لن اعيش فى جلباب ابى

[walaa farouk]

اسمحو لي أهاجم ( أقوي وأعظم ثابت من ثوابت مجتمعنا . قدسية الأب اللي بنخليها تفوق قدسية الله ).

اتعلمنا كلنا واتربينا علي ( بر الوالدين ). وده شيئ عظيييم ورااااائع.
بس للأسف ماتعلمناش حاجه عن بر ( الأبناء ).
وكلنا عارفين. ان محدش يحبك تبقي احسن منه غير ابوك.
لكن

عشان الانسان بطبعه ( مُتَسَلِّط ).
فبنلاقي ان فيه ابآء كتيييير بتستغل سلطة الأبوه.
في انها تتحكم في ابنائها. وتتحكم في مستقبلهم ( بطريقة تفوق المقبول ).
الناس اللي هاتشوف الكلام ده كله غلط. يبقي حبك لوالدك هايخليك غير مدرك للواقع. واستاذنك تقرأ التعليقات من غير ماتعلق.
سؤال للآباء.
⬅ ليه عاوز تطلع ابنك نسخه منك ؟
⬅ ليه عاوز تحقق احلامك اللي انت محققتهاش في ابنك وتنهي احلامه هو ؟
⬅ ليه ممكن تفتكر انك تقدر تبني انسان لايخطئ؟ ومع انك انت بتعصي ربنا ( عشان انت بشر ). عاوز ابنك يطيعك طاعه عمياء.
⬅ ليه مش بتديله الحرية في اختياراته. وبتجبره يسمع كلامك. بحجة انك عارف مصلحته؟ ( احيانا بيكون عندك حق. بس احيان كتير بتدخل في اللي ملكش فيه ).
⬅ مش عشان انت أب. يبقي من حقك تدخل في كل تفصيله صغيره او كبيره في حيات ابنك. ( فيه حاجات سامحني. ملكش دعوة بيها )
انت مالك ؟!! . أيوة زي ماسمعت كده انت مالك ؟! ( كاتب المقال هو اللي بيقول الجملة دي. ولا ينبغي ان تقال مثل هذه الجملة من الابن ).
⬅ الأبوة مش سلطة إلهية تديك الحق انك ترسم حيات ابنك علي كيفك انت. زي ماليك سلطه عليه. ليك برده حدود تقف عندها.
⬅ مش عشان هو ( حته منك ). تتحكم في حياته وفي مصيره غاية التحكم. تشتمه وتضربه وتبهدله بحجة انك بتعلمه.👊كده انت بتشوهه.
⬅ مش عشان ربنا وصي ابنك انه يبرك. تقعد تتشرط وتتحكم فيه وتهينه. ده ( النبي كان بيتعدل في قعدته لما تدخل عليه السيدة فاطمة. وكان بيفرش لها ثوبه عشان تقعد عليه ويقولها مرحبا بابنتي ).
⬅ مش عشان هو عقله صغير ( بحكم سنه ). تتمنظر عليه بخبرتك وتوقعاتك ( اللي بتتحق في الحياة ). وتعمل فيها اللي كان بيطلع الاول علي الدفعه. ( وانت كنت جايب 88% في الثانوية بالعافيه ).
⬅ مش عشان انت بتجيب فلوس. تقعد تذله وتتحكم فيه بالمصروف ( ده واجب عليك وفرض وغصب عنك ).
⬅ مش عشان هو ابنك. تكشر في وشه وتعامله وحش بحجة ضغوط الحياة. ( وبتبقي عاوزه يستحملك ويضحك في وشك ويطلب رضاك ).
⬅ ماتطلعش عقدك علي ابنك.
🕳🕳🕳🕳🕳🕳🕳🕳🕳🕳🕳🕳🕳🕳
⬅ دفع الابناء بالطريقة الغلط دي. لا ينتج عنها غير ابناء مشوهين نفسيا.
⬅ انا مختار الفاظي بعناية. فقبل ما تعلق، اقرأ كلامي بدقه. وكل كلمة في كلامي ليها تفصيلات وتفريعات واستثناءات.

اتعلمو تحترمو اولادكم.




اضافة.
1. انا بهاجم التدخل البااااالغ في حياة الإبن واللي بيمحي شخصيته.
2. الكلام مش هايعجب ناس كتير لان العاطفه ناحية الأب هاتخليهم يعترضو علي الكلام. بس ده مايمنعش ان ده واقع في المجتمع.
3. الدين ماييقولش ان الاب يتدخل تدخل شامل ومبالغ فيه في حياة الإبن. احنا بس عشان الفكرة دي بتيجي علي مزاجنا وبتعجبنا. فبنكررها علي لسانا كتير. لكن اللي دارس دين صح وبأكد علي كلمة صح. يعرف ان الدين مش مدي صلاحية مطلقة للأب.
4. بكل تأكيد معظم الاباء مش هايعجبهم الكلام.
5. بأكد للمرة التانية . حجة انك خايف عليه وبتحبه. مش مبرر اطلاقا انك تلغي شخصيته. او تهينه. او ترسم له حياته علي كيفك.

[Mary Naeem]

مشاركة جميلة جدا

ربنا يبارك حياتك