قالت مريم ليكن لي كقولك

[walaa farouk]

يا جمالك يا ستنا يا أم النور
عسل اوى وهى بتقوله" ليكن لي كقولك .."
هو فيه واحده يجيلها خبر هتجيبى نونو وانت مش متجوزه تقوله ليكن لي كقولك ..
وطبعا محدش يقولى دى بشاره جميله .
. دى بشاره لينا احنا لكن هى لسه مش عارفه حاجه ..
مش عارفه إللى حواليها هيعملوا فيها ايه من ورا الخبر ده ..

جدعون زمان ربنا قاله هديك نصره .. ربنا بنفسه طمنه ..
تخيلوا هو قال لربنا ايه .. قاله طب وانا ايه عرفنى .. اضمن منين .. 😳 ..
ماتستغربوش اوى .. ما احنا يومياً بنقول لربنا كده ..
فربنا قاله طب عايز ايه .. جدعون قاله هحط جزة صوف ف وسط الارض
وبعد كده لو لقيت جزة الصوف مبلوله والارض ناشفه يبقى مصدق كل كلامك ..
فربنا قاله حاضر .. ونفذله طلبه لدرجة انه ملا جرة ميه لما عصر جزة الصوف ..
العجيب انه مكتفاش بكده لا .. لكن راح قال لربنا طب انا عايز العكس
.. هحط جزة الصوف ع الارض والاقيها هى ناشفه والارض حواليها غرقانه ميه .
. تخيلوا مافيش ثقه خالص ..

لكن هى حاجه تانيه هى تقف قدام ربنا تقوله ليكن لي كقولك ..

ربنا يقول لموسى هبعتك تخدم اخواتك يقوله وانا مالى ..
انا ثقيل الفم واللسان ربنا يقوله هكون معاك ..
موسى يقوله ارسل انت بيد من ترسل .. ابعت حد غيري 😳 ..
ربنا يقوله طب هديك علامه .. ادخل يدك إلى عبك برصاء كالثلج ..
ادخل يدك مره تانيه .. رجعت طبيعيه ..
طب ارمي العصا هتلاقيها حيه ..
امسكها رجعت عصا .. ١٠٠ علامه و١٠٠ سؤال .. بنتشرط على ربنا ..

لكن هى لا .. هى تقوله ليكن لي كقولك ..

حزقيا بعد ما ربنا قاله خلاص حياتك هتخلص زعل وعيط ..
ربنا بعتله اشعيا قاله كلمه ف منتهى الجمال " قد سمعت صلاتك قد رأيت دموعك " ..
متخافش يا حزقيا ربنا هيديك ١٥ سنه تانيين ..
قاله وانا ايه يضمنلى 😳 طب ادينى علامه ..
والعجيب أن الاتفاق كان على حاجه كده وهميه ان ظل الشمس يتاخر ١٠ درجات .. لا وربنا نفذ ..
لكن هى لا .. هى تقوله ليكن لي كقولك ..
جزة_صوف ..
ظل_الشمس ..
العصايا_حيه ..
ليكن_لي_كقولك ..

كل إللى داق المحبوب وعرفه ميعرفش يقوله غير كده