متفتحوش الشبابيك المقفولة

[walaa farouk]

شباك مطبخي من يوم ما سكنت وهو بيتفتح حته صغيره
بقالي سنين بشتكي ان الاضاءه و التهويه ضعيفه اوي في المطبخ
كل ما ادخل المطبخ اقول
يا سلام لو الشباك ده يتفتح شويه اكيد حاجات كتير هتتغير للاحسن

من أسبوع بالظبط اكتشفت ان في قطعه معدن صغيره جداً
لما بتتحرك الشباك بيتفتح فرحت جداً و فضلت فتحاه لمدة يومين كاملين مش راضيه اقفله
في انتظار الهوا بقي و النوووووور

الشباك دخل لي نور و هوا كتير فعلاً
بس كمان دخل معاهم ريحه اكل و تراب و ودخان

الشباك كشف لي حاجات ما كنتش أحب أشوفها
زي منظر المانور و شبابيك حمامات العماره اللي جنبي و شقوق الحيطان
الشباك خلاني سمعت صوت الجيران و شكاويهم وخناقاتهم واسرار بيوت

اتاري الشباك كانت يدوب فتحته
على قد تحملي
علي قد احتياجاتي
علي قدراتي
اتاريني كنت بتمني يحصل اللي مش من مصلحتي انه يحصل ابداً
اتاريني حسبتها بدماغي ومن منظوري و رؤيتي المحدوده وبس
************
الستات اللي بتفتش في حاجه جوزها
الرجاله اللي بتنبش في الماضي
الناس اللي بيسعوا ورا انهم يعرفوا كل حاجه وكل اخبار الناس
الناس اللي بتدور علي زلات و اخطاء و معاصي الغير

لما يكون في حاجه ربنا مانعها عنك متسألش كتير وسلم وخلي عندك يقين انه هو ده الخير
ما تدورش ورا الناس علي الحاجات اللي هما محتفظين بيها لنفسهم
خليهم في مكانهم عشان ما تفتحش حوارات و قصص و تدخل في تفاصيل
جهلك بيها هو انسب حاجه ليك لأنك فعلا مش هتستحملها

مش لازم الجزء المفقود ده يكون فيه نجاتك ممكن جداً يكون مليان بالشر
مش كل باب مقفول في حياتك تسعي انك تفتحه متعرفش ورآه مستخبي لك اَيه
أبواب كتير مقفوله لحكمه لا يعلمها الا الله .
واللي مجاش اعرف انه مش رزقك مش نصيبك مش الخير ليك

سلم لله وأطمئن 💞

[مورا مرمر]

روووووووووووووووعة
ربنا يبارك خدمتك

[walaa farouk]

ميرسى على مرورك الغالى مورا

[Mary Naeem]

اتاري الشباك كانت يدوب فتحته
على قد تحملي
علي قد احتياجاتي
علي قدراتي

مشاركة جميلة جدا
ربنا يبارك حياتك

[walaa farouk]

ميرسى على مرورك الغالى