محتاج أخد قرار

[walaa farouk]

فكرت قبل كده تحسب كام قرار محتاج تاخده في اليوم؟!


لما بفكر في كمية القرارات اللي المفروض اخدها خلال اليوم بتخض، من أول ” هروح الشغل النهاردة ولا لأ؟، وهل أنا أصلاً عايز أكمل في الشغل أو المجال ده كله؟ طب هروح مواصلات ولا مترو ولا تاكسي، طب هروح أبدأ بأنهي حاجة في الشغل، طب هاكل أيه، طب أعمل أيه بعد الشغل، ممكن بالنسبة لك الحاجات دي تبان بسيطة وسهلة ومتعود تاخدها كل يوم، بس انت عارف ان الحاجات دي اسمها قرارات! لغاية ما نيجي بقى للقرارات الكبيرة، أنا محتاج أغير مجال شغلي، طب أتجوز ولا متجوزش، طب لما اتجوز أخلف ولا تربية العيال صعبة، طب أصلاً قرار اختيار شخص مناسب للجواز ده لوحده محتاج تفكير ووقت، وفي الأخر بنوصل اننا كل يوم بناخد كمية قرارات لا حصر لها، طيب أعمل إيه علشان أبقى عارف أني ماشي في طريقي صح ولا لأ.. فيه خطوات عملية ممكن تساعدك..

اقبل الغلط

، للأسف كلنا اتربينا أن الغلط يعني فشل، ودا مش حقيقي الإنسان اللي مابيغلطش مبيتعلمش، وكل مرة في الغلط بنتعلم وبنكبر ومش عيب أبداً لما تغلط تعترف وتقول وواحدة من مقاييس النجاح أنك تتعلم من أخطائك، الغلط بقى أنه لما تغلط تكابر ومتقولش أنك غلطان أو تقفل على نفسك وتدخل في مود الحزن، اقبل الغلط لكن ماتكرروش

اسمع

اتعلم تسمع خبرات الناس اللي حواليك وتتعلم من غلطاتهم، مش عيب على فكرة نتعلم من بعض، ومش لازم تمر بالموقف بنفسك علشان تبين أنك شاطر وجامد وعرفت تتصرف فيه بشكل أحسن من اللي عملوه، ومش بس تتعلم من أخطائهم لكن اتعلم من نجاحاتهم وكل الصعب اللي مروا بيه، علشان تعرف تساعد نفسك أكتر لما تقف في وشك مشكلة

اهدأ

في زحمة الحياة ورتمها السريع أوقات بناخد قرارات باستعجال أو في وقت عصبية وبنرجع نندم عليها، ده مش معناه انه في أوقات تانية لازم تغتنم الفرصة زي ما بيقولوا بس لو أنت متعود تاخد قرارات في حياتك وفاهم نفسك عايز تعمل إيه ده هيساعدك كتير أوي أنه حتى القرارت السريعة في أغلب الأحيان بتبقى مفيدة ، بس في الطبيعي لما تكون محتاج تاخد قرار لازم تبقى هادي وتفكر فيه كويس

اسأل

السؤال مش عيب، لما هتسأل هتعرف رأي الناس التانية وممكن تكتشف حاجات مكانتش في دماغك أصلاً وده هيساعدك تفكر بطريقة أحسن، لما تسأل مش معناه انك مقصر أو صغير أو بنشكك في خبرتك بس أحياناً هتلاقي السؤال بيساعدك كتير وبيكون أحسن من أنك ماسألتش خالص، وقالولنا قبل كده اللي بيسأل ده طفل، لو أنت كبير مش هتسأل كده بس الحقيقة الناس اللي فعلاً عايزة تكبر بتسأل وبتاخد بمشورة الناس اللي حواليها بس المهم تختار كويس الناس اللي هتسألهم، ويكونوا مصدر ثقة ويكون أمين يحافظ على أسرارك

[Mary Naeem]

فعلاً عايزة تكبر بتسأل وبتاخد بمشورة الناس اللي حواليها بس المهم تختار كويس الناس اللي هتسألهم، ويكونوا مصدر ثقة ويكون أمين يحافظ على أسرارك

صح يا قمر

ربنا يباركك حببتي

[walaa farouk]

ميرسى على مرورك الغالى