عايز ولا محتاج

[walaa farouk]

طيب إيه رأيكم النهاردة
في حصة عربي في السريع ؟!!!!
اه هانتكلم عن الفرق بين ٣ كلمات بنستخدمها كتير
بس للاسف بنستخدمها غلط.
فبنوقع نفسنا بقى في رثاء نفس وصور ذاتية غلط و دراما.
الكلمات دي هي الإحتياج والعوز والرغبات.
خلينا الاول نفهم معانيهم علشان نبقى واقفين على ارض مشتركة.
1- الاحتياج.. اني محتاج حاجة
دي كلمة نستخدمها للحاجات الاساسية اللي نقصها بيخلق مرض.
يعني نقص الغذاء بيخلق سوء تغذية.
نقص الاحترام والتقدير بيخلق جوايا صغر نفس.
دي حاجات كلنا محتاجينها.. محدش مبتفرقش معاه.

2- العوز.. اني اكون عايز حاجة.. اني اكون معوز.
يعني احتياجي متسددش بطريقة صح سوية فبقيت معوز.
بشحت او بسرق او بتلاعب عشان اخده..
باقلب في الزبالة علشان آكل واشبع.

3- الرغبة بقى.. يعني نفسي في كذا.
دي حاجات مش اساسية ومش عند كل الناس.
وبتبقى بزيادة.. يعني نفسي الناس كلها تحبني.
ده مش احتياج اساسي.. نفسي اكون احلى واحدة.
انتي مش هاتموتي لو مبقيتيش احلى واحدة.

المشكله بقى اننا بنخلط بين الرغبة والإحتياج فبنقع في فخ العوز.
رغبات حطيناها في خانة الإحتياج ولانها مبالغ فيها متسددتش
فنعيش دور المعوز اللي بيتوجع قوي وردود افعاله قوية
وعنيفة ومحرجة لانه دايمًا جعان.
الحقيقة إن الإحتياجات بسيطة ومشروعة.. والله صالح
وأمين جداً إنه يسددها من أب، أم، أخ، مدرس، حد أو اتنين في حياتك.
اما بقى الرغبات فهي جشعة لو جتلك من حد تتضايق إنها مجتش من الكل.
لو مجتش بالشكل والتوقيت اللي انت عايزه بتحس إن الدنيا ظالماك.
اتعلم تحجم رغباتك وتتمتع بالرضا وحسن الظن بالله.
هاتلاقي إنك مبسوط باقل حاجة.. وحاسس إنك غني وشبعان ومرضي.
حلو العربي ؟!