انا خلقتك لهدف سماوي

[walaa farouk]

وفجاءه في عز الوحده
ووجع الشِده
وانك مش عارف تنطق والاصوات كلها حواليك ماليانه حِده
فجاءه يجي صوت يسوع من غير سابق انذار
يقولي مالك دموعك مش واقفه ليه اكنك في نار
ويفضل صوته يزيد في وداني
والاقي نفسي قفلت كل الاصوات اللي حواليا وثبت في مكاني
واقوله يسوع انت هنا انا عارفك
ايوه دي طريقه كلامك وهمسك
هو انت حاسس للدرجادي بالوجع اللي بيقولوا عنه انه صغير
هو انت جاي مخصوص علي ألم فيا وجاي تقولي مالك متغير
لا يا يسوع ده انت تيجي في حوار كبير
الامر اللي انا فيه اخرته احط مخدتي علي وشي وابكي علي السرير
لا يا يسوع وجعي مش من مقامك
وجعي مايستاهلش حتي كلامك
الاقيه فجاءه اكنه عينه حضنت عنيا
ويقولي وجعك الصغير ده مسمار فيا
عاوز تبكي ابكي انا معاك
عاوز تصرخ عاوز حتي تعاتبني انا بردو وياك
قولتله هو انت شايف وحاسس احضني وخلي الكلام ليا
قالي يبقي اتشدد وارمي حملك عليا
انا خلقتك لهدف سماوي
عارف مش هاتلاقي راحه ولا لاوجاعك معاني
وعارف ان بسبب قلبك انت في الدنيا هاتعاني
لكن لازم تعرف ان روحي فيك وهاديك قوه تاني
بس انت دلوقتي اسكت في حضني وبص وسط الشوارع
هاتلاقي لسه ناس الروح فيهم ضايع
قوم علشانهم انا خلقتك علشان عني تكلمهم