ربنا ليه ناس وناس

[walaa farouk]

قالي الجملة دي وهو متضايق ومتعصب جداً،
وده لأنه كان بيمر بظروف صعبة جداً في حياته
وشايف كل الناس حواليه حياتهم ماشية ومستقرة،
وكان دايماً بيسأل ربنا: اشمعنى أنا ؟!
ليه بيحصل معايا كل ده وأنا بحبك وعايش معاك؟!
واللي بعيد عنك عايش مبسوط ومرتاح؟!
والحقيقة إننا كلنا بنفكر زي الشخص ده..
بنفتكر إن محبة الله بتفرَّق ما بين واحد والتاني!
وده على أساس تقييمنا إحنا
للظروف اللي بتحصل حوالينا..
لكن لو بصينا للكتاب المقدس هنلاقي الأمر مختلف عن كده،
المسيح قال بكل صراحة إن الله أحب كل العالم (يو3: 16)
ماقالش بعض العالم أو معظم العالم،
لكن كل العالم الله بيحبه..
والرسول بولس أكد على الفكرة دي لما قال إن..
الله يريد أن جميع الناس يخلصون (1تي2: 4)
نفهم من كده إن محبة الله ثابتة لكل الناس
ومش معنى إن في ناس بتمر بظروف صعبة،
إن الله مش بيحبهم أو تخلى عنهم..
وده لأن مقياس محبة الله ظهر لينا
بشكل عملي وواضح في الصليب..
"لَيْسَ لأَحَدٍ حُبٌّ أَعْظَمُ مِنْ هذَا:
أَنْ يَضَعَ أَحَدٌ نَفْسَهُ لأَجْلِ أَحِبَّائِهِ." (يو 15: 13)
علشان كده..
لو حبيت تشوف محبة الله المُقدمة لكل الناس..
متبصش على الظروف والمشاكل،
لأنها مُتغيرة وتقييمنا ليها مش حقيقي..
لكن من فضلك حط عينك على الصليب
اللي ظهرت فيه محبة الله لجميع الناس،
وساعتها هتكتشف إن ربنا مش ليه ناس وناس،
لكن ربنا بيحب كل الناس 😍