خفي ومؤثر

[walaa farouk]

انت بتخدم بالعسلية!!

كان في خادم عندنا في الكنيسة..
كان راجل حقيقي وبسيط.. كان أب قلبه مليان بحب يسوع الحقيقي.. مكانش عمره يمسك المايك ولا يوعظ ولا عمره كان يرضي يعمل كده.. لكنه كان يحب قوي يقف علي باب الاجتماع.. يسلم علي كل واحد داخل الإجتماع بإسمه ويتبت كده علي إيده ويطمن عليه وعلي أخباره ويطمن إنه أخذ عسلية 🤍

الخادم ده كان أول واحد يروح الاجتماعات وأخر واحد يمشي منها.. ولما كنا نبقي في مؤتمر كان يطمن إن كل الشباب أكل ومحدش فيهم جعان.. ولو كان الأكل خلص ماتفهمش كان بيجيب أكل منين ويأكل الباقين!!

الراجل ده كان زي يسوع تمام.. لما يسوع أشبع الجموع اتحرك علي طول هو وتلاميذه في قارب وراح الجبل..

مش فارق له يبقي ظاهر ولا نجم ولا مشهور ولا يتقاله ربنا يباركك عشان يعرف إن مجهوده إتشاف!!

الراجل ده كان عارف إن يسوع كان بيعمل كده وكان ماشي علي خطاه.. يعمل كل حاجة في الخفاء.. لأنه عنده يقين إن أبوه اللي في السماء مكانش بيبذل أي مجهود انه يبقي نجم جذاب للجماهير 🤍 لكن الأهم من كل ده إن يأثر في قلوب الناس ويعلن محبة الله ليهم 🤍

#خفي_ومؤثر