مقاصد الله

[Mary Naeem]

مقاصد الله وكله لخيرك




+ قرروا ينقلوا مكان السكن من محافظة في وجه قبلي ووصلوا إسكندرية ، وبعد فترة قررت الزوجة تروح أقرب كنيسة وتشوف أب إعتراف
وصلت كنيسة واختارت كاهن و إعترفت وأبونا لما عرف إن عندها إستعداد مادي قالها ياريت متنسيش الغلابه ، نزلت مكتب الخدمة وأعطت مبلغ 5000 جنية ، وروحت لاقت الكلب بتاعها ميت علي باب الشقة ، بعد حوالي شهر راحت الكنيسة وبعد ما خلصت إعتراف نزلت مكتب الخدمة وأعطت 5000 جنية روحت البيت لقت جوزها رجله إتكسرت ، وبعد شهر راحت الكنيسة وبعد ما خلصت إعتراف نزلت مكتب الخدمة وأعطت 5000 جنية وهي مروحه خبطها توك توك والناس اتلمت وجابوا كرسي وميه وفضلوا يطبطبوا عليها ولما بقت كويسة قررت ترجع الكنيسة (هنا الشيطانثار جدا في ودانها) أول ما وصلت الكنيسة لقت أب اعترافها نازل وماشي ، قالتله لو سمحت عاوزاك حالا ، قالها حاضر اتفضلي في المكتب ، دخلت معاه المكتب وقالت انتوا أكيد فيكم حاجه غلط ، وأكيد بتسرقوا فلوس العشور ، انا كل مره بعد الاعتراف بدخل اعطي الخدمة مبلغ واروح البيت الاقي مصيبه ،
- مره كلبي مات .
- مره جوزي رجله إتكسرت .
- ودلوقتي خبطني توك توك وكنت هاموت .
ياريت بلاش تغضبوا ربنا أكتر من كده ، وكل ده وأبونا ساكت وكل ما يحاول يتكلم تقوله انا مخلصتش كلام ، وبعد ما خلصت كلامها الجارح لأبونا قالت : وانا أبقي غلطانه لو جيت تاني هنا ، ومش هسامح في فلوس العشور ، ومنك لله بجد إنت ومكتب الخدمة بتاعك .

+ أبونا قرر يطلع تاني الكنيسة ودخل المذبح وفضل يبكي ويقول لربنا : يارب أرجوك إتدخل معاها ، وفضل يعمل ميطانيات كتيره جدا ويقول نفس الجمله لأكتر من ساعه .

+ وبيقولي أبونا : تاني يوم جات السيده نفسها الكنيسة وانا شوفتها وقلت آآآآآآه دي جايا تكمل عليا !!!!!!!!
بيكمل أبونا وبيقول : الست استنت للآخر خالص لما تقريبا الكنيسة فضيت علينا تماماً ، وجات قعدت جنبي وبتقولي :

لما سبتك إمبارح ومشيت ووصلت البيت لاقيت ناس كتيره قوي تحت البيت عندنا ، سألت هو فيه إيه قالوا بلكونه في العماره عندكم وقعت ومات البواب اللي كان قاعد تحتها ، وهو نفس توقيت ما خبطني التوك توك ، يعني لو كنت روحت علي طول تقريباً كنت موت مع البواب ، ولما طلعت وحكيت لجوزي التفاصيل بالظبط قالي صدقيني انتي ربنا نجاكي وانتي متعوده تقفي تحكي مع البواب ده بالعشر دقايق واكتر ، وعلي فكره البواب ده لقي في المنور بتاع العماره تعبان وتقريبا هو اللي عض الكلب ، ولولا الكلب ما هاجم التعبان قدام باب الشقه كان التعبان دخل وعض حد فينا ، وكمل جوزها وقال وانا كمان نسيت احكيلك يوم ما رجلي اتكسرت ومرحتش الشغل ، في واحد اشتغل بدالي وللأسف هو وقاعد علي مكتبي وقعت عليه مروحة السقف واتعور بشكل صعب .
+ وبدأت الست وهي قاعده معايا تبكي بشكل صعب
انا فعلا أسفه ليك يا قدس أبونا واسفه اني شكيت في بركة ربنا وحقك علي وصلي إن ربنا يسامحني .