فيهم و بيقلق عليهم وبيتمنى دايماً ليهم احسن حياة.
فكريهم ان دور الأب مش مقتصر أبداً على الصرف على أهل البيت و بس
ده هو اللي بيدافع عننا و بيفسحنا و بيطبطب علينا أما نزعل.
خليهم يتصلوا بيه اما يغيب في الشغل وخليهم يساعدوكي يجيبوله هدايا في المناسبات
عشان يفضل في بالهم على طول ويفضلوا مرتبطين بيه لحد ما يكبروا.

[Rena Jesus]

القيمة رقم (6)




احنا ليه بنذاكر؟ ليه بنتعلم؟
عشان ربنا هيحبنا لما نذاكر ونبقى شطار ويفرح بينا
الناس اللي بتشكر ربنا على نعمة العقل بأنها تتفكر و تستنتج وتستفيد بالعلم والمعرفة وتعلم غيرها وتنفعهم بالشغل النافع دول ربنا بيفرح بيهم جدا.
عشان العلم ده بحر ملوش حدود كل يوم بتكتشف حاجة جديدة وممتع جدا اما نتعلمه صح ونطبقه بجد.
لو كل طفل قدر يبص للعلم على انه كنز لازم نحافظ عليه اكيد هيتغير مفهوم الولاد للمذاكرة والقراءة مش هيحسوا بالضغط تاني.

[Rena Jesus]

القيمة رقم (7)



أوعي تنسي ان علاقة الأب و الأم ببعض كل ما كان فيها تفاهم و ود كل ما حسوا ولادك بالراحة النفسية و العقلية أكتر.
أما يلاقوا ان مامتهم و باباهم بيعاملوا بعض كويس ده كفيل انه يعمل جواهم استقرار عاطفي و يخليهم مش خايفين من العالم الخارجي أو التعامل مع ظروف الحياة المختلفة.
اما يحسوا ان أهم شخصين في حياتهم مرتاحين و مبسوطين سوا أكيد ثقتهم بنفسهم هتزيد وهيتعلموا ويبدعوا بحرية و تزيد قدرتهم على العطاء.

[Rena Jesus]

القيمة رقم (8)



أما يكون ابنك أو بنتك معاكي في لمة للعيلة أو للصحاب انتقي كلامك بحذر.
ابعدي كل البعد عن الأدانه والنميمة والكلام الجارح حتى لو بهزار.
متقوليش هو صغير و مش هيفهم بالعكس الطفل بيراقب كل كبيرة وصغيرة بيشوفها من أهله وبيمتص الأسلوب والمعاملة حتى لو بطريقة مش مباشرة.
صدقيني أما تلاقيه بيتريق على حد مثلا أو بيهزر باسلوب مش حلو اعرفي على طول ان ده سلوك مكتسب من جلسة حضرها في يوم من الأيام.
استغلي القعدات اللي زي دي انك تعلمي ابنك اسلوب الحوار لو منفعش تسيطري تماما على الحديث اطلبي منه يقوم يلعب أو متاخديهوش معاكي لو أمكن.

[Rena Jesus]

القيمة رقم (9)



عايزة ولادك يساعدوا في البيت من غير ما صوتك يتنبح و قلبك يوجعك من كتر الطلب؟
بصي يا ستي.
أولا لازم تبتدي تعليمهم الترتيب من و هما صغيرين
يعني والبيبي عنده سنتين اديله اللعب في ايده عشان يرجعها مكانها.
بلاش تأمري طفلك بالتنظيف والأحسن تقوليله يللا ايدك معايا في الكنس مثلا.
شوفي حاجة هو بيعرف يعملها حلو وامدحي فيه
(حبيبة ماما احسن واحده تجهز السفرة في البيت)
والأحلى بقى انك تمدحيه قدام اهلك والضيوف عشان يحس بالتمكن.
راعي لو في وقت هو مشغول او تعبان فيه وبلاش تتقلي عليه لو مش قادر.
وأهم حاجة اوعي يشوفك متذمرة من شغل البيت لأن ده بيخلي عنده اعتقاد دايم ان دي حاجة صعبة
فبالتالي بينفر منها.