أحنا ليه بنقاوح ف الغلط؟

[Rena Jesus]

سنة 2011 كتب أيمن بهجت قمر و أخرج شريف عرفة فيلم من أفضل الافلام اللي انتجتها السينما العالمية عموما..
و السبب مش انه ناقش مشكلة البدانة ولا الميك اب العبقري اللي خلانا طول الساعتين مش شايفين "أحمد حلمي" لكن شايفين "مجدي مكاوي" التخين الكسول الهلهطة..
السبب أعمق من كدة بكتير ..

أيمن بهجت قمر ف الحقيقة اهدانا "كتالوج" كامل لمراحل العلاقات العاطفية بين أي واحد و واحدة..
كتالوج حقيقي مصري ينفع نطبقه على أي قصة فيها الولد "مدمن" أي حاجة..
مش لازم تكون الاكل..
ممكن مدمن "بلاي ستيشن" , مدمن " كورة" , مدمن " سوشال ميديا, فيسبوك و خلافه",
مدمن "نوم و أنتخة" مدمن "قعاد ع القهوة" ..و العلاقة بتمشي

كالتالي:

المرحلة الأولى:
في بداية العلاقة "الولد بيبقى حاسس ان البنت Out of his league و انه محتاج يحسن و يطور من نفسه عشان تحبه..
و ده اللي بان ف مشهد مجدي و هو بيحاول يحشر نفسه ف كورسيه عشان يبان ارفع شوية.ده برضة بيحصل ف الواقع..
تلاقي الولد بدأ يهتم بصحته, يروح جيم, لو بيدخن يبطل, يهتم بشغله بشكله بمظهره, يقلل البلاي ستيشن, مايروحش القهوة ..الخ.

المرحلة التانية:
لما بيفشل الشاب انه يتغلب على نوع الادمان اللي عنده بيبدأ يركز ع الحاجات اللي البنت بتحبها عشان يغلوش على اي حاجة تانية و يا سلام لو ممكن يخليها تعمل من اللي هو بيعمله ف يحس انه عادي..
ده بان ف المشهد بتاع مطعم "نحمده" و لما سألها "انتي ازاي بتاكلي و مبتتخنيش"
قالتله "عندي حاجة انت يمكن مسمعتش عنها, اسمها الارادة"

المرحلة التالتة:
الولد بيقرر يعمل اي حاجة عشان تحبه زي ما مجدي قرر يعمل دايت و طلب منها تشجعه و فعلا راح لدكتور ..
لكن من جواه متضايق لانه حاسس ان حبها ليه مشروط Conditional
مش انها بتتكلم ف الصح او انها خايفة عليه.
و بينسى تماما المشاكل اللي السمنة مسببهاله زي انه بينهج, بيكح,
حياته كلها بايظة بسبب ادمانه (السجاير، القهوة، السهر، فيسبوك..الخ).

المرحلة الرابعة:
البنت يا عيني بتبقى عاوزة تحسسه ان she accepts him the way he is
و ده بان لما قالتله " لو حبيت واحد تخين , مش هسيبه غير لما يخس"..
هو طبعا مسمعش غير كلمة "مش هسيبه"

المرحلة الخامسة :
اول ما الولد اتطمن انها قبلاه زي ماهو ,
العزيمة بتقل او بتروح تماما و ده بان ف مشهد "في تلك الظروف العصيبة ..
قررت اني ..مش هخس!!".
بالرغم من انه عارف ان ده فيه مصلحته، بيستسلم..
عزيمته بتروح تماما بعد ما وصل للبنت و بيدخل ف مرحلة "انكار " ان فيه مشكلة من اساسه،
لدرجه انه بيقنع صاحبه انها قالت "مش هسيبه"!
يعني ف الواقع لو بطل سجاير , يرجع يشرب تاني عادي...يسيب الجيم.. لو ركِّز شوية، هيرجع يكسل يروح شغله

المرحلة السادسة:
البنت بتكون خلاص حبته بجد و زعلانه عليه و على حاله ف بتقرر تقسى عليه و تجرحه و تكذب و تقول انها مابتحبوش ف بيكون رد الفعل انه بيقفل منها هي شخصيا و بيتجرح جدا متجاهل تماما الصورة السيئة اللي هو خلاها تشوفها.
و بيرجع ياكل و اكتر من الاول كأنه كدة بينتقم منها "ف نفسه"
و ده اللي بيحصل ف الواقع..القهوة قعدتها هتطول, الشغل هيتنسي تماما ,
كل حاجة هترجع أوحش ما كانت

المرحلة السابعة (اختياري):
الحياة بتلطش فيه من كل ناحية (وفاة خاله, مشاكل ف شغله..الخ)
ف بياخد القرار انه يتحدى نفسه و يبطل ادمان و فعلا بيخس و دي مرحلة سهل نشوفها ف الواقع..
لما تلاقي ولد اتقلب من الشمال لليمين اعرفي انه بيتحدى واحدة سابته.

المرحلة التامنة:
بعد ما نجح انه يغير الحاجة اللي سببت المشكلة بينهم,
بيعزمها على حفلة عشان يوريها انه يقدر يكون الانسان اللي هي عاوزاه لكن هي اللي ماصبرتش.
ده في الواقع غالبا ممكن يحط صور على فيسبوك تبين انه :
اترقى ف شغله
بيروح الجيم
بينام بدري
محافظ على نفسه
مبسوط و الحمدلله
عشان يثبتلها انها خسرت جامد لما سابته.

المرحلة التاسعة:
و ده اخر مشهد ف الفيلم اللي فيه العبقرية كلها,
بعد المرار ده و الاحداث الملتهبة أول ما مجدي بيعرف ان البنت كدبت عليه وانها لسه بتحبه ,
اول حاجة بتيجي ف دماغة "الادمان" القديم ف بيقول لنفسه : "ايه ده هو انا جعان؟"

السؤال هنا بقى:
احنا ليه بنقاوح ف الغلط؟
ليه بنهدا لما بنتطمِّن ان اللي قدامنا بيحبنا؟ ليه بنكسل؟
ليه مبنحسش بقيمة الحاجة غير "قبل ما نطولها" أو "بعد ما تضيع من ايدينا" ؟
ليه ؟ ها؟ليه؟

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسى على مشاركتك الجميلة

[Rena Jesus]

ميرسى لمروركم الغالى

[MenA M.G]

موضوعك مميز .. طرح رائع
ربنا يبارك خدمتك