ماتخلفوش ......

Rena Jesus · رقم المشاركة : ( 1 ) 08 - 06 - 2017, 09:29 AM

ماتخلفوش..
(من قلب حجرة العلاج النفسي)..

ماتخلفوش لو مش بتعرفوا تعبروا عن مشاعركم..
هاتطلَّعوا أطفال قاسيين، جافِّين، جامدين القلوب..

ماتخلفوش لو مش بتعرفوا تحضنوا.. لو شايفين إن حضن الأب لبنته عيب.. أو حرام.. أو حاجة تكسف..
لأنها هاتفضل طول عمرها تدور على الحضن ده عند أى راجل..

ماتخلفوش لو شايفين إن أولادكم هايكونوا ملككم.. أو امتداد ليكم.. أو مشاريع لحياتكم..
انتوا كده بتدفنوهم بالحياة..

ماتخلفوش لو مش بتعرفوا تتحكموا فى أعصابكم وانفعالاتكم وردود أفعالكم..
هاتخلوا نفوس أولادكم هشة ضعيفة قابلة للكسر فى أى لحظة..

ماتخلفوش لمجرد رغبتكم الأنانية انكم يكون عندكم عيال زى باقى الناس،
وبعدين نبقى نشوف هانعمل فيهم إيه.. هايكرهوا نفسهم واليوم اللى اتولدوا فيه..

ماتخلفوش لمجرد إن النتيجة الطبيعية للجواز والجنس هى الخلفة، وربنا يسهل بعد كده..
هاتخذلوا أولادكم.. وهايخذلوكم..

ماتخلفوش وانتوا مليانين كلاكيع وعقد نفسية بدون حل ولا علاج..
هاتدَّفعوا أولادكم تمنها من حياتهم وعمرهم..

ماتخلفوش لو مش بتقبلوا الضعف.. لو مش بتعذروا التقصير.. لو مش بتقدَّروا المنحة اللى ورا الفشل.. لو مش بتسامحوا على الخطأ..

ماتخلفوش وانتم لسانكم طويل.. وإيديكم طويلة.. و عقلكم صغير..
حرام عليكم..

ماتخلفوش علشان تجيبوا أطفال تلعبوا بيهم.. أو علشان يونسوكم.. أو يسندوكم لما تكبروا..
دى نتايج مش أسباب للخلفة.. ماتحملوهمش فوق طاقتهم قبل حتى ما يتولدوا..

ماتخلفوش لو كان قرار جوازكم خاضع لضغوط عائلية، أو مدفوع بقوالب مجتمعية، أو محموم برغبات تبحث عن أى منفذ..

ماتخلفوش وتسافروا وتسيبوا عيالكم فى ايدين غير ايديكم..
ماتخلفوش وتقولوا لأولادكم: انت جيت غلطة.. انتى جيتى بنت وكنا عاوزين ولد..

ماتخلفوش وتوصلَّوا للى خلفتوهم إن وجودهم مرفوض..
وقبل كل دول.. وأهم من كل دول..
ماتخلفوش.. وبعد كده تدفَّعوا أولادكم تمن اختياركم تكملوا فى حياة زوجية فاشلة..
وتقولوا علشان خاطر العيال..

حبوا نفسكم وبعدين خلفوا..
حبوا بعض وبعدين خلفوا..
حبوا الحياة وبعدين خلفوا..
اتعالجوا.. وبعدين خلفوا..

walaa farouk · 08 - 06 - 2017, 09:56 AM

حبوا الحياة وبعدين خلفوا..
اتعالجوا.. وبعدين خلفوا..

ميرسي على مشاركتك الجميلة رينا

Mary Naeem · 08 - 06 - 2017, 11:58 AM

ماتخلفوش وانتم لسانكم طويل.. وإيديكم طويلة.. و عقلكم صغير..
حرام عليكم..

صح يا قمر

ربنا يباركك حببتي

Rena Jesus · 11 - 06 - 2017, 08:45 AM

ميرسى لمروركم الغالى
ماتخلفوش ......