شَرَّفتى يا عَدرا كلمات رمزى بشارة

[بنتك يايسوع]

رداً على كل من يُشَكِّك فى تجليَّات السَّيدَه العَذراء

قال إيه بيقولوا مفيش لا تَجَلِّى وَلاظهورات
وإن القسيس حَب يجمَّع حَبِّة جِنيهات
قام قال هُبَّه ... بُصُّوا يا ناس العَدرا آهيَّة فُوق القُبَّه
بَعد ما جاب واحد بالليزر يِعمل حَرَكات

طَب آهيه مش سايبَه مكان إلاَّ وِبتِظهَر فِيه
المُسلِم جانب أخوه القِبطى شاف زَيِّه
ليه الإنكار ... رُوحوا وشُوفوا بنَفسُكوا قبَّل أمَّا تاخدوا قَرار
دى مش خُرافات هاتوا دليلكُم عاالإتِّهامات

قال إيه بيقولوا دى إشاعَه وبلاش مِنها
دى واحده وماتِت إدعوا لها الله يِرحَمها
نِسيوا المكتوب ... إله إبراهيم وإله إسحَق وإلَه يعقُوب
والرَّب إلهنا إله أحياء. ومش أموات

العَدرا وكُل القِدِّيسين فى السَّما عايشين
أرواح نورانِيَّه قُدَّام عَرش الله ساجدِين
آه هُمَّ صَحيح ... وَيَّا المَلايكه مَشغولين قَوى بالتَّسبيح
بَس يسُوع بيبَلَّغهم مين طالِب صَلوات

طَبعاً داخلين السَّما بِيسُوع وِبفَضل الدَّم
القِدِّيسين دول مابيِمحُوش خَطايانا يا عَم
بَس المَوضُوع ... إن صلاتهُم عَنا مَقبُولَه عَند يسُوع
ده البار طِلبِتُه قادرَه وِبتِعمِل مُعجِزات

العَدرا آهيه باينَه وظاهرَه قُدَّام النَّاس
فى مكان وإتنين وِفـ عَشَرَه مِش فى مَكان وِخلاص
وحَمام مِن نُور ... فُوق الكنيسه وعا القُبَّه عَمَّال بيدُور
العَدرا جايَّه وجايبَه بَرَكَه وتَعزِيَّات

ياما ناس لَمَّا تشُوفِك هَتمَجِّد إسم الله
هَيقَرَّبُوا لِكنِيستُه وِهَيِرجَع ياما خُطاه
وِفى ناس تانيين ... مش فارقَه معاهُم وقلوبهُم قاسيه وجاحدين
إنتى ظهورِك بَرَكَه للى عايز بَرَكات

شُفتى ولادِك مِن مُدَّه كبيره مِتضايقين
أزمَه إقتِصادِيَّه وغَلا قال يعنى إحنا ناقصين
قُلتى أزورهُم ... وأخفِّف عَنهُم أفَرَّحهُم وِسط هُمومهُم
شَرَّفتى يا عَدرا دى زيارتِك أحلى الزِّيارات

شُفتى ولادِك مِن فَتره عايشين فى إضطهادات
حَنِّيتى لدموع إللى إتظَلَموا من الأقباط
جيتى تواسى ... جيتى تعَزِّى إللى تَعبان وإللى مقاسى
جيتى تفَرَّحى إللى فـ هَمُّه بيقُوم ويبات

وللا إنتى شُفتى حاجات أصعَب لِسَّه هَتِحصَل
ماهو إبنِك هو الله وبيشُوف المُستَقبَل
قال لِك يا بتُول ... شَجَّعى أولادى عَشان الضِّيقَه لَمَّا تطول
يفضَلوا ثابتين فى إيمانهم فى أشَد الأزَمات

على كُل الأحوال بزيارتِك فَرَّحتينا
يا أمُ النُّور يا حَبيبتى إنتى وَحَشتينا
مَصر دى بَلَدِك ... ما إنتى جيتيها وباركتيها زَمان مَع وَلَدِك
يا غاليه ماتحرِمِناش مـ البَرَكَه ومـ الشَّفاعات


للشَّاعر رمزى بشاره

[بنت معلم الاجيال]

بركة العدرا مريم تكون معانا جميعا
ميرسي يا بنتك يا يسوع
ربنا يعوض تعب محبتك

[بنتك يايسوع]

ميرسي كتيييييير للمرور الجميل