يطفي النور

[walaa farouk]

تأملات_في_سفر_صموئيل_الأول
الأصحاح_الحادي_عشر
بيطفي_النور




أصحاح النهاردة بيحكيلنا عن أول حرب واجهت شاول بعد ما أصبح له قلب جديد
ان ناحاش العموني طلع على قرية يابيش جلعاد وحب يعمل معاهم عهد ان يقور عينيهم ويخضعوله، راحوا صرخوا بصوت واحد وبكوا، وشاول عرف بالحدث طلع وطلع يحارب وانتصر للرب وحصل خلاص في هذا اليوم

ودي من بدايات الحروب اللي إبليس دايمًا بيطلع بيها علينا
ان #يطفي_النور
ابليس رئيس ممكلة الظلمة، وعشان مش بيعرف يجند أولاد ليه من أولاد النور، فبيحولهم ويجرهم للظلمة عشان يقدر يتحكم فيهم ويسكن جواهم

وده تقريبًا اللي بيحصل معانا دايمًا، نلاقي أول الأبواب اللي بتتقفل وبعدها تبدا المشاكل تكبر والخطايا تزيد واليأس يتملكنا، ان يخلي نور الإنجيل يطفي من قدامنا، «سراج لرجلي كلامك ونور لسبيلي» عشان يسحبنا للظلمة يخلي الإنجيل تقيل علينا، كلمة الله صعبة، نحس ان مليش نفس اقرا، مش حابب، احس ان الكلمة مجرد كلام مكتوب لناس تانية مش ليا، او ان الوصايا دي صعبة ومينفعش تتنفذ.

ولما #النور_يطفي ويغيب عني كلمة الله، مش بيبقى عندي بصيرة روحية تميز الأمور
فبيكون سهل اقعد في قعدات ظلمة واشارك في الكلام السلبي اللي فيها
بيكون سهل ان افتح مواقع ظلمة واملى عيني منها
بيكون سهل ان أقول كلام عن ناس واشتكي وانم وادين
بيكون سهل افكر في الخدمة بشكل سلبي ومشوفش الإيجابي
بيكون سهل انسى الحلو اللى بيقدمهولي اللي حوليا وامسك في المواقف اللي بضايقني
بيكون سهل الظلمة اللي جوايا تتفتح على عيوب الاخر وادقق فيها

كل نور وكل حق بيغيب من قدامي، وكل ظلمة وكل شر وكل شبه شر بيتملكني
بتأقلم على الظلمة، وبنشوف انها الصح

بنتشجع النهاردة ان نحبط لإبليس حرب من اهم حروبه، وهي ان يطفي_النور عننا، ويحاول يبعدنا عن الطريق عشان يستفرد بينا، النهاردة محتاجين نتشجع ان كل مرة يحاول يلعب معاك اللعبة دي، ويبعدك ولو يوم واحد عن قاعدتك وخلوتك مع الكتاب المقدس ومع النور اللي هيكشف أي ظلمة ممكن تتسرب جواك، المسطرة اللي حياتنا مفروض تتقاس عليها، انك تكون قادر تفشل خططه، متقلش مش هيفرق يوم لكن متسيبش سلاحك، امسك في كلمة الله وثق انك هتلاقي فيها المعونة والسند والإرشاد والتعزية والنور والحق والحرية

وافتكر ان كل مرة بيحاول يبعدك عن مخدعك، هو كدة #بيطفي_النور عشان يبدا معاك سلسلة من الظلمة والعبودية

[روزالين روز]

كلام رائع جدا

[walaa farouk]

ميرسى على مرورك الغالى