السجن للجدعان

[walaa farouk]

ولأننا دايمًا بنقول #السجن_للجدعان .. اختارنا لكم أجدع 6 شخصيات في الكتاب المقدس، السجن مقدرش يغلبهم، لكن همَّا اللي انتصروا عليه!!










يوسف......



هو أول شخص اتسجن في الكتاب المقدس، وقت يوسف كان أول مرة يبقى معروف حاجة اسمها سجن، السجن ده كان عند المصرين بس!

اتاخد يوسف واترمى في السجن ظلم، علشان اختار انه يسمع كلام إلهه ومايعملش الخطية مع إمرأة فوطيفار!

وابتدى الله يظهر احسانه ومراحمه ليوسف جوه السجن وبقى من الناس المعروفه بسبب أمانته وثقته في إلهه.. طول الفترة دي الله كان بيعده ويجهزه علشان الحاجة العظيمة اللي كان داخل عليها، أنه يبقى الراجل الثاني في مصر بعد فرعون، وكان تعويض ربنا ليه أكبر بكتير مما كان يتخيل!!

- اوقات كتير لما بنمر بظروف صعبة وخصوصًا لما نكون مظلومين فيها، بنحس زي يويف بالظبط لكن القصة دي بتعلمنا اننا نثق في الله أكتر وان كل سجن بالنسبة لنا ليه دايمًا مخرج عند الله





شمشمون من أقوى الشخصيات في الكتاب المقدس، مكانش فيه حد قوي زيه، لكن يا خسارة قوته ضاعت لما سلم نفسه لدليلة، ضحكت عليه بإسم الحب وخدعته وقدرت تخلي اعدائه الفلسطينين يغلبوه لما قرر انه يكشف لها سر قوته، وانه نذير لله من ولادته وسر قوته كانت في شعره.. ولما قصوا شعره، فارقته قوته وبقى شخص عادي وأخدوه رموه في السجن وبقى بيطحن قمح بدل الحيوانات!!

ورغم أن كل اللي حصل ده كان غلطته من البداية، إلا أنه ماستسلمش وصلى لربنا انه يسامحه ويرجعله جزء من قوته علشان يعمل اللي المفروض كان يتعمل من الأول.. وفعلاً شعره في الفترة دي ابتدى يطول تاني وجزء من قوته رجعله وكانت النهاية انه مات تحت حطام المعبد اللي كانوا موجودين فيه ومكتوب في الكتاب المقدس ان الناس اللي موتها شمشمون في نهاية حياته أكتر بكتير من اللي موتهم وهو عايش!!

- شمشون أكتر قصة بتوضح الحقيقة دي أن حتى لو انت غلطان تقدر ترجع لربنا وتوب وهو بيعرف يصلح اللي باظ، مهما كنت شايف نفسك محبوس في سجن مش قادر تخرج منه، الله عنده للموت مخارج.







من الطبيعي جدًا أن أي نبي بيوصل رسالة ربنا للشعب أكيد هيسمعوا كلامه، لكن اللي حصل مع إرميا كان العكس تمامًا!!

الملك صدقيا بن يوشيا كان داخل حرب مع جيش بابل وطلب من جيش فرعون ( مصر) أنه يساعده في الحرب دي، فجه الملك لإرميا النبي وطلب منه يتشفع ( يصلي ) من أجل الشعب علشان ينتصر، جه الرد من ربنا عليه وقاله" روح قول للملك أن الجيش اللي انت معتمد عليه علشان يساعدك هيتخلى عنك وهيمشي ويرجع لبلده وجيش بابل هيقبض عليك وهتتهزم في الحرب وهيستولى الجيش على كل البلد واللي هيفضل فيها هيموت في المعركة أو هيموت من الجوع أو من الوباء.. ولأن الملك كان حواليه ناس مشيرين كذبة، ضحكوا عليه وقالوله كلام مختلف!!
فطبعًا الملك مصدقش كلام ارميا وعاقبه ورماه في السجن.. وفضل ارميا في السجن لغاية اليوم اللى استولى فيه جيش بابل فعلاً على مدينة القدس، واتحقق كلامه في النهاية ..

- مش دايمًا يكون السجن عقاب لأننا عملنا حاجة غلط، لكن زي ارميا كده، اتسجن لأنه أعلن رسالة ربنا، بس للأسف الملك مقبلهاش.. هو صحيح فضل موجود في السجن لغاية لما الملك مات واتحقق كلام ربنا، لكن هو فضل ثابت على كلامه وواثق في إلهه ..








أول شخص بشّر بمجيء ملكوت الله على الأرض في شخص يسوع المسيح، يوحنا اللي قال عنه المسيح " هَا أَنَا أُرْسِلُ أَمَامَ وَجْهِكَ مَلاَكِي الَّذِي يُهَيِّئُ طَرِيقَكَ قُدَّامَكَ" ( متى 11: 10)

وفي الوقت اللي كان بيبشّر فيه يوحنا بالملكوت، كان فيه ملك اسمه هيرودس، الملك ده كان بيحب يسمع وعظ يوحنا المعمدان وكان مبسوط منه، لكن لما يوحنا وقف قصاده وواجهه بالخطية اللي كان بيعملها – هيرودس اتجوز مرات اخوه - وقاله أنه" لاَ يَحِلُّ أَنْ تَكُونَ لَكَ امْرَأَةُ أَخِيكَ " لأن في الشريعة اليهودية اللي عمله هيرودس ده يعتبر زنا! فأتغاظت منه هيروديا – هي دي اللي اتجوزها هيرودس - وطلبت منه انه يرمي يوحنا في السجن وللأسف سمع كلامها، وبعد وقت مش طويل هيرودس قطع راس يوحنا بناء على طلب ابنة هيروديا.. ودي كانت نهاية يوحنا المعمدان..

يمكن نهاية يوحنا بالنسبة لنا مش احسن النهايات، الله مأنقذوش من السجن ولا من الموت ولا عمل معاه معجزة .. لكن الحاجة اللي بنتعلمها من يوحنا، تمسكه بكلام الله وحرصه الشديد انه ينفذه..

وساعات كتيرة بنتحط في مواقف بنبقى محتارين فيها، نقول الحقيقة ونمشي مع فكر وتعاليم الكتاب المقدس ولا نخالفاها؟! القرار ده بتاعك.







بداية الأصحاح الـــ 12 من أعمال الرسل بيحكي حادثة مشهورة في الكتاب المقدس وهي مقتل يعقوب أخو يوحنا بالسيف بأمر من الملك هيرودس، ولأن هيرودس كان بيحب يرضي اليهود فقبض على بطرس لأنه عِرف انهم كده هيبقوا مبسوطين ودخلّه السجن!! وعلى باب الزنزانة وقّف 4 عساكر بيتغيروا كل شوية علشان يحرسوه و ما يهربش منهم، وكان في خطة هيرودس أنه يسلمه لليهود بعد عيد الفصح علشان يحكموا عليه إذا كان هيموت ولا هيخرج!!

وابتدت الكنيسة تصلي بلجاجة من أجله، وفي الليلة اللي كان هيرودس هيسلم فيها بطرس لليهود.. جاله ملاك الرب وصحاه من النوم وخرّجه وكل ده كان بطرس فاكر انه بيشوف رؤية!!

بيقول الكتاب انه لما رجع إلى نفسه قال" الآن علمت أن الرب أرسل ملاكه وأنقذني من يد هيرودس ومن كل انتظار شعب اليهود"

ممكن نتحط في ظروف مالهاش أي يد فيها كده زي بطرس، لكن هو كان واثق في الله، يمكن مكانش عارف انه هيخرج، لكن اللي عارفه وكان متأكد منه ان الله معاه









بولس الرسول هو نفسه شاول الطرسوسي، اللي كان بيقتل وبيعذب في المسيحين علشان بيقولوا أن يسوع رب و إله، لما ربنا اتقابل معاه وغيّره، بقى بولس الرسول اللي مستعد انه يموت علشان يشهد إن يسوع المسيح هو الله ..

ودي كانت شهادة الله عن بولس .. " لأَنَّ هذَا لِي إِنَاءٌ مُخْتَارٌ لِيَحْمِلَ اسْمِي أَمَامَ أُمَمٍ وَمُلُوكٍ وَبَنِي إِسْرَائِيلَ. لأَنِّي سَأُرِيهِ كَمْ يَنْبَغِي أَنْ يَتَأَلَّمَ مِنْ أَجْلِ اسْمِي " ( أعمال الرسل 9) وفعلاً هو دا اللي حصل، بولس الرسول أتألم كتير أوي من أجل المسيح من ناس قريبين ليه ومن ناس أعداء ومن ضمن الآلامات دي أنه اتسجن اكتر من مرة!!

والغريب أن أغلب رسائل بولس اللي كاتبها وهو في السجن محبوس، بتتكلم عن الفرح وده طبعا مش الطبيعي لأن أي واحد في مكانه كان يبقى متضايق وزعلان من ربنا على الأقل علشان محامهوش من السجن والبهدلة وخصوصًا انه بيبشّر بأسمه للناس ..

الله يقدر يديك فرح حقيقي وسلام حتى في وسط ظروفك الصعبة اللي انت شايفها أنها زي السجن ومحبوس فيها وملهاش حل، صدق فيه وفي وعوده، هينجيك

[Kerolos_Faik]

كلمات جميلة جدا ....موضوع رائع
ربنا يبارك تعب محبتك

[Mary Naeem]

موضوع مميز
ربنا يباركك

[walaa farouk]

ميرسى كتير على مروركم الغالى
ميرسى مرمر لتميييز الموضوع

[Rena Jesus]

موضوع راااائع فعلا
ميرسى ربنا يبارك تعبك

[walaa farouk]

ميرسى على مرورك الغالى رينا

[fahmey]

موضوع حيوى وجميل ربنا يباركك ويعوض تعب محبتك