10 نصايح عشان تكون gentleman وتكوني lady

[Mary Naeem]

10 نصايح عشان تكون gentleman وتكوني lady

نقدم لكم الخطوات العملية لتكون جينتمان وتكوني ليدي ..

1- كلمات "قشطة" و "فاكس" و "بيئة" و "حلقلي"
وكل ما يشبه هذه الكلمات بصراحة مش حلوة ابدا ابدا.
الشتايم ممنوعة منعا باتا و لو بهزار.
مافيش واحدة تقول لصحبتها "يا كلبة"
ولا واحد يهزر مع صحبه يقوله "يا متخلف".
أفشات الافلام مش كلها ينفع تتقال.
لو حاجة ظريفة فعلا و مناسبة و مفيهاش عيب ممكن.
أغاني المهرجانات اكترها بتكون كلماتها مؤذية قوي ..
ولما بتشغلوها في الافراح بنبقى قاعدين متضايقين.
2- احترم مواعيدك. لو قلت حتقابل حد الساعة 10 مثلا...
حاتحسب وقت المشوار ووقت اللبس وتزود 5 دقايق احتياطي.
لو عندكم أطفال حتزودوا الوقت الاحتياطي بحوالي ربع او نص ساعة.
لو لاقيت نفسك حتتأخر بتبعت رسالة أو تتكلم تقول للشخص
"سامحني حتأخر ربع ساعة عن الميعاد"
3- لما تكون مع ناس أكبر منك ماتمشيش قدامهم.
صوتك ميبقاش اعلى من صوتهم. متقاطعش.
ماتستخدمش ايديك كتير و بالخصوص ممنوع تشاور بصابعك.
ماتحطش رجلك ناحيتهم. حس بإحتياجتهم و قدمهالهم من قبل ما يطلبوا.
"اجيب لحضرتك مية" "حضرتك مرتاح و لا اجيبلك خدادية كمان؟"
4- في أي قعدة مع ناس ..
خلي الموبايل يبقى في جيبك او في الشنطة ماتفتحوش.
ويفضل تقفل الانترنت. وأي مكالمة مش ضرورية ما تردش عليها.
لأن معنى انشغالك بالموبايل إن الناس اللي بتكلمهم علي الموبايل ..
أهم من اللي انت قاعد معاهم. بتبقى حاجة تدايق جدا ..
حتى لو الناس اللي انت قاعد معاهم مابينوش ده.
5- متتكلمش عن نفسك كتير...محدش بيحب المغرور...
خليك متواضع. اسمع بتركيز. متتكلمش وحش عن الناس ابدا...
لا تتدخل فيما لا يعنيك. خليك طاقة ايجابية
بلاش دايما تشغّل شريط "الناس وحشة... البلد تقرف... الشغل يفرس".
6- الاخلاق مش للمظهرة لكن هي طبع مستمر.
يعني مثلا احنا مش نقول "حضرتك" لبابا وماما بس ..
لكن نقول حضرتك للبواب لو كان اكبر مننا ..
و للموظف اللي بيخلصلنا حاجتنا.
احنا مش بس نقدم الاكل بشكل حلو لضيوفنا...
و لكن كمان للشغالة و للسواق.
احنا مش بس نقوم من مكاننا لحد كبير من قرايبنا ...
احنا نقوم في المترو لاي واحدة او اي راجل شكله تعبان.
7- في ناس كتير في مصر بتقول عكس اللي حقوله دلوقتي
بس لما حد يديك هدية الأحسن إنك تفتحها قدامه مش تركنها
(الا لو في ضيوف تانيين عشان ماتحرجهمش.
في الحالة دي حتكلمهم بعدها و تشكرهم).
بس لو لوحدكم تفتح الهدية و تشكر فيها و تبينلهم فرحتك بيها...
بشياكة طبعا من غير مبالغة.
8- للرجال بالذات: اهتم بمظهرك و نضافتك دائما. و المظهر الجميل
مش معناه قميص Tommy Hilfiger و شنطة michael kors.... خالص.
معناه قميص نضيف مكوي و جزمة متلمعة و شعر متسرح
و هدوم متناسقة ومناسبة للمكان و الزمان اللي انت فيه.
9- لا تصيح وتفقد أعصابك وقت غضبك.
اختار كلماتك كويس جدا وقت الزعل ..
و اعرف ازاي توقف الناس عند حدودهم
من غير ما تقول اي كلمة مش مناسبة.
و افتكر ان في كتير من الأحيان السكوت بيكون أفضل رد.
10- كن مثقف. إقرأ كتب تطورك و تفهمك الدنيا.
اتعلم من كل الناس مهما كانت مكانتهم الاجتماعية أو عمرهم.

[Rena Jesus]

موضوع جميل ربنا يباركك

[Mary Naeem]

شكرا على المرور