ف حاجات بسيطة بتفرق معانا بشكل كبير ، حاجات زى الرسالة اللى بتوصلنا " أزيك واحشنى " ونكون مستنيين بعدها حاجة تانية فنلاقيهم بيقولولنا " أنا قولت أطمن عليك بس صباح الفل " زى " خلى بالك من نفسك " اللى بتتقال بشكل تلقائى عشان تعبر عن حب أكثر تلقائية ، زى الرسالة اللى بتوصلك من حد كنت نسيته عشان يقولك ف أخرها " أنت عمرك ما روحت من بالى " زى المنشن اللى بنعمله ف بوست قابلنا صدفة ، عشان نقول لحد قريب مننا أنت هنا ف كل حرف ، ف كل وصف ، عشان نقوله أنه قريب من القلب حتى لو كان ف أبعد نقطه من الكون عن عنينا ، حاجات بتكسر مفهوم البعيد عن العين بعيد عن القلب ، بتكسر مفهوم إن البعد بينسى الأحبه ، حاجات زى عفويتنا مع ناس بعينها ، زى كل لحظة جنان ، زى كل فعل بنعمله وبنضحك بهبل ، زى ضحكنا مع وجود أشخاص بعينها ف حاجات من الطبيعى تزعل ، زى يوم النتيجة اللى مكنتش كويسة فقولت بعدها وانت بتضحك لصاحبك " يا اسطى تعالى بقى نضرب طبقين كشرى " ، زى صاحبتك اللى بكيتى ف حضنها يوم فرحها من السعادة ، وزى الصحاب الجدعان اللى بيزعقوا معانا بعد موقف غلط بدافع الحب فنزعل فيجوا يصالحونا بـ " ياض أنت حبيبى والله " فنضحك بكل سهولة
ف حاجات كتير كانت بسيطة ، بسيطة قدرت تفرق ف يومنا .
وأحيانآ ف كامل عمرنا 😍
19 - 06 - 2017, 01:51 AM
رد: حاجات بسيطة
العرض المتطور