و ما المانع لو خسرت النقاش و كسبت ضحكتها ؟

[Rena Jesus]

في بحث عملته شركة لبان نعناع أسمها Orbit Complete
عشان تعرف أنهي أكتر جاذبية مكياج الست و لا ضحكتها ؟؟
و النتيجة طلعت ان حوالي 66% من الرجالة شايفين
أن ضحكة الست جذابة أكتر من المكياج ..

بغض النظر أن ممكن يكون في تحيز في البحث ده نظرا أنها شركة لبان بتسوق لمنتج بيشتغل علي السنان و البوء ،
و لو كانت شركة مستحضرات التجمييل كانت النتيجة ممكن تكون مختلفة ..




بس حقيقي أجمل حاجة ممكن تشد في وش اي أنسان و خصوصا البنات هي الضحكة ..
حتي أول ما نيجي نفتكر وشوش جميلات السنيما يجي علطول في بالنا
ضحكة الساحرة " سعاد حسني " و الشقية " مارلين مونرو " ..

علي الناحية التانية المكياج مش دايما بيجي في صالح البنت و بالذات لو كتير زي بتاع المناسبات و الأفراح اللي بيحول البنات لكائنات فضائية أو مخلوقات مخيفة ..
لحظة لما يكون الـ foundation cream بزيادة
اللي هو تحس أنه خلص منها و هي كملت بكيس دقيق او بشوية أسمنت أبيض ..
لدرجة أن ايد البنت و باقي جسمها يكون لون بس وشها لون مختلف تمام كأن معمولها عملية زرع راس من حد تاني !!
مع الـ eyeliner التقيل اللي في الأغلب بيسيح مع العرق فيخليك تحس انها مضروبة بوكس في عنيها أو ثقب أسود بينقلنا للزمكن في وسط وشها !
و الروج اللي بياخد من ودنها اليمين لودنها الشمال فحقيقي المنظر يبقي مريب ! ...

كل ده مش بيجب همه زي ما الضحكة بتعمل ..
الضحكة اللي بتشلقب كياننا و تخلينا بنلف حوالين نفسها عاوزين نسجلها في شريط أمخاخنا و ذكرياتنا ...
و يبقي زي ما قال المصمم الأردني " زيد الحوراني " :
(( .. و مالمانع لو خسرت النقاش و كسبت ضحكتها ؟ ... ))

cpd

[walaa farouk]

ميرسي على مشاركتك الجميلة

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمرورك الغالى