شويه حقايق عن النوم

[walaa farouk]

1- مافيش حاجه اسمها انت نمت كتير مادام انت شخص طبيعى ومش مريض بحاجه , جسمك لما هيحس انك نمت كفايه هيصحى لواحده .. اللى يقولك انت نمت كتير عوره ف وشه
2- كل ماتكبر فى السن احتياجك للنوم بيبقى اقل ,, البيبى الصغير بينام فى حدود 17 ساعه وبيفضل عدد ساعات النوم يقل لحد ماتتقدم فى العمر وبتيبقى محتاج فى حدود 6 ساعات مش اكتر عشان كده باباك ومامتك هتلاقيهم بيناموا اقل وانت لما توصل لسنهم هتنام زيهم ده طبيعى, ماتخليش حد يشتغلك
3- النوم سلطان
4- اقل عدد ساعات ممكن تنامه هو اربع ساعات دول هيخلوك عندك الحد الادنى من الادراك اقل من كده هتبقى شبه المساطيل ودماغك مش هتكون بتشتغل بطريقه كويسه فاشبع نوم
5- النوم هو اللى بيخمر احداث يومك وبيحولها لذكريات نومك القليل هيخليك تنسى حاجات كتير من اللى بتحصلك
6- النوم سلطان برضوو
7- معظم الناس اللى عندهم مشاكل عقليه او ادراكيه نومهم كان فى البدايه متقطع وقليل فعشان ماتتجننش وتجننا معاك نام كويس ده غير ان فيه بعض الدراسات قالت ان مخك وانت نايم بيبدا فى تثبيت الاحداث السلبيه اللى حصلتلك الاول فلو مانمتش كويس هتبقى انسان كئيب وخنيق وسلبى وهتقرفنا . فنام كويس
8- النوم عباره عن دورات بتسلم بعضها كل دوره بتستمر لمده 90 دقيقه بتدخل فى مرحله النوم العميق بعد 45 دقيقه من بدايه الدوره لو صحيت وانت فى المرجله دى هتبقى بردو شبه المساطيل وهتحس انك عاوز تنام ومرهق وهتاخد وقت على ماتفوق ابقى حاول تظبط نومك بحيث تصحى فى مرحله النوم السطحى اللى ف اول 45 دقيقه فتقوم كويس ومش خملان
9- النوم سلطان
10- لو انت مرهق جدا وانت سايق او ف الشغل ممكن تاخدلك غفوه بس الغفوه دى ماتزيدش
عن 40 دقيقه عشان تقوم فايق او تكمل ال 90 دقيقه كاملين والا هتقوم فى وضع اسوأ من انك مانمتش خالص
11- بعض الناس اللى مابيناموش كويس لفترات طويله الغفوات بتتعبهم اكتر ومش بتريحهم لان جسمهم بيبقى معتمد ع الادرينالين فمش مدرك هو تعبان قد ايه وعنده احساس مزيف بالتوازن وبمجرد ماياخد غفوه ويبدأ جسمه يرتاح بيبدأ بعدها يحس الاحساس الواقعى بالتعب مش المزيف بالراحه فبيجهد اكتر
12- انت بتحتاج لكل ساعه صحيان نص ساعه نوم اليوم الـ 24 ساعه لو هتصحى 16 ساعه هتنام فيهم 8 ابقى احسبها وظبط حالك
13- لو انت نمت لفتره طويله مثلا 12 ساعه فيما فوق فده معناه انك بقالك فتره طويله بتقوم بدرى عن احتياجك فتخيل لو انت محتاج كل يوم 8 ساعات وبتنام سبعه بس لمده ست ايام فهتبقى مديون ب 6 ساعات نوم لذلك جسمك بيفترى احيانا فى النوم ف الاجازات اللى بتبقى بعد مجهود او حرمان حاول ماتدينش او يبقى عليك ساعات نوم هتلاقى نومك فى ايامك كلها اصبح طبيعى
14- النوم سلطاااااهههااااااان

[Mary Naeem]

اقل عدد ساعات ممكن تنامه هو اربع ساعات دول هيخلوك عندك الحد الادنى من الادراك

شكرا على المعلومات

ربنا يباركك

[walaa farouk]

ميرسى كتير على مرورك الغالى