صورة السماء

[walaa farouk]

الاصل في الكنيسة مفيش صوت واحد تسمعه
غير الكاهن والشمامسة ، ولما الشعب يرد فى القداس او يقول لحن، تشوف الملائكة هى اللى بترد بصوت عذب جميل ..

القاعدة في كنيستي ان لبس الجميع منتهى الجمال
والاحترام و البساطة و هم رايحين يقابلوا ملك الملوك ..

حتي الاطفال ح يعملوا زي اهاليهم ، هاديين و ملتزمين ؛
و لما طفل يعمل اي ازعاج تلاقي الام من نفسها عارفة
و قاعدة في اخر صف من غير ما حد يقولها ؛
و لو زودها تخرج شوية و تستني لما يهدي من غير ما حد حتي يلفت نظرها ..

مفيش حد بيكلم حد و لا حد رايح جاي ، صغير أو كبير
، يشتت الناس و يشيل و يحط و يعمل ازعاج ..

في محضر الله الشمامسة ملتزمين و صوتهم واحد
، هادي بلا اي تسابق لإظهار الذات ..
واقفين وقفة جنود التشريفة بكل أدب ووقار ..

كده تحضر الصلاة و انت هادي و مركز و مستمتع
، و حواسك هادية و روحك مرتاحة ..

زيارة واحدة لكنيسة بالجمال ده اقوي من الف عظة ..

و مذكور في التاريخ ان ناس كتير اتغيرت حياتها لما زارت أماكن الصلاة الإلهية دي ، لأنهم شافوا فيها السماء علي الأرض..