التفاحي الذي انقذ دير الشهيده العفيفه دميانه

[walaa farouk]

تعالوا نعرف مين هو التفاحي الذي انقذ دير الشهيده العفيفه دميانه؟!؟!!!!!

حقيقة بس مش كتير اللى يعرفها

بمناسبة اقتراب عيد تكريس كنيسة الست دميانة بالبرارى
ديرها العظيم مرتبط بقصة كتير مايعرفهاش بالرغم من التشابه الكبير بينها وبين قصة معجزة نقل المقطم ودا يمكن لان الكنيسة مش بتقرأ السنكسار فى ايام الخماسين وبتهتم اكتر بافراح القيامة
القصة موجودة فى السنكسار تحت تاريخ 12 بشنس فى تذكار تكريس كنيسة قديستنا العظيمة فى الشهيدات الاميرة دميانة واللى هانحتفل بيه بعد أيام ..

القصة بتقول ان بعد استشهاد الاميرة دميانة والاربعين عذراء وبعد تولى الامبراطور قسطنطين الملك نزلت امه الملكة البارة هيلانة لمصر وبنت كنيسة للشهيدة دميانة وتحتها وضعت اجساد الشهيدة والاربعين عذراء الشهيدات

وبعد مدة من الزمان وبعد دخول العرب لمصر وفى عهد الخليفة سنان كان فى شخص دجال مشهور جداً باعمال السحر اسمه يونس وهو متجه ناحية الزعفرانة شاف كنيسة ودير الست دميانة فحب المكان فجاب بنايين وهدم الكنيسة وبنى فوقها قصر لكنه ماكانش يعرف ان تحتها قبو فيه اجساد الست دميانة والاربعين شهيدة ..
وفى الوقت ده حصل طوفان ونزلت المياه فى المنطقة وما حولها وغرقت البلاد وهدمت المبانى وهدمت القصر اللى بناه يونس مكان الكنيسة ومات غريق

المياه وصلت لحد حائط كنيسة سمنود تقريباً الكنيسة المقصودة هى كنيسة العدرا والشهيد ابانوب
الخبر وصل للخليفة بان كل البلاد اللى ف المنطقة غرقت فحزن جداً لان المنطقة دى كان بيتزرع فيها الزعفران وحشائش عطرية غالية جداً كانت السلطنة تحصل اموال كتير جداً من التجارة بيها.. وكان فى القلعة شخص يهودى اشار للملك انه يلزم بطرك الاقباط يشوف حل لمشكلته وكان وقتها البابا خائيل الاول ال46
فاستدعاه الخليفة وطلب منه يرد المياه ويعمل الجسر اللى كان بيحجزها فطلب البطرك مهلة من الملك وخرج من عنده واتجه لكنيسة العدرا المعلقة وقفل على نفسه 3 ايام بلياليها فى صوم وصلاة بحرارة .. وفى اليوم الثالث كلمته العدرا من ايقونتها واخبرته ان رسل الحاكم فى طريقهم اليه وفى طريقه للحاكم هايشوف رجل قديس بسيط جداً شايل على راسه مشنة وبيبيع تفاح والراجل ده هو اللى على يده تتم المعجزة .. وفعلاً تم كلام العدرا وفى طريقه شاف التفاحى فمسكه من قبة توبه لاحسن يهرب منه .. فمشى معاه لحد ما وصل للخليفة .. فهيأ الخيل والموكب وبعض العسكر واتجه مع البطرك لكنيسة سمنود وكان الاقباط يخرجوا من بلادهم يمشوا ورا بطركهم فى الطريق وابتدا الشعب يصرخ كيرياليسون وكان الرجل التفاحى واقف ورا البطرك لحد ما وصلوا منطقة اسمها دميرة وهناك ضربوا
الخيام للملك وسميت المنطقة ب جزيرة سنان الى اليوم
ومن هناك بدأت المياه تهرب من امامهم لحد وصولهم لمنطقة الزعفران ووادى السيسبان عند القصر المهدوم واللى تحته جسد القديسة دميانة والاربعين شهيدة وهناك بدا البطرك يرفع ايده ويصلى والشعب وراه واستمرت المياه فى الهروب وهناك هبت رياح شديدة وخرجت رمال وهيأت جسر ...

ووقتها حب الخليفة يكافئ البطرك وطلب منه يتمنى شئ فطلب البابا منه يساعده فى بناء كنيسة ودير جديد مكان اللى تهدم فامر الخليفة بالبناء على نفقته الخاصة ...
اما البابا نزل قبر القديسة دميانة اللى كان تحت القصر اللى غرق فوجد جسدها واجساد العذارى الاربعين لم يمسسها فساد واخد البابا جسد الست دميانة ونقله مؤقتاً للكنيسة المعلقة لغاية الانتهاء من بناء الدير ف البرارى وبقى يحتفل بعيد القديسة دميانة فى الكنيسة المعلقة الى ان تم بناء دير البرارى .. ومن الوقت ده سميت الكنيسة المعلقة كنيسة العذراء والشهيدة دميانة ووضع ايقونة الست دميانة فى الحائط الغربى فى مواجهة الداخل الى الكنيسة بالاضافة الى ايقونات اخرى ومقصورة وضع فيها جزء من جسدها قبل ما يعيده مرة اخرى لقبرها مع الاربعين شهيدة
اخد جزء من عظام القدم ومن الجزء ده تم توزيع رفاتها على كنائس الكرازة المرقسية فى العالم