بيراقب توهاني

[walaa farouk]

من المشاعر الصعبة اللى ممكن نعدى بيها هو احساس التوهان
هو انك تحس انك تايهة فى نفسك،

انا عندى عيب انى مش بعرف احفظ الاتجاهات فبتوه
مش بس فى الاماكن الجديدة اللى بروحها
ولكن فى اماكن ببقى عارفاها وروحتها كتير
لكن انا بنسى انا جاية منين او اروح ازاى فبتوه،

حتى صحابى دايما بيكلمونى انتى كويسة ؟ انتى وصلتى ؟
توهتى ولا لا ؟
احساس فعلا صعب،

لكن الاصعب انك تحس انك تايهه اصلا فى حياتك
فاوقات نحس اننا تايهين عننا هو انا مين ؟
هو انا عايش لية هنا اصلا ؟ هو انا المفروض اعمل اية ؟
وكمان ممكن تحس ان فى حاجه المفروض تعملها لكن انت مش عارف تعملها ازاى ؟

والتوهان بين الصح والغلط فاسمع ناس تقول دة صح اوى
ودة غلط اوى
واتوه فى علاقاتى هى صح علشان هى جميلة ومثمرة فى حياتى
ولا هى مش فى مكانها الصح وانا مش مرتاح ..

والتوهان الاصعب انى احس انى تايهه عن ربنا مش عارف اتكلم ومش عارف اصلى
ومش عارف اروحله حتى لو وسط الكنيسة او وسط الناس
اللى بيحبونى .....

لكن تخيل وسط التوهان دة حد يقولى ان فى حد مراقبك وانت تايهه
وبيقولك اطمن انت هتوصل

فى مزمور 56 :8
" تيهانى راقبت .اجعل انت دموعى فى زقك .أما هى فى سفرك "
يارب انت فعلا انت بتراقب توهانى.. فبيقولى اة انا براقب توهانك
وانا استغربت توهانى وفى الاية دة مش بس بيراقب خطواتى فى سكتى معاه
لكن بيراقب توهانى والحلو كمان انه بيستخدم وقت توهانى دة
وانه يشكل فيا وفى شخصيتى اكتر
افتكر ( ان صراعنا وتوهانا ودموعنا
دة جزء من اننا بنى ادمين محدودين ) ✨👌