|
 |
 |
 |
|
|
|
رقم المشاركة : ( 1 )
01 - 03 - 2020, 07:55 AM
|
|||||||||||
|
|||||||||||
 نفسي نقول اللي ما حضرش القداس من بداية رفع بخور باكر ما يتناولش! قبل ما أقول العظة عايز أقول لكم علي تنبيه صغير.. عايزكم تبصوا تشوفوا الكنيسة هتلاقوا الكنيسة لسه مش مليانة.. شوفوا كده ناحية الرجاله الأماكن فاضيه كتير ، وأنا أسمع إن علي نهاية القداس، الكنيسة عند التناول بتبقي زحمة جًدا.. ده معناة أن الناس بتيجي متأخر وده ضد تعليم الكتاب المقدس! الكتاب المقدس بيقول "من يبكر إليّ يجدني" والمزمور بيقول "يا الله إلهي إليك أبكر" ربما أنا قعدت أفكر ليه شعبنا بيجي متأخر وده مش هنا بس في كنيسة العذراء، أنا كنت الاسبوع اللي فات في أورلاندو وقلت لهم نفس الكلام لأن الناس بتيجي متأخر. . وقت العظة لقيت الكنيسه فاضية وبعدين عند التناول الدنيا زحمة، قعدت أفكر ليه شعبنا بيجي متأخر! كنت من أسبوعين في الهند وحضرت معاهم قداس والقداسات هناك بتبدأ بدري الساعه ٧.. لما رحت هناك لقيت الكنيسه مليانة علي آخرها تقريبا ٣٠٠٠ واحد موجود.. طبعا الكنيسة لا تسع ٣٠٠٠ واحد لكن الناس في الحوش وفي الطرقات بره، وهناك كنايسهم حر مافيهاش كراسي الناس بتقعد ع الارض وبالرغم أن الجو حر ومافيش كراسي وقداساتهم طويله زينا ٣ ساعات بردو إلا إن الناس بتيجي بدري! لقيت إن فيه تنبيه بيتقال بقاله سنين في أغلب كنايسنا وأنا من رأيي أن التنبيه ده ضر الكنيسة أكتر من أنه فادها والتنبيه ده ليس له أساس في قوانين الكنيسة أو في طقس الكنيسة خالص.. أنا مش عارف مين اللي اخترعه اللي بيقولوا فيه أن اللي ما يحضرش الإنجيل ما يتناولش. الحقيقه إن اللي بدأ التنبيه ده -اي كان- كان بيكلم الناس المتأخرين عايز يحثهم انهم يجوا بدري فيقول لهم لو ما حضرتوش الانجيل مش هتتناولوا.. انما التنبيه ده آثر تأثير عكسي لأنه خلي الناس اللي بتيجي بدري ضميرها مرتاح حاسين انهم لو انهم جم وحضروا الإنجيل يكون كده كويس.. التنبيه ده علم الناس انه it's ok انك ماتجيش كل اللي قبل الانجيل ده كأن الصلوات اللي قبل الإنجيل دي مش مهمة.. لكن المهم علشان تتناول تحضر الإنجيل وبقي الناس ضميرها مرتاح انه لو حضر الانجيل انه يتناول.. ما يبقاش عارف انه ساب ساعة ونص من بداية القداس لغايه الانجيل! تلاقي الواحد سايب الفتره دي كلها وضميره مرتاح كأنه ماعملش حاجه غلط.. وبعدين ييجي وقت التناول ويبدأ الفصال بقي.. يعني إيه؟؟ جيت بعد الإنجيل بـ ٥ دقايق ممكن أتناول؟ كأنه هو إتأخر ٥ دقايق ومش مدرك إنه أتأخر ساعه ونص! نفس التنبيه اللي ضر الكنيسة تنبيه إن اللي ما يحضرش تحليل الخدام مايلبش شماس دي خلت مجموعة كبيره من الشمامسة يحسوا انه it's ok انه ما يحضرش رفع بخور باكر أو انه مايحضرش تقديم الحمل أو ده كله.. طالما انه حضر تحليل الخدام يبقي من حقه انه يلبس.. و لو قلت لواحد انه لا يلبس يقولك انا جيت بعد تحليل الخدام بـ ٣ دقايق بردو مش مدرك انه الوقت اللي كان قبله كان المفروض انه يكون موجود من ساعة فتح ستر الهيكل وبداية الصلوات. أنا مش عارف إزاي نغير فكر الشعب وإزاي نهتم بالكنيسة!! ده يوم واحد في الاسبوع بنعبد فيه ربنا!! ده المزمور بيقول "إعبدوا الرب بالفرح إدخلوا دياره بالتهليل" انت لما تكون معزوم في حفله بتروح متأخر ساعتين؟! لما تروح الشغل بتروح متأخر ساعتين؟! لما يكون فيه حفلة أو مسرحية بتروح متأخر ساعتين؟ ده بتروح قبلها وبتكون منتظرهم لغايه ما يبدأوا إشمعني الكنيسه؟! ربما بعضكم يقول أنت بتكلمنا ليه احنا جينا بدري.. الحقيقة آه انتم جيتوا بدري ربنا يبارككم، علشان تبلغوا الناس اللي هتيجي متأخر وتقولولهم انه مايصحشانكم تيجوا متأخر، مايصحش أن الكنيسه تبدأ ٧ صباحًا والناس تيجي ٩، ١٠ وبعدين يدخلوا يتناولوا وكأنهم ماعملوش حاجة! أنا نفسي نغير حكاية اللي ما حضرش الانجيل ما يتناولش.. نفسي نقول اللي ما حضرش من أول فتح الستر وبداية رفع بخور باكر ما يتناولش ده الوضع السليم في الكنيسة لكن ليه الناس تتأخر كده؟؟ أنتم بتحبوا ربنا ولا لأ؟؟ لو بتحبوا ربنا ليه عايزين تقعدوا أقصر وقت ممكن ف الكنيسة؟! هو اللي بيحب واحد مش بيحب يقعد معاه؟؟ اللي بيحب واحد مش بيحب ييجي ويعبده بفرح "أعبدوا الرب بفرح إدخلوا دياره بالتهليل"؟ فين المزمور القائل "فرحت بالقائلين لي الي بيت الرب نذهب"؟؟ ليه الواحد مايجيش بغيره وييجي بدري الكنيسة وهو فرحان ومتهلل ويقول "ادخل الي هيكل الرب تجاه وجه الرب الذي يفرح شبابي"؟.. الحقيقه أنا مش مبسوط من الحكايه دي.. وقت التناول شوفوا الكنيسة بتبقي زحمه إزاي.. ده معناه إن الناس حضرت نص ساعه بس.. هذا لا يليق.. هذا لا يليق! أرجو انكم تبلغوا الناس ان السلوك ده مش سليم. . أرجو ان الآباء الكهنة في الافتقاد يبلغوا الناس .. أرجو ان الخدام يبلغوا الناس.. أرجو أننا نبطل تنبيه ان اللي ما يحضرش الانجيل ما يتناولش لأن ده بيخدر ضمير الناس.. كأن كل الساعة ونص اللي قبل الإنجيل والقراءات مالهاش لازمة.. يعني كأني أعطي للإنجيل أهميه اكتر من البولس والابركسيس والكاثوليكون وإنجيل رفع بخور باكر... هو ده مش كله كتاب مقدس!مش كل كلمه موحي بها من الروح القدس! إشمعني يعني انجيل القداس! ربنا يدينا أننا نعبده بالفرح وندخل الكنيسه بالتهليل زي ما قال المزمور "مساكنك محبوبة أيها الرب إله القوات تشتاق وتذوب نفسي للدخول الي ديار بيت الرب". مش عارف الكلام ده بنقوله كده ولا عايشينه؟؟.. الواحد بيبقي فرحان وهو داخل الكنيسة وهو داخل يعبد ربنا ولا إحنا جايين تأدية واجب علشان نخدر ضميرنا أننا جايين الكنيسة وأخدنا التناول وخلصنا علي كده؟! نيافة الأنبا يوسف أسقف جنوبي أمريكا كنيسة السيدة العذراء بدالاس تكساس 
|
|
01 - 03 - 2020, 08:37 AM
|
رقم المشاركة : ( 2 ) | |||
|
..::| العضوية الذهبية |::..
|
رد: تنبيه هام جدًا من نيافة الأنبا يوسف
حقيقي مينغعش نفول ينفع ومينفعش عشان منعملش عثره للناس
|
|||
|
|
|
01 - 03 - 2020, 01:11 PM
|
رقم المشاركة : ( 3 ) | ||||
|
† Admin Woman †
|
رد: تنبيه هام جدًا من نيافة الأنبا يوسف
ربنا موجود |
||||
|
|
 |
|
العرض المتطور