تاملات كتابية بالعامية (يا بختك ياللي)

[walaa farouk]

انجيل متى
الاصحاح الخامس

1-الموعظه على الجبل التطويبات مت5: 1-،12

العهد القديم ابتدا بوصايا كلها "لا تفعل" اوعاك تعمل الغلط..
لكن العهد الجديد ابتدا بوصايا يا بختك لو عملت... يا بختك وانت فى الارض ويا بختك بالاكتر فوق فى السما..
يسوع ابتدا كلامه مع الشعب فى اول وعظه ولقاء معاهم ب "يا بختكم"
يسوع دايما يحب يبتدى مع كل نفس بالتشجيع.. يا بختك "طوبى"
9 تطويبات ..

1.طوبى للمساكين بالروح : يا بختك لو دايما كنت تلميذ روحى عندك احتياج دائم "شحات روحى"
ساعتها بس طريقك سالك لملكوت السموات..الابديه للمتضعين اللى علطول بيقولوا محتاجين مش حاسين انهم مكتفين بانفسهم او باللى عندهم او باللى يعرفوه..

2.طوبى للحزانى... يا بختك لو كنت حزين بس مش حزن العالم
..حزين حزن حسب مشيئه الله "لأَنَّ الْحُزْنَ الَّذِي بِحَسَبِ مَشِيئَةِ اللهِ يُنْشِئُ تَوْبَةً لِخَلاَصٍ بِلاَ نَدَامَةٍ
، وَأَمَّا حُزْنُ الْعَالَمِ فَيُنْشِئُ مَوْتًا" 2كو7 ..
حزن على الخطايا حزن على تأخير التوبه حزن على مسايره العالم حزن على كسلى فى الطريق الروحى

3.طوبى للودعاء.. المتواضع داخليا وديع خارجيا.. علامه التواضع الحقيقي الوداعه فى التعامل مع الناس ..
. يا بختك لو كنت متواضع ووديع زى سيدك اللى قال "
اِحْمِلُوا نِيرِي عَلَيْكُمْ وَتَعَلَّمُوا مِنِّي، لأَنِّي وَدِيعٌ وَمُتَوَاضِعُ الْقَلْبِ، فَتَجِدُوا رَاحَةً لِنُفُوسِكُمْ".مت 11
ساعتها ترث الارض وترث محبه الناس فى وجودك فى العالم وبعد ما تمشى كمان.

4.طوبى للجياع والعطاش الى البر.. يا بختك لو دايما نفسك مفتوحه على الروحيات نفسك مش بتتسد عن التناول عن الاعتراف عن اعمال الرحمه ... لو فضلت نفسك مفتوحه علطول اضمن انك هتشبع شبع حقيقي مش زى شبع العالم المزيف

5.طوبى للرحماء .. يا بختك لو بتعرف ترحم الناس تعذرهم فى خطاياهم واخطائهم يا بختك لو الناس بتصعب عليك.. ساعتها انت ضامن الرحمه من الملك الحقيقي الرحيم..

6.طوبى لانقياء القلب... يا بختك لو قلبك نقى مش مغيم بحب خطايا او كبرياء او كره لاى حد.. ساعتها نضارتك تبقى نضيفه وتعرف تعاين ربنا وجه لوجه زى ابائنا القديسين

7.طوبى لصانعى السلام.. يا بختك لو اخدت شغلانه ابوك وعملتها ابوك هو رئيس السلام صنع سلاما بجسده بين الارض والسما وبين الناس وبعضها سلامه شمل الكون على شكل صليب.. يا بختك لو قلدته صالحت اخواتك على ابوهم السماوى وصالحتهم على بعض.. ساعتها تبقى ابن ابوك صحيح.. ابناء الله يدعون..

8.طوبى للمطرودين من اجل البر...يا بختك لو لاجل تبعيتك للمسيح اتطردت من مكان يا بختك لو شردوك يا بختك لو خدوا مكانك..ساعتها السما تفتح ابوبها وتستقبلك ساعتها السما تبقى بيتك ومكانك

9.طوبى لكم اذا عيروكم وطردوكم وقالوا عليكم كل كلمه شريره كاذبين... يا بختك بزياده لو مش بس اتطردت ده انت كمان اتشهر بيك وباظت سمعتك بس بالكذب! ساعتها مش بس تفرح عشان السما بقيت مكانك انت تفرح وتهلل ﻷنك اخدت رتبه زى الانبياء اللى اتطردوا قبلكم افرح وتهلل ﻷنك اخدت رتبه واجر عظيم.. يا بختك ياللى!!

[جوزيف جوزيف]

امين امين
ربي يباركك ويبارك خدمتك ويبارك جياتك

[walaa farouk]

ميرسى على مرورك الغالى