يسوع معايَّ {كُلَّ الأيّامِ}

[walaa farouk]

ساعة كاملة أمبارح بافكر في آية واحدة من كلمات يسوع:
«وها أنا معكُمْ كُلَّ الأيّامِ إلَى انقِضاءِ الدَّهرِ»
بافكر في كلمتين بس فيهم: {كُلَّ الأيّامِ}
الكلمة دي تعني كل الأيام في حياتي
الأيام الصعبة والأيام العادية وأيام الفرح وأيام الحزن.. كله...

وبعدين بعد ما قعدت نص ساعة صلاة وتفكير في الكلمتين دول:
قلت أفتح الكتاب أقلب عن الأيام اللي جات في الكتاب المقدس
عن الأيام في حياتي ولقيت الشوية الجايين دول:
يوم الشر
يوم التجربة
يومَ القِتالِ
يومِ ضيقي
يومِ خَوْفي
اليوم الشرير
يومِ بَليَّتي
......
وفي كمان يومِ عيدِ
يوم فرح
يوم بشارة
يومُ خَلاصٍ..

والقايمة تطول من أنواع الأيام اللي بنعدي بيها،
وممكن تضيف ليهم أنت كمان سواء أيام في آيات كتابية
أو أيام بتعدي فيها شخصيًا

لكن يا صديقي اليقين الوحيد اللي عندي
وأقدر أقولهولك كلمات السيد المسيح بنفسه
: واللي هي من أشهر الكلمات اللي قالها لينا:
«وها أنا معكُمْ كُلَّ الأيّامِ إلَى انقِضاءِ الدَّهرِ» وحط تحت {كل}
دي ميت خط

معرفش النهارده يومك شكله أيه؛ لكني أعرف أنه هو معاك.

ماعرفش بكرة الحقيقة أنا شخصيًا يومي
هيكون عامل أيه بس عارف حاجة واحدة
يسوع معايَّ {كُلَّ الأيّامِ}