اعمل زي داود واتكلم معاه براحتك

walaa farouk · رقم المشاركة : ( 1 ) 05 - 12 - 2017, 04:54 PM

داود النبي ف المزمور 35 .. اتكلم بلسان كل الناس الموجوعين والمجروحين .. داود ف المزمور ده كان حاسس بظلم و غدر من اللي كانوا قريبين منه .. و قدم شكوته ل ربنا وهو بيحكيله ع اللي حصلله .. وبيشكيله بقلب مجروح .. من الناس اللي كانوا ف يوم حبايبه وصحابه .. وقال ل ربنا بالنص : يُجَازُونَنِي عَنِ الْخَيْرِ شَرًّا !
كام مره حسيت انك مصدوم ف ناس قريبه منك ؟
كام مره اتجرحت من اقرب الناس ليك ؟
كام مره الوجع جالك من اللي ياما تعبت علشانهم ؟
مفيش اصعب م الجرح لما بييجي من حد كان قريب منك ف يوم م الأيام .. من بني أدم كلت معاه عيش وملح وبينك وبينه ذكريات .. من حد مشافش منك الا الخير ..
مفيش أصعب من ان اللي بتحبه يخذلك .. واللي شلته ف عينك طول العمر يقسي عليك ويوجعك ..
بس اطمن .. مش لوحدك اللي مريت بالتجارب دي .. انبياء كتير زي داود جربوا كل الوجع ده .. ويسوع نفسه مر بنفس التجارب وأكتر .. الخيانه والخذلان ونكران الجميل
ف الوقت ده متشتكيش الناس للناس .. متروحش لحد علشان يطيب خاطرك .. اجري علي ربنا وارمي نفسك ف حضنه واشتكيله من اللي جرحوك .. احكيله وانت واثق ومتأكد انه سامعك وحاسس بيك .. اعمل زي داود واتكلم معاه براحتك .. قوله يارب اشفيني من الجرح .. و طمن قلبي اللي اتوجع .. متتكسفش تبين ضعفك قصاد ربنا .. وصدقني .. هو هيغنيك عن الكل .. و يسند قلبك ف عز كسرته

اوفا · 05 - 12 - 2017, 05:02 PM

ربنا يعوضك

Mary Naeem · 05 - 12 - 2017, 05:22 PM

متتكسفش تبين ضعفك قصاد ربنا .. وصدقني .. هو هيغنيك عن الكل .. و يسند قلبك ف عز كسرته
ربنا يفرح قلبك

walaa farouk · 05 - 12 - 2017, 07:21 PM

ميرسى على مروركم الغالى اعمل زي داود واتكلم معاه براحتك