محسوب عليكي "راجل" ....

[Rena Jesus]

تعالي يا فاطنة يا حبيبتي لما أقلك على شوية تفاصيل كده في شخصية ما تعرف بال gentleman ...
و الكلمة زي ما انتي شايفة يا فاطنة مقسمة لجزئين .. ل gentle و دي أنتي عارفاها ...
و man .. و دي يا فاطنة معناها "راجل" ...
آخدالي بالك أنتي ...
ركزي معايا يا فاطنة يا بنتي متتوكسيش زي بقيت اخواتك ما اتوكسوا ...




_ الراجل اللي يوصلك لحد باب بيتكوا ..
و أول ما تنزلي من باب العربية يطير بيها من غير ما يستناكي تدخلي من باب العمارة و يطمن عليكي أنك دخلتي من باب بيتكوا (بالذات لو في وقت متأخر)
يبقى راجل جعر يا فاطنة .... و معندوش دم و لا ذوق ....
سبيه يا فاطنة ... او استبدليه بفستان شيك من bull n bear ...

_ الراجل اللي بيسيبك تنزلي لوحدك تجيبي حاجة أنتي محتاجاها من أي مكان عالطريق
(أي سوبر ماركت او on the run او .... )
ده أنتي بتعملي معاه ايه أساسا ياللي تنشكي في قلبك ؟؟!!

_ الراجل اللي بيسيبك تمشي أدامه أو وراه ... مش جمبه ...
(اخص...لا بجد... اخص) ...

_ الراجل اللي بيتلفظ بألفاظ نابية أدام الناس و أنتي معاه ...
(عادي جدا انه يشتم من سبيل الدعابة و انتوا لوحدكوا ... بس قدام الناس ... و انتي معاه ... لا ... لا يا فاطنة .... )

_ الراجل اللي صوته عالي جدا في الأماكن العامة و معندوش أي مشكلة أنه يتخانق معاكي قدام الناس ....
(ده مش متربي ... رجعيه للست الوالدة ..هية أولى بيه ... )

_ الراجل اللي بيخرج معاكي و ريحته عرق و أرف بحجة أنه طول اليوم في الشارع و مهلوك في الشغل ....
(لا يا عزيزي ... أنتة تروح بيتكوا تستحمى بمية سخنة و صابون ... صابون ها ... و تنزل بعدها عادي جدا .... احتراما ليكي على الأقل ) .....

_ الراجل اللي مش مهندم في لبسه ...
(و الله ما لازم يبقى ماركة ... بس يبقى شكله محترم ... ) ....

_ الراجل اللي ميثنيش على جمالك و شكلك و يغرقك بكلام الغزل بعد مجهود لا بأس به استعدادا لخروجة ما....
(راجل محبط و قليل الذوق و معندوش ثقة في نفسه ...) ....

_ الراجل اللي بيخليكي تشيلي حاجات تقيلة لوحدك و أنتي معاه .... و بيعمل نفسه من بنها ....
( خليكي جدعة و وديه بنها بنفسك و اتأكدي أنه وصل بالسلامة ... )

_ الراجل اللي بيلاغي بنات تانية و انتي معاه ... حتى لو بشكل غير مباشر ...
(دي شخصية مش محترمة ... و كونك بتقبلي بالوضع ده و انتي معاه فانتي حتما من نفس العينة)

_ الراجل اللي بيسيبك تقفي في الشارع وقت طويل لو مستنياه في مكان ما ...
من غير ميحس أنه عمل مصيبة كبيرة و فضل يعتذر عليها شهر ده مع وجود عذر قوي جدا ....
انما لو مر الموضوع مرور الكرام مع عدم احساسه بالذنب ...
و شايف ان الموضوع "عادي" ... فأنتي تنزلي عالدائري ...
تركبي ميكروباص و تاخدي الكرسيين اللي قدام زي الملكة ..
و تخرجي خروجة حلوة مع صحابك ... و تمسحي رقمه للأبد ....

_ الراجل التافه اللي ليه في رغي الحريم و القيل و القال ...

_ الراجل السطحي الجاهل اللي معندوش خبرة في الحياة ...
و دايما حكمه سطحي و سريع ...... عليكي .. و على غيرك .... ده تخافي منه .... ده أرف .... أرف بس !!!

و نقاط تانية أكثر بكتير أوي ...
بس الكلام فيها أو حتى التطرق ليها يعد نوع من أنواع الجنون و اللامنطق فيما يخص الراجل "الشرقي" بشكل عام ... و ال"مصري" بشكل خاص ...

عامة كل النقاط اللي فوق دي ملهاش أي علاقة بأنك بتحبيه ولا هوة ميت في دبابيك يا فاطنة (و لو اني اشك) ...
بس ليها علاقة بحاجة واحدة بس ... انتي مع راجل ولا لا ... A gentle man ...
و لا راجل و سد خانة و اهي ايام و بنعيشها و السلام ....
متعمليش نفسك عبيطة يا فاطنة ....

كونك strong independent wonan ده شيء عظيم ...
بس لو اللي معاكي هيتعامل معاكي على أساس أنك ياما شفتي و يا ما شلتي ..
و استحملي ياللي طول عمرك بتستحملي ...
يتعامل معاكي على أساس أنك راجل زيك زيه ... و ينسى أنك lady...
ليكي احترامك و معاملتك الخاصة ...
حتى لو كنتي و انتي لوحدك بتتعاملي على أساس أنك راجل و بتتبهدلي و بتسدي و بتسندي كل اللي حواليكي ....
وجوده في حياتك لو مشلش عنك شوية ...
لو محسسكيش أنك "أنثى" يبقى عدمه أحسن .... خليكي a strong independent woman للأبد .....
و متشليش فوق شيلتك نفر زيادة ... محسوب عليكي "راجل" ....

cpd

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسى على مشاركتك الجميلة

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمروركم الغالى