الهدوء والغليان

walaa farouk · رقم المشاركة : ( 1 ) 22 - 03 - 2017, 07:27 AM

الأمور بينكم معدتش زي الأول؟ العلاقة بينكم بقي فيها توتر شديد؟
بتتحسر على الأيام الجميلة اللي كانت في اول الزواج؟ نفسك تلاقي حل للمشكلات دي كلها عشان ترجع تشوف الطرف التاني زي زمان؟
انا هاقولك على حل للصراع ده كله من وجهة نظري. وهابدأ برقم 2.

2. عارفين لما ب( نغلي ) اللبن على النار ؟ لما اللبن بيقرب من مرحلة الغليان ب( يفور ). وبيرتفع في الوعاء لحد ما يقع منه. الا اذا انت طفيت النار. ساعتها ( الفوران ) بيقل ومافيش حاجه بتقع من الوعاء. ولو ولعت النار تاني. يبدأ تاني في مرحلة الفوران والغليان ولما تطفي النار تاني. يرجع اللبن يهدي تاني.

3. طيب غليان العلاقة وعارفينه. وفوران الغضب بيننا وعارفينه. ازاي بقي اقدر اطفي النار واهدي الغليان ده. عشان الفوران يقل؟؟؟؟ اجابة السؤال. هي النقطه رقم 1 اللي انا أجلتها للآخر. وهي مقصد البوست. ركز واقرأ للآخر.

1. أهم نقطة في الحل للأسف كلنا بنغفل عنها. وبنقعد نتناقش ونتعاتب وندور على حلول. وده شيئ ممتاز. لكن بننسي اهم شيئ نعمله قبل الأمور ماتتطور.

⬅ الركيزة الاساسية لثبات العلاقة وقوتها واستمرارها هي ( التفكير ).
فكر اد ايه كنت مبسوط معاها زمان. واد ايه هي كانت انسانه كويسه. بس ضغوط الحياة هي اللي غيرتكم. فكر ازاي كنت هاتتجنن وتتجوزها في فترة الخطوبة. فكر في كل موقف حلو بينكم. فكر في كل يوم جميل كنتم مع بعض فيه. فكر وفكر وفكر وفكر. وانسي اخر 6 شهور. واقولك حاجه تانيه.⬅ اتعرفو على بعض من جديد كانك اول مره تقعد معاها.
يعني احنا لو قعدنا نفكر في دماغنا و نفكر بصوت مع بعض. ده هايحسن الجو؟ . بالتأكييييبييييد. بس ازاي يعني ؟ دي نقطة تافهه اوي حكاية اننا نقعد نفكر في الحاجات الحلوة القديمة.
لا مش نقطة تافهه اطلاقا. والدليل على صحة كلامي. ان ربنا قال في القرآن لما يحصل مشاكل بين الزوجين. قال 4 كلمات في الآية. بس ناس كتير مش بتاخد بالها منها. وال4 كلمات دول. هم العلاج.
ربنا قال ( وَلَا تَنْسَوُا الْفَضْلَ بَيْنَكُمْ ). يعني ربنا جعل ( الذاكرة والذكريات ) هي الركيزة الاساسية لجعل حبل الود والمحبة موصول بينكم. ربنا جعل ( الذكريات ) هي الحد الفاصل بين (الهدوء والغليان).

⬅ العلاج ده بينفع في أي علاقة بين اتنين (أزواج. اصدقاء. أهل. زملاء).