بالنسبالنا غلطة لكن بالنسبه لربنا خطه

[walaa farouk]

راجل مبروك مشهور بدعواته الحلوة اللي بيتحقق اغلبها
لما حد يعدي من عليه ويقوله ادعيلي
مره يقول يارب تنجح
ومره يارب تتجوز
ومره ربنا يرزقكم بطفل صغير
ومره ربنا يفرح قلبك
كان فيه شخص كل لما يعدي عليه ،
ويقوله بدور على شغل وعندي انترفيو
كان الراجل يدعيله دعوة غريبه
كان يقوله روح يابني يارب تغلط
الولد استغرب الدعوة ، فقال هاعدي عليه تاني يوم
واركز هو بيقول ايه بالظبط
عدى عليه وسمع الراجل بيقوله روح يابني يارب تغلط

صاحبنا اتضايق جداً وقرر مايعديش من قدامه تاني

يفوت اسبوع وتليفونه يرن
، ويلاقي حد بيقوله تعالى استلم شغلك
في شركة المحاسبه الفولانيه
شركه كان بيحلم بيها
لكن استغرب جداً
لانه بعت ال cv لشركات كتير مالهاش علاقه بالمحاسبه لكنها ليها علاقه بكورسات في برامج تانيه قعد ياخدها سنين علشان يقدم بيها على شغل لما لقى ال cv بتاع المحاسبه مكنش جايب نتيجه

رجع للميل اللي بعته ، اكتشف انه غلط وبعت ال cv القديم اللي فيه مؤهله ، واللي مالقاش بيه شغل من اكتر من سنه

استغرب جداً من اللي حصل ، لكن ساعتها فهم الدعوة
روح يابني يارب تغلط

مش كل غلطه بنغلطها بتكون نهاية الحياة
اوقات بتكون بدايتها

وامثله كتيرة بتأكد ده
ياما غلط ناس فتح عينيهم على حقايق مكنوش شايفنها

لو الصح هايشتتنا ، فربنا يحط في طريقنا الغلطه الغير مقصودة اللي تصحح مسارنا

ماتجلدش نفسك على كل غلطه في حياتك
ربنا قادر يغير مسارك بسببها

لانها بالنسبالنا غلطة ، لكن بالنسبه لربنا خطه
وخطط ربنا كلها للخير ❤️