مش لازم تتعلق اوي، ولما تحب مش لازم تحب أوي، ولما تكره مش لازم تكره أوي..

[marit jesus]

البنت اللي كنت بحبها اوي في أول سنه جامعه وهموت عليها ومقتنع اني مش عاوز غيرها حياتي موقفتش عليها عادي وفي اخر سنه كنت بعدي من جنبها مببصلهاش أصلا ده غير انها مبقتش حلوة في نظري زي الأول..
البنت اللي كانت بتحبني وبتقولي انها هتموت لو سبتها وفضلت تحاول تقنعني اننا نكمل مع بعض اهي حبت وارتبطت واتخطبت كمان وتقريبا متعرفش عني اي حاجه، اكيد نسيتني واكاد اجزم انها خلاص مش فاكراني..
أعز صحابي زمان واللي كنا بنروح كل حته سوا وبخرج معاه وبتفسح معاه وبذاكر معاه وعملنا كل حاجه مع بعض بقالنا سنتين منعرفش عن بعض حاجه غير من ناس صحابنا ويوم ما بشوفه بتكون صدفه مش اكتر..
أعز صحابي دلوقتي واللي مقدرش اعيش من غيره كان اكتر حد مبطيقهوش ايام الجامعه و اول تعامل لينا مع بعض كنت هتخانق معاه ودلوقتي انا بعتبره اكتر من اخويا فعلا ولو طلب عينيا مش هستخسرهم فيه..
السنه اللي انا سقطتها في الجامعه وزعلت عليها لاني كنت هاخد اعفا من الجيش زي دفعتي لما عدتها عرفت ارجل صحاب في حياتي واللي ما زالوا صحابي الى الان من سنين ولولا اني سقطت مكنتش قابلتهم..
المكان اللي جبتله واسطه عشان اروحه في الجيش شوفت فيه الويل والعذاب وبعد فترة لما روحت مكان تاني غصب عني كنت هموت ومروحهوش ارتحت فيه جدا وقضيت اخر كام شهر في جيشي من غير بهدله..
صحابي الاتنين اللي الجامعه كلها كانت بتقول انهم هيبقوا لبعض بعد قصة حب جميله وطويله اهو الاتنين سابوا بعض وهو خطب وهي اتخطبت وكل واحد فيهم مبسوط في حياته الجديده من غير التاني عادي..
اتعلمت ان عمري ما هفهم حكمة ربنا من اي حاجه بتحصلي دلوقتي، وعمري ما هفهم هل الخير اللي مكتوبلي هيكون في الحاجه اللي انا حاببها وهموت عليها ولا في غيرها اللي انا مش عاوزه..
اتعلمت ان مهما حصلي حاجه فأنا لازم أحسن الظن بربنا ان اكيد هو شايلي الاحسن، وان ربنا طول مانا حاطط اعتمادي عليه وتوكلي عليه فاستحاله انه يظلمني ولا يخذلني ولا يكلفني اكتر من طاقتي..
صحيح احنا منقدرش نمنع نفسنا من التعلق بحاجه احنا نفسنا فيها وعاوزينها، وبرضو منقدرش نمنع نفسنا من الزعل على الحاجه دي لو ضاعت، مهما حصل احنا بشر وهنفضل بشر وعمر مشاعرنا ما هتقف..
بس لازم نفهم ان اللي احنا بنحبه دلوقتي ممكن يبقى عدونا بكره، واللي احنا بنكرهه دلوقتي ممكن يبقى حبيبنا في يوم من الايام، واهتماماتنا دلوقتي ممكن تتغير مع الوقت، واللي بنعيب عليهم ممكن نبقى زيهم فيما بعد..
انت مش مضطر تدي حاجه اكبر من حجمها، لما تفرح مش لازم تفرح اوي، ولما تزعل مش لازم تزعل اوي، ولما تتعلق مش لازم تتعلق اوي، ولما تحب مش لازم تحب أوي، ولما تكره مش لازم تكره أوي..
وخليك دايما فاكر ان اللي انت بتعيط عليه دلوقتي ممكن يموتك من الضحك بكره !

[Mary Naeem]

وخليك دايما فاكر ان اللي انت بتعيط عليه دلوقتي ممكن يموتك من الضحك بكره !
إللى بتعيط عليه دلوقت هيموتك من الضحك بكرة