خَفِّفْ عَنْ نَفْسِكَ

[walaa farouk]

ما تاخدش الدنيا علي كتفك و "تتكعبل" تحتها ، كله خلليه بالراحة ..
و ده تعمله في كل حاجة علشان صحة نفسك و سلامة قراراتك و راحة بالك ، علشان "بطاريتك " ما تفضاش !!

لو كله خدته علي قلبك كده ، ح تقعد "تاكل في اعصابك" لغاية ما تفلس نفسيا و صحيا ، و في الآخر صدقني كل حاجة ليها حل ، و "كله محصل بعضه" ..

حد مزعلك؟؟ ما تزعلش قوي و لا تقعد تشتكي لكل من هب و دب ، و لا تسهر مقهور و مكسور ..
سيب الموضوع شوية و اهدي ، و شوف قلبك رايح بيك علي فين : حاولت تصلح و نفع ماشي ، العتاب و الكلام ما جابش نتيجة ابعد شوية ، العلاقة ما منهاش فايدة تبقي جت من عنده و خيره في غيره و ربنا يبعت لك العوض .. المهم "خفف عن نفسك" ..

حبيب و "لا طلتش" و الموضوع ما كملش؟؟ حاول تعرف غلطتك و تصلح ، نفع يبقي خير ، ما نفعش تبقي مرحلة و عدت ، و "لو كان فيه خير ما كان رماه الطير" و اهو يبقي ربنا حاش عنك اللي ما كنتش شايفه .. لا تزعل و لا تنكسر ، نام و اطمن و اللي جاي احلي .. المهم خفف عن نفسك..

مشكلة او خلاف مع ابنك او بنتك او شريك حياتك ؟؟ شوف اللي في ايدك تعمله من لطف و ذوق و تفاهم و حوار و ما تزودش كلام و لا نصايح و لا تضغط و لا تبين ضيقك و لا زعلك .. و اسكت شويتين و ح تلاقي الدنيا مشيت بالراحة مع شوية صبر و صلاة الحلول ح تيجي لوحدها و السلام ح يرجع و العاصفة ح تمشي .. المهم خفف عن نفسك..

أزمة رزق و الفلوس "عجزت" ؟؟ و لا تتعب و لا تنهار لان كله مستور تحت مظلة حماية الله و بركته .. اشتغل زيادة علي قد طاقتك ، دور علي بدايل ، قلل مصاريفك ، استغني عن شوية كماليات صارح نفسك و اسرتك باللي تقدر عليه ، و كمل يومك "ستر و رضي و شكر" و برضه مستورة و كله ح ينام متعشي و برضه كله محصل بعضه .. المهم خفف عن نفسك ..

"خفف عن نفسك" ، نصيحة غالية قالها يثرون حمي موسي لما لقاه تعبان طول النهار و شايل هم الشعب اللي معاه (خروج ١٨: ٢٢) ..

صح الكلام؟؟