١٠ نصايح للمخطوبين :

[Rena Jesus]

١٠ نصايح للمخطوبين :



١- الخطوبه مش جواز ،
دي مجرد تجربه ووارد تفشل ، يعني العريس مش زوج ومالوش حقوق غير التعارف ، يعني ما ينفعش يتقال له يا بيبي ولا ياجوزي ولا حتي يا حبيبي ،
وطالما بقي خطيبك يبقي يستاهل بالكتير لقب (يامدهول ).

٢- مش معني ان الخطوبه اسعد فتره ف حياتنا يبقي نقضيها مراجيح ،
دي اًكتر فتره محتاجه تفكير ودراسه علشان تودينا لأسعد فتره ف حياتنا اللي هي الجواز العرفي .

٣- قرارات ابوكي واخوكي تمشي علي التخين وبالذات خطيبك ،
ومش من حقه يقولك اخرجي او متخرجيش ولا تصاحبي مين ولا ماتصاحبيش ،
يعني لو ناوي يعمل عليكي راجل اعملي عليه شوربه .

٤- الغريزه لو دخلت علي الخط هاتشوشر علي قرارتكم وهتكرهوا بعض او تدمنوا بعض ،
وفي الحالتين التقييم مش هايبقي صحيح وهاتتصدموا بعد الجواز ،
يعني نتلم و نحترم نفسنا لحد ما نتنيل نتجوز .

٥- الطبيعي ان مفيش حد بيتغير ، وبالذات لو فشل يتغير في الخطوبه ،
يبقي لايمكن هايتغير بعد الجواز، يعني بلاش نقول بكره هايتغير ،
وكلنا طبعا عارفين المثل بتاع ديل الكلب .

٦- الفرح ممكن يبقي شكر لربنا علي نعمته ، وممكن يبقي شكر للشيطان ،
يعني نلبس عريان او لو محجبه نخلع الحجاب ونجيب رقاصه ونتمنظر علي القرايب والجيران بالفرقه والأكل والفشخره ،
لو كده يبقي نكنسله احسن ونطلع بتمنه هاني مون ف بلطيم او جمصي او حتي نصرف شويه ونروح راس البر .

٧- قيمه الشبكه والفرح مش دليل علي ان العريس شاري او مش شاري ،
لكن دليل علي امكانياته يعني السؤال يناسبنا ولا مايناسبنهاش ،
وديكارت بيقول (كل برغوت علي أد دمه)
وام ديكارت بتقول ( خدوهم فقراء واشحتو معاهم )
وخاله ديكارت بتقول ..... ولا بلاش كفايه نميمه .

٨- لازم نعترف بعيوبنا ونخير الطرف التاني
وهو اللي يقرر يستمر او ينسحب ،
لكن نلبس أقنعه يبقي هانلبس ف حيطه .

٩- لما العريس او العروسه يبان فيهم عيوب لاتطاق
( البخل - الشك - الكذب - تباعيه الأهل - عدم التدين - الغرور- او عدم تفاهم خالص )
يبقي لازم نخلع ومانقولش نرضي بالمقسوم ، ساعتها ارجوكوا اتبطروا علي النعمه وعلي ضمانتي .

١٠- آخر نصيحه للعريس بلاش زيارات كل يوم ،
بلاش فاكهه وحلويات كل مره ، بلاش تتعشي عندهم كل ماتروح -
بلاش تعمل طبيعي زياده عن اللزوم وتروح بالبيچامه او تستهيف او حتي تطبخ مع حماتك ، خليك تقيل .

cpd

[Mary Naeem]

خليك تقيل

صح الكلام

ربنا يباركك

[walaa farouk]

بلاش تعمل طبيعي زياده عن اللزوم وتروح بالبيچامه او تستهيف او حتي تطبخ مع حماتك ، خليك تقيل


ربنا يبارك خدمتك الجميلة رينا .

[Rena Jesus]

ميرسى لمروركم الغالى